Hoe kry ek my vleis doeksag? 

Hoe sorg jy dat die vleis van die been val, en nie droog of taai is nie? Vleis, veral rooivleis, is vol vesels, senings en gelatien.

Wanneer die vleis blootgestel word aan hoë temperatuur, skrik die vesels en senings as’ t ware, krul en raak hard. Taai en onsmaaklike vleis is dan jou voorland.

Maak jou potjievleis vir langer teen ’n laer temperatuur gaar sodat die vesels en senings kan ontspan en wegsmelt. Sodra die vleis sag is en gevlok kan word, kan jy maar die temperatuur hoër draai – dan sal die vleis nie meer taai raak nie.

Waak daarteen om die pot veral in die eerste ¾ van die kooktyd te laat kook. 

Die vet weet! 

Vetterige stukke vleis vaar beter in die pot omdat die vet die vleis vogtig hou en geur.

As jy skrikkerig is vir vet, is dit beter om steeds die hele pot met vet en al te maak. Verkoel dan die pot in die yskas en skep die vetlaag af wat bo-op gevorm het. Verhit dit dan weer voordat jy dit voorsit. 

Om te meel of nie? 

Jy hoef nie die vleis in meel te rol voordat jy dit bruin braai nie. Die rol van die meel is om die sous dikker te maak, maar jy kan bloot effens minder vloeistof byvoeg. As daar tyd is, braai ook die ui en ander groente voordat jy die vloeistof byvoeg. 

Hoeveel kole? 

Indien jy die potjie oor die vuur gaan maak, moet jy die temperatuur matig tot laag hou.

Sorg vir goeie kole ongeveer die grootte van standaardbrikette.

Vir ’n standaard-no. 2-pot (groot genoeg vir 6 mense) het jy 8-10 kole onder die pot en 8 kole bo-op die potdeksel nodig. Die kole onder die pot moet in ’n sirkel gepak word – nooit direk onder die middel van die pot nie. En die kole bo-op word ook in ’n sirkel gepak met 4 van die kole rondom die handvatsel in die middel. Doen dit sodat die hitte sirkuleer en konstant bly vir twee uur sodat die kos nie brand nie. 

Lekker sous!

Potjies het soms meer vloeistof nodig as wat die resep aandui – die voginhoud van die vleis self, hoeveel keer jy loer en die hitte van die kole of oond speel alles ’n rol.

As die pot halfvol vloeistof is wanneer jy wegtrek, behoort dit nie droog te kook nie.

Loer halfpad deur die kooktyd en voeg nog aftreksel, bier of water by.

Hoe hoër die temperatuur, hoe meer vloeistof het jy nodig. Maar moenie te veel vloeistof byvoeg nie. Die geure moet konsentreer en net genoeg sous hê om saam met die vleis te bedien; jy maak mos nie sop nie.

Dit is baie makliker om teen die einde nog ’n bietjie aftreksel by te voeg as om van die oortollige sous ontslae te raak. 

Wenke vir jou prutpot

  • Die gerief van ’n prutpot is dat jy alles saam in die pot kan pak. Maar as jy tyd het, verbruin die vleis en groente apart in ’n wye swaarboompan voordat jy dit in die pot pak. Gooi dan ’n bietjie aftreksel of ’n knertsie sjerrie of rooiwyn by die pan en skraap al die stukkies los wat vasgebrand het en gooi alles saam in die pot. Dit gee die kos ’n ekstra geurtjie en kleur en neem nie langer as 15 minute nie. 
  • Moenie te veel vloeistof in die pot gooi nie. Die geheim is juis om nie baie vloeistof te gebruik nie. Gooi net genoeg by om ¼ van die bak te vul. As die resep meer vloeistof aandui, hou dit eenkant en kyk of jy dit later nodig het. 
  • Moenie loer of roer nie! Die pot gebruik juis die stoom binne-in om die kos sappig gaar te maak sonder om baie krag te gebruik. As jy loer, verloor die pot dadelik stoom en hitte. Loer net een keer na ’n ¾ van die kooktyd.