Resepte en stilering Caro Alberts, Assistent Lichelle May  

Foto’s Jac Kritzinger

Jy benodig

(genoeg vir 4-6)

• 1 skaapboud van 1,5-2 kg, aan die been vir die ketelbraaier en ontbeen, oopgesny en effens plat vir die oop vuur
• 1 blikkie (85 g) gerookte oesters
• 6 knoffelhuisies, middeldeur gesny
• 12 takkies roosmaryn
• 2 eetlepels (30 ml) growwesout
• 1 eetlepel (15 ml) gemaalde peper
•  2 eetlepels (30 ml) mosterdpoeier
• sap en fyngerasperde skil van 1 groot suurlemoen

Só maak jy

1. Maak ’n vuur in jou ketelbraai of ander braaiplek en wag tot die kole lekker matig is. ’n Ketelbraai werk die beste vir ’n boud, maar as jy die boud vir jou ontbeen, kan jy dit op ’n oop vuur braai. Vra jou slagter om dit vir jou te doen.

2. Sny oraloor die boud 12 diep kepe en druk ’n stukkie knoffel, ’n oester en ’n roosmaryntakkie in elke gaatjie. Vryf die boud in met die mosterdpoeier en suurlemoensap en bedek dit goed met sout, peper en suurlemoenskil.

3. Braai die boud stadig vir sowat 2 uur in die ketelbraai (met die deksel op). Oor oop kole is dit sowat 25 minute aan elke kant.

Weg Ry & Sleep sê:

Pasop vir te warm kole, en ook om die boud te droog te braai. ’n Skaapboud kan liewer nog pienk in die middel wees as jy hom van die rooster afhaal.