Vir 4-6 | Voorbereityd 10 minute | Gaarmaaktyd 3 uur 


Jy benodig

• 250 g spek, gekap
• 1 selderystingel, fyngekap
• 1 wortel, fyngekap
• 1 ui, fyngekap
• 250 g portabellini- of bruinsampioene, gekap
• 350 ml rooiwyn
• 2 kg beeskortrib
• 2 koppies vleisaftreksel
• 2 ansjovisfilette, fyngekap
• 1 blikkie (410 g) gekapte tamaties
• 1 eetlepel Dijon-mosterd
• 4 skeute worcestersous
• 1 teelepel roosmaryn, gekap
• 1 teelepel tiemie, gekap
• 1 teelepel oreganum, gekap


Só maak jy

1. Braai die spek in ’n grot pot totdat die vet begin smelt. Voeg dan die seldery, wortel, ui en sampioene by en roerbraai dit vir 10 minute oor ’n matige hitte tot geurig. 

2. Verhoog die hitte, voeg die rooiwyn by, en skraap die bodem met ’n houtspaan skoon die lekker geure mooi met mekaar kan praat terwyl die wyn vinnig vir 5 minute prut.

3. Pak die kortrib in die pot en gooi die voeg die res van die bestanddele by. Sit ’n digte deksel op en laat die bredie vir 3 uur stadig prut. (Jy kan ook die pot vir 3 uur lank met sy deksel op teen 150 °C in die oond sit.)

4. Sit die kortrib net so aan die been saam met groente op polenta voor en skep ’n bietjie van die sous oor. As die bredie vir jou te ryk lyk, kan jy die vleis uitskep en die sous eers laat afkoel sodat jy die vetlagie wat bo-op vorm, kan afskep. Pols die oorblywende sous met ’n handvoedselverwerker voordat jy die vleis in die pot terugpak en weer deurwarm maak.