Vir 6 | Voorbereityd 5 minute | Gaarmaaktyd 90 minute

Jy benodig 

• 2 eetlepels botter

• 2 eetlepels olyfolie

• 1,4 kg varknek (in stukke gesny, maar nog aan die been)

• 500 g klein salotte of pekeluitjies, geskil en gehalveer 

• 1 koppie droë witwyn

• 4 knoffelhuisies, fyngedruk

• 3 teelepels vars tiemieblaartjies

• 1 koppie hoenderaftreksel 

• 3 eetlepels botter

• 4 eetlepels meel

• sout 

• swartpeper

• 1 rol blaardeeg, ontdooi

• 1 eier, geklits

Só maak jy

1. Verhit 1 eetlepel elk botter en olyfolie in ’n swaarboompan of swartpot en braai die varkvleisstukke vinnig oor ’n hoë hitte in sarsies tot bruin. Skep die vleis uit en hou eenkant. Voeg nog botter en olyfolie by die pan en verbruin dan ook vinnig die uie. 

2. Voeg die wyn by en roer die die aangebrande stukkies in die pan met ’n houtlepel los (die Ingilse noem dit deglaze en dit gee geur aan jou gereg). Verlaag die hitte en skep die vleis saam met die knoffel en tiemie terug in die pan. Voeg die helfte van die aftreksel by en laat dit vir sowat 40 minute oor ’n lae hitte met die deksel op prut totdat die vleis sag is en van die been af val. Skep dan die vleisstukke uit, verwyder die bene en vlok die vleis met ’n vurk. Skep dit dan terug by die uie. 

3. Smelt die 3 eetlepels botter oor ’n lae hitte in ’n skoon kastrol en roer die meel daarby in. Roer die oorblywende half koppie aftreksel bietjies-bietjies daarby tot goed gemeng. 

4. Roer dit deur die vleis-en-uiemengsel, bring dit tot kookpunt laat dit vir 5 minute prut tot verdik. Proe en geur met sout en swartpeper na smaak. Laat die pasteivulsel dan eenkant staan om af te koel.

5. Voorverhit intussen die oond tot 200 °C. Skep die vulsel in ’n bak en rol die blaardeeg bo-oor uit. Sny ’n gaatjie in die middel van die deeg vir stoom om te ontsnap, verf die deeg met die eier en bak die pastei vir 30 minute tot goudbruin.