Jy benodig

  • 1 steak (3 cm-5 cm dik)
  • 2 eetlepels sojasous
  • 1 eetlepel druiwepit- of avokado-olie
  • 2 eetlepels botter
  • 2 eetlepels sjerrie-asyn
  • 1 teelepel knoffel, fyngekap
  • ¼ teelepel swartpeper, grofgemaal

So maak jy

1. Vryf die steak met die sojasous in en plaas dit in ’n duursame plastieksakkie (of net so met in die vakuumverpakking).

2. Tap ’n koelboks met ’n deksel wat dig sluit amper vol baie warm kraanwater en toets met die termometer wat die temperatuur van die water is. (Of voeg kookwater uit ’n ketel en koue water daarby en roer totdat die temperatuur 54 °C bereik. Sien die kassie hiernaas).

3. Laat sak versigtig die sakkie met vleis in die water, en hou die bokant van die sakkie oop. Die water sal die laaste lug uit die sakkie pers, en verseël dit sodra al die lug uit is. Sorg dat die sakkie goed verseël is en laat sak in die water. Maak die koelboks dig toe en los vir 45 minute. (As jou vleis vakuumverpak is, kan jy dit net so insit).

4. Verwyder die sak met die vleis. Dit kan nou so in die sakkie in die yskas gehou word en eers later gebraai word.

5. Haal die vleis uit die sakkie en druk dit baie goed droog met kombuispapier – droë vleis braai vinniger bruin. Maak ’n swaar ysterboompan rookwarm, of kry ’n laag vuurwarm kole gereed en maak seker die rooster is laag oor die kole. Gebruik ’n braaitang om die steak regop op die rooster of pan te hou sodat die vetrand goudbruin en bros kan braai. Gooi die olie in die rookwarm pan en met een eetlepel botter en braai dan die steak vir slegs 1 minuut aan elke kant. Gebruik ’n eierspaan om die steak plat teen die pan of rooster te druk.

6. Haal die steak uit die pan en plaas op ’n bord. Voeg die knoffel, swartpeper en sjerrie-asyn by die warm pan en verwyder van die hitte en voeg die laaste eetlepel botter by om te smelt. Drup oor die steak en bedien met groensalsa en fetakaas. 

Maak vleis in jou koelboks gaar!
Maak vleis in jou koelboks gaar!

Gebruik jou termometer só

Die T-beensteak van 3 cm dik was medium-rou ná 45 minute in water van 54 °C. Mooi pienk, sag en sappig, maar glad nie bloederig nie.

Onthou jy kan dit altyd ná die tyd langer braai as dit te rou is.

Hou die volgende in gedagte:

Vir rooivleis gee 48 °C jou ’n halfrou (rare), medium-gaar 60 °C en vir goed gaar (well done) moet jou water 70 °C