Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Huisgids
Wat as gehuurde plek verkoop is?

Die huidige swak ekonomiese toestand is ’n aansienlike hupstoot vir die huurmark. Huur is dikwels goedkoper as koop en soms die enigste opsie vir iemand wat hulself in ’n moeilike finansiële situasie bevind. Vir diegene wat na ’n nuwe buurt of stad verhuis, is dit dikwels ook meer gerieflik om eers vir ’n tydperk te huur voordat hulle besluit om te koop.

Dit is belangrik dat jy die kontrak mooi deurlees en verstaan voordat jy ’n eiendom huur. Foto: iStock

Hoe dit ook al sy, die huurmark is bedrywig en daar is deesdae heelwat mense wat in eiendomme gemik op die huurmark belê.

As ’n huurder is dit nie altyd maklik om die regte huureiendom te vind nie, veral in gevalle waar die huurgeld toenemend aan die styg is. As jy dit dus uiteindelik regkry om ’n goeie huureiendom te bekom, is dit teleurstellend wanneer die eienaar besluit om te verkoop tydens jou huurtermyn.

Wat is jou regte dan? Kan die eienaar die eiendom verkoop en sal jy moet trek al is jou huurkontrak steeds geldig?

Die Seeff-eiendomsgroep sê dis belangrik om te weet dat die eienaar van die eiendom altyd die eiendom mag verkoop, selfs as daar ’n geldige huurkontrak in plek is. Dit gebeur soms dat die huidige huurders die eiendom koop, maar wat ook al die geval is, mag die eie­naar nie van die huurders verwag om te trek voordat die huurkontrak verstryk het nie.

’n Belangrike regsbeginsel wat van toepassing op huureiendom is, is die “huur gaan voor koop”- beginsel. Dié Romeins-Hollandse regsbeginsel beteken dat ’n huurkontrak geldig bly tot die verstrykingsdatum. Die huurder is dus geregtig om in die eiendom aan te bly op dieselfde huurvoorwaardes en teen dieselfde huurbedrag vir die res van die huurtermyn.

Vir sommige kopers is ’n goeie huurder wat reeds in die eiendom woon juis ’n verkooppunt en beleggers is dikwels op soek na sulke soort eiendomme. Die huurkontrak kan nooit opgeskort word nie, tensy daar ’n ooreenkoms tussen die huurder en verkoper of huurder en nuwe koper aangegaan word.

Slegs ’n oortreding van die huurooreenkoms deur die huurder kan tot optrede en moontlike opskorting van die huurkontrak lei, maar dit moet wees soos voorgeskryf deur die huurooreenkoms en wetgewing en kan nie ’n gevolg van die verkoop van die eiendom wees nie.

Die nuwe eienaar sal ook die bestaande huurooreenkoms moet nakom totdat dit verval en kan ook nie die huurbedrag verhoog nie. Die huurder mag egter besluit dat die verkoop ’n goeie geleentheid is om die huurkontrak te kanselleer. In so ’n geval sal die huurder se reg om die huurkontrak te kanselleer bepaal word deur die huurooreenkoms en die wet (hoofsaaklik die Wet op Verbruikersbeskerming).

In sommige gevalle sal die huurooreenkoms ’n klousule bevat wat aan die huurder die opsie bied om die kontrak te kanselleer in die geval waar die eiendom verkoop word. In so ’n geval sal daar geen boetes vir kansellasie deur die huurder betaalbaar wees nie, tensy daar voorsiening daarvoor in die kontrak gemaak word.

Dit is sodat daar geen geskille kan ontstaan aan die einde van die huurkontrak wanneer die deposito terugbetaal moet word nie.

Die huurooreenkoms reguleer ook aspekte soos die vertoon van “te koop”- en “verkoop”-borde asook toegang tot die eiendom deur voornemende kopers tydens skoudae. Sodra die huurtermyn tot ’n einde kom en indien daar nie ’n nuwe huurooreenkoms met die nuwe eienaar aangegaan is nie, moet die huurder die eiendom ontruim.

Enige huurdeposito, tesame met rente, moet deur die oorspronklike eienaar aan die nuwe eiendomseienaar oorgedra word, wat dan in ’n rentedraende rekening belê moet word tot voordeel van die huurder. Verstryk die huurooreenkoms moet die deposito aan die huurder terugbetaal word onderhewig aan die betrokke wetlike regte en verpligtinge soos die herstel van enige skade.

Dit is belangrik dat ’n nuwe inspeksie van die eiendom met die nuwe eienaar onderneem word om seker te maak dat daar ’n ooreenkoms is oor die toestand van die eiendom. Dit is sodat daar geen geskille kan ontstaan aan die einde van die huurkontrak wanneer die deposito terugbetaal moet word nie.

Laastens, as jy in die eiendom wil bly ná die verstryking van die huurkontrak sal jy ’n nuwe ooreenkoms met die nuwe eienaar moet sluit. Dit kan nuwe voorwaardes en moontlik ook ’n hoër maandelikse huur behels. Die nuwe eienaar kan vereis dat die sekuriteitsdeposito aangevul word.

Die Seeff-span sê dat die rol van ’n geloofwaardige verhuringsagent noodsaaklik geword het vir beide verhuurders en huurders om ’n positiewe uitkoms vir alle partye te verseker.

Meer oor:  Huisgids  |  Eiendomme
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Kontak Beeld Kontak ons
Stemme

Hallo, jy moet ingeteken wees of registreer om artikels te lees.