Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Eiendomme
Eiendom en die reg: ‘Goedkoop’ heffings sowaar by tye ‘duurder’

Wanneer voornemende kopers die beskikbare wonings in die mark oorweeg, is daar verskeie faktore wat ’n rol speel om een of twee eiendomme bo die res te laat uitstaan.

Hierdie faktore is normaalweg gesentreer rondom individuele behoeftes en voorkeure, maar daar is sekere algemene faktore wat vir die meeste kopers ’n aanwins in hul boekies beteken.

Een van hierdie faktore is ’n eiendom met lae instandhoudingskostes en uitgawes. Indien die maandelikse heffings van ’n deeltitelskema laer is as dié van soortgelyke naburige skemas, sal die eienaars nie slegs gedurende hul besit ’n finansiële voordeel daaruit trek nie – wanneer dit by die verkoop van die eiendom kom het hulle dalk ook ’n voordeel in die mark teenoor ander deeltitelskemas wat hoër heffings vra.

Die stryd om uitgawes so laag as moontlik te hou is daarom een wat deeltitelskemas se trustees, sowel as die eienaars al te goed ken . . .

Foto: istock
Heffings te laag

Gedurende die laaste paar weke het verskeie deeltiteleienaars navrae aan my gerig waar almal min of meer dieselfde onderliggende probleem het, naamlik: die skema se heffings is te laag om al die onkostes te dek en daar is nou groot instandhoudingsprobleme waarvoor daar nooit voorsiening gemaak is nie.

Die meeste van hierdie navrae wat aan my gerig is spruit voort uit eienaars wat hulself verwittig het van die reëls en wetgewing en vrae begin vra het oor hul onderskeie deeltitelskemas se finansies en bestuur. Hoe fantasties!

Die jammerte is dat die “bestuursagente” (soms ’n vriend van ’n vriend . . .) of trustees, in al hierdie gevalle, nie so opgewonde was soos ek oor hul eienaars se deeltitel-kennis nie, maar besluit het om hulle af te maak as kwaadstokers wat krap waar dit nie jeuk nie.

Die tekortkominge kon dus nie intern opgelos en herstel word nie, maar moet nou met ’n kopstampery gepaardgaan tot hulle besef dat hulle “ongelukkig” nie bo die wet verhewe is nie.

Dié dokumente help

Die Bestuurswet en -reëls is dié belangrikste dokumente wat ‘n trustee of eienaar van kennis moet dra.

Dit is vir my skrikwekkend as ek agterkom hoeveel deeltiteleienaars daar is wat nog nooit een van hierdie dokumente onder oë gehad het nie.

Hierdie wet en reëls het oor dekades spesifiek ontwikkel tot die eindproduk wat dit vandag is. Dit help eienaars om op ’n vreedsame wyse die bestuur en finansiële beplanning van ’n deeltitelskema onder beheer te kry.

Die raamwerk vir die begroting word duidelik uiteengesit, so waarom sal trustees of deeltitel­eienaars steeds besluit om dit te ignoreer en ten alle koste die goedkoopste moontlike heffing te gaan vasstel?

Pasop vir té goedkoop

Ek glo dit is omdat eienaars besef die besit van hul bate is tydelik en voel hulle wil nie geld voorsien vir iets wat eers geïmplimenteer gaan word lank nadat hulle nie meer eiendom in die betrokke skema besit nie.

Die kumulatiewe uitwerking hiervan is dat almal so min as moontlik oor baie jare bydra.

Hierdie deeltitelskema eindig dan in ’n broekskeur-situasie waar die basiese uitgawes nie eers gedek kan word nie. Die administrateurs moet dan uiteindelik inspring en probeer red wat daar te redde is.

Dit mag dalk so wees dat jy as eienaar net tydelik ’n woning in ’n spesifieke deeltitelskema besit en ná ’n paar jaar weer na ’n ander skema trek, maar wat as die eienaars in jou nuwe skema ook sulke toe beursies gehad het?

Dan tref die spesiale heffing jou dalk dáár om ’n dak te herstel wat nooit instand gehou is nie omdat die skema se heffings ten alle koste laag moes bly . . .

Laaste sê

Moet grondeienaars maar nie oor die algemeen liewer die eiendomsmark as hul “bate” beskou nie en besef dat ons almal beter af is en bevoordeel word deur skemas wat doeltreffend in stand gehou en bestuur word?

Deeltiteleienaars moet begin besef dat redelike en beredeneerde heffingbydraes wel tot hul indirekte voordeel is – al is jy nie eendag meer daar om die nuwe hek waarvoor almal nou spaar te waardeer nie. Jy moet eerder hoop dat jy nie in jou volgende deeltitelskema jou aftreefonds sal moet aanwend om vir ’n ander ou se nalatigheid in te staan nie.

Ek stem saam daarmee dat lae kostes absoluut ’n voordeel vir eiendomseienaars inhou.

Trustees moet werklik hul bes doen om heffings so laag as moontlik te hou, maar hou tog binne die raamwerk wat deur die Bestuurswet en -reëls daargestel word omdat dit voorsiening vir die toekoms maak. Ál is dit dalk uiteindelik tot ’n ander deeltiteleienaar se voordeel . . .

  • Jou kontak: Malan is ’n prokureur verbonde aan die firma Du Plessis Hofmeyr Malan Ing. in Somerset-Wes. Vir enige eiendomsverwante navrae, regsadvies of inligting oor kursusse, kontak Malan deur ’n e-pos na info@dhmlaw.co.za te stuur of die kantoor by 021 851 0359 te bel. Belangstellendes kan ook die webwerf by www.dhmlaw.co.za vir meer besoek.
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Kontak Die Burger Kontak ons
Stemme

Hallo, jy moet ingeteken wees of registreer om artikels te lees.