Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Nuus
‘Jy moes vooraf gevra het’

Wat het geword van die vriendelike klantediens wat die geoliede masjien van ’n sakeonderneming aan die gang hou?

Dit is die vraag waarmee ek weereens worstel ná nog ’n onaangename ervaring van swak dienslewering – iets waaraan ek ’n kleintjie dood het.

By twee afsonderlike geleent­hede is ek stomgeslaan deur die gebrek aan diens – want slegte diens sou dit heeltemal te sagkens stel – by ’n plaaslike viswinkel.

Met geen lus om voor die stoof te staan nie, het ek een Donderdagmiddag met baie oortuiging daarin geslaag om my gesin te laat instem tot ’n heerlike stukkie vars vis en tjips vir aandete. Ek het sommer ná werk by die winkel inge­loer en ’n parcel stokvis en tjips by die toonbank bestel. Ek is deur die kassiere, en wie geblyk het die bestuur­der te wees, net een vraag gevra: “Salt and vinegar?” en ek het baie beleefd gesê: “Please”.

En so het ek geduldig tussen ander vir my pakkie gewag totdat my nommer uit­geroep is en ek agtergekom het dat een van die winkelassistente besig was om my vis-en-skyfies in ’n polisti­reen­houer te plaas. Ek haar vinnig gena­der en hoflik gevra of sy asseblief my bestelling in papier kan toedraai – nie dat dit enige verduideliking verg nie, maar uit ervaring het ek gevind dat kos wanneer dit warm in dié houers geplaas word, dikwels na die verpakking smaak. Die ongevraagde reaksie, en dit in die teen­woordigheid van ’n bestuurder, was ontstellend. Sy het stip na my gekyk en nie ’n woord geuiter nie. Sy het na haar kollegas gedraai en terwyl ek toekyk die kwessie met hulle bespreek. Hierna het die sowat vier vroue almal na my gestaar totdat ek gevra het of daar ’n probleem is. Steeds niks. Die bestuurder het later nader gestaan, maar ook niks gesê of gedoen om die situasie te help nie. Ek het hom toe genader en gevra: “Is there a problem?”. Sy antwoord: “No, but for fish and chips to be wrapped in paper, it must be requested with order.”

Ter verdediging moet ek byvoeg dat in al die jare wat ek by ’n viswinkel ’n parcel bestel het, dit nog nooit nodig was om te versoek dat die vis en tjips in papier toegedraai moet word nie. Dit is dan ’n parcel. As dit dan wel versoek moet word, moet dit aan klante verdui­delik word. Met die besluit om nie ’n berg van ’n molshoop te maak nie, het ek die viswinkel verlaat.

Ek het die volgende dag weer by die vis­win­kel ingeloer vir ’n parcel. Hierdie keer het ek seker gemaak om met die bestelling te vra dat die vis en tjips in papier toegedraai moet word. Kort ná die versoek, het dieselfde vroue wat toe ook aan diens was, heel sarkasties gesê: “Hoor nou, vra nogal vir papier.”

Net daar het ek, wat dié viswinkel sedert kindsbeen af saam met my ouers besoek en as klant steeds ondersteun, my respek vir die plek, sy eienaars en die personeel verloor, en dit weens die slegte houding van mense in posisies wat puik klantediens verg.

Ja, sulke voorvalle van swak diens­ het ’n negatiewe invloed op enige sakeonder­neming, maar beïnvloed ook jou geloof in jou medemens en die toekomstige rol van dienslewering in die samelewing.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Kontak DistriksPos Kontak ons
Stemme

Hallo, jy moet ingeteken wees of registreer om artikels te lees.