Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Nuus
Seun skenk lewe aan sy ma – met ’n nier

’n Jong man van Mount Pleasant is van plan om aan sy ma, wat ernstig siek is, ’n nier te skenk.

Ruan Poole (24) moet nog ’n string toetse ondergaan voordat die nieroor­plantingoperasie kan geskied.

Sy ma, Bronwyn Poole, wat vir lank as finansiële en administratiewe klerk by CapeNature in Hermanus gewerk het, was nog altyd ’n gesonde vrou totdat sy in Junie 2015 begin swel het.

“Ek het ’n dokter besoek, waar verdere toetse gedoen is en ek moes verneem dat daar fout is met my niere,” het sy vertel.

“Daardie selfde middag – 12 Junie 2015 – toe ek hoor iets is nie reg nie, moes ek summier Worcester-hospitaal toe waar nog toetse gedoen moes word.”

Sy sê voorts dit is waar sy die nuus ontvang het dat albei haar niere nie meer werk nie.

Bronwyn is na die Tygerberg-hospitaal oorgeplaas waar dokters die lang pad wat sy sou moes loop, aan haar verduidelik het. “Die dokters het voorlopig ’n pyp in my maag geplaas wat die funksie van my niere moes oorneem.” Sy moes haarself elke vier ure dialiseer en as gevolg van haar swak gesondheid moes sy haar werk staak.

Die eens fris, maar nou tenger, vrou sê sy was van Julie 2015 af tot nou op peritoneale dialise (vier ure lank) totdat sy vroeër vanjaar erge infeksie as gevolg van die pyp in haar maag gekry het. “Ek is toe op hemodialise (kateter in die nek) oorgeskakel en moes ook die dialisemasjien by Tygerberg-hospitaal gebruik.”

Bronwyn moet nou drie dae per week dialise ondergaan. Sy moet elke oggend drie-uur opstaan om betyds by die Worcester-hospitaal vir haar behandeling te wees.

Sy het van Maart af al vier operasies ondergaan omdat die kateters nie wou werk nie.

“Die laaste kateter (die een wat sy nou het) het darem gewerk en ek het ook vier weke gelede ’n nuwe, veiliger kateter gekry.”

Bronwyn het ook twee dogters, maar hulle kwalifiseer nie as skenker nie omdat die een swanger is en die ander nog te jonk is. Ruan is dus al kind wat as skenker kwalifiseer.

“Hy het dadelik ingestem nadat die nuus dat hy moontlik my lewe kan red, met hom gedeel is,” sê dié ma trots.

“Wat my kanse nog beter laat lyk, is dat ek en Ruan dieselde bloedgroep het. Al sy toetse tot dusver lyk positief.”

Bronwyn werk al drie jaar nie meer nie en kry ’n ongeskiktheidstoelaag van R340.

Sy sê as die nieroorplanting voortgaan, sal dit ’n aardige bedrag kos.

Enigiemand wat geld vir die operasie wil skenk, kan Bronwyn by 082 435 8065 bel.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Kontak Hermanus Times Kontak ons
Stemme

Hallo, jy moet ingeteken wees of registreer om artikels te lees.