Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Nuus
Antoinette Pienaar: ‘ ’n Mens word met ’n pad gebore’
Daniel Hugo, Antoinette Pienaar en oom Johannes Willemse. Foto: Marlene Malan

Dis al 17 jaar dat Antoinette Pienaar die natuur-pad saam met oom Johannes Willemse stap. Nie net om die geheimenisse van kruie te ontdek nie, maar ook om te leer hoe om stilte en afsondering te omarm.

Antoinette en oom Johannes het Donderdag hul boek Die lang man sonder skaduwee bekend gestel by die KKNK-Boekgesprek­reeks, onder leiding van Daniel Hugo. Van dié boek het Hugo gesê: “Dis die beste boek wat ek vanjaar gelees het.”

Antoinette is nie verbaas oor die Karoo-pad wat sy op 41 begin loop het nie, “want ’n mens word met ’n pad gebore”. En oom Johannes (87) is nóg minder verbaas oor die vrou wat by hom oor “bossies” kom leer het, “want jare gelede het ek ’n ge­siente gehad dat so ’n vrou op Tierfontein sou opdaag aan wie ek my kennis moet gee”.

“Toe ek die eerste keer na Tierfontein se volmaan gekyk het, was daar ’n begeerte in my om oor die natuur te weet. Hier het ek geleer dis die kruie van jou streek wat die kruie is wat jou gesond maak.”

Maar die Karoo-lewe by Beaufort-Wes se kant het ook gesorg dat sy ’n ánder droom kon verwesenlik, “en dis om ’n trop honde te hê, sodat ek kon sien hoe mý trop werk. My vyftien windhonde het ’n bepaalde soort energie. Toe die leier laas Oktober dood is, was my skouers geboë, en die groep was rigtingloos, omdat hulle nie geweet het hoe die hiërargie nou werk nie. Toe, eendag, kom enetjie by my, die nuwe leier, en sê vir my: ‘Lig op jou kop’. Diere leer jou om jou eie binnelandskap beter te verstaan.”

Oom Johannes vertel elke mens het ’n boompie in die hart. “Jy moet elke dag stil word en onder die boompie gaan sit. Jy moet jou boompie water gee, jou trane . . . maar dit hoef nie hartseertrane te wees nie. En so vind jy die fontein binne-in jou. Solank jy net sorg dat jou boompie vrugte dra.”

Op hul staptogte tussen die Karoo-bossies het die twee die krag van raaisels ontdek. “As ons moeg word van die stappery, sê ons raaisels op, om en om gaan dit in jou kop,” sê Antoinette.

“Die Here het vir jou ’n ronde kop gegee, sodat die raaisel daarbinne kan draai. Dan kom jou gedagtes los. As jou lewe vol sukkel is, dan help ’n raaisel jou. Ek gee soms vir Antoinette ’n raaisel om op te los, al vat dit haar maande: Soos . . . my pa skiet ’n patrys, en die hele huis hang vol vleis . . . Of wie is die lang man sonder skaduwee?”

In die stilte van die landskap het Antoinette ontdek genesing vir die liggaam lê in kruie. Maar daar is ook krag vir haar in oom Johannes se wysheid, in haar diere, in sy rympies en raaisels, in lag en huil, en om ure lank alleen te sit en skryf.

Meer oor:  Karoo  |  Oudtshoorn  |  Kknk  |  Boekgesprekke  |  Vermaak  |  Boeke  |  Kunstefees  |  Krit
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Kontak Krit Kontak ons
Stemme

Hallo, jy moet ingeteken wees of registreer om artikels te lees.