Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Nuus
Seun se ontdekking van talent lewensveranderend

’n Tienerjarige seun van Jan Kempdorp het omtrent ’n jaar gelede die sportsoort skopboks ontdek toe hy probeer het om gewig te verloor en sy liggaamsbou te verbeter.

Skaars ’n jaar later het Brandon Steyn (14), ’n gr. 8 leerling aan die Hoërskool Vaalharts, provinsiale kleure en Suid-Afrikaanse kleure in die sport verwerf.

“Brandon was op laerskool effens mollig. Hy het stut vir die skool se rugbyspan gespeel en het so net by die 70 kg geweeg,” sê Brandon se pa, Anton.

“Brandon het moeg geword dat kinders hom spot en het toe met skopboks begin as ’n manier om gewig te verloor.”

Die vegkuns, wat soortgelyk aan boks is, maar waarin die vuiste én bene gebruik mag word, bied volgens Anton uitstekende aërobiese oefening en kan ’n mens help om te verslank.

“In die eerste vier tot vyf maande het hy omtrent 15 kg verloor,” sê Anton.

Volgens Anton was daar wel terugslae, soos toe Brandon in ’n oefensessie vroeër vanjaar harsingskudding opgedoen het. Hy moes gevolglik vir drie maande skopboks opsy skuif totdat hy herstel het.

In Augustus het hy sy besonderse talent vir skopboks besef toe hy aan die Noord-Kaapse skopboks­toernooi in Kathu deelgeneem het. Hier het hy twee goue medaljes ontvang en ook provin­siale kleure verwerf.

Kort ná sy sukses in die Noord-Kaapse toernooi het Brandon op 29 en 30 September aan die Destiny-skopbokstoernooi in Stellenbosch deelgeneem, waar hy een goue medalje (volgehoue geveg) en een silwermedalje (volle kontak) gewen het.

Brandon word nou deur Sakkie Lessing van Lessing Mixed Martial Arts in Kimberley afgerig.

“My seun beoefen skaars ’n jaar lank skopboks en het reeds baie bereik. Kan jy dink hoe goed hy kan wees as hy behoorlik oefen?” meen die trotse Anton.

Volgens Anton wou Brandon in Februarie aan die Destiny-skopbokstoernooi in die VSA deelneem, maar aangesien dit ongeveer R70 000 sou kos en daar geen bystand vir atlete is nie, moes hulle eers Brandon se droom om eendag op internasionale vlak mee te ding, uitstel.

“Vir ’n ouer wat moes toekyk hoe ander kinders op my seun gepik het en hom afgekraak het, was dit vir my wonderlik om te sien watter verandering hy ondergaan het.

“Ek wil graag ouers aanmoedig om hul kinders by skopboks betrokke te kry – nie om hulle in vegters te verander nie. Maar die verskil wat dit aan ’n kind se selfbeeld kan maak is net ongelooflik,” sê Anton.

Ek wil graag ouers aanmoedig om hul kinders by skopboks betrokke te kry - nie om hulle in vegters te verander nie. Maar die verskil wat dit aan ’n kind se selfbeeld kan maak is net ongelooflik

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Kontak Noordkaap Kontak ons
Stemme

Hallo, jy moet ingeteken wees of registreer om artikels te lees.