Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Nuus
W’tonners skryf eisteddfodbundel

Twee Wellingtonners, Jaomi Zeeman en Engela Duvenage, is lid van ’n span van 18 skrywers wat saamge­werk het aan ’n bundel vol nuwe verse, twee­spra­ke en monoloë wat in die kraal is van die­ge­ne wat reeds weer lus het om ’n eisteddfod of skoolkonsert aan te pak.

Eisteddfodpret 2 het vroeër vanjaar verskyn en is weer eens deur die Fynbosskrywers-groep saamgestel en deur Human & Rousseau gepubliseer. Dit is ’n opvolg op Eistedffodpret 1, wat ’n voorverkoper was nadat dit in 2018 verskyn het.

Zeeman, ’n oudjoernalis, is ’n onderwyseres by Hugenote Laerskool. Sy het veral ’n slag met die skryf van humoristiese stukke. Haar drie dogters het al oor die jare heelwat van hul ma se stukke met cum laude-sukses by plaaslike eisteddfods voorgedra of opgevoer. Onder Zeeman se bydraes tel gedigte soos “My gunstelingdis” “My sussie” en “Goue medalje”.

Onder Duvenage, ’n vryskutjoernalis, se bydraes tel ’n samespraak “Soggens op die snelweg” en die monoloë “Wat ’n vakansie!” en “YouTube-oomblikke”, waaraan haar oudste dogter, Elena, help skryf het.

Die nuwe bundel bevat ’n versameling van 108 oorspronklike gedigte, 24 monoloë en 20 samesprake en is veral gemik op laerskoolleerders.

Die boek is deur Jonelle du Toit en Gloudine Kellerman saamgestel. Van die ander skrywers wat daaraan gewerk het, is Esta Steyn, Hanlie de Wet, Nellie Alberts, Louise Lachenicht, Marlene Smit, Nelia van Zyl, Pieter Botes, Rina Cilliers, Santie Nel, Eleanor Botes, Mickey Rautenbach, Mariana Gerber, Christine Moritz en Johanna Lourens. Die boek is deur Tumi K. Steyn geïllustreer.

Die bundel word voorafgegaan met handige riglyne deur Lachenicht, ’n bekende in eisteddfod-kringe in Gauteng en voorsitter van die raad van Afrikaanse beoordelaars, waarin sy geheime aan ouers en afrigters verklap oor die basiese beginsels agter gedramatiseerde voordrag.

“Soos die eerste bundel, is Eisteddfod-pret 2 gebore uit die noodkreet van ouers, onderwysers en leerders wat nuwe, geskikte materiaal vir eisteddfods in Afrikaans soek. Dis ’n wonderlike hulpbron vir diegene wat jaarliks hoog en laag moet soek na nuwe materiaal,” vertel Jonelle du Toit, een van die samestellers.

“Dié twee bundels is die enigste in hul soort in Afrikaans vir laerskoolleerders en lewer ’n bydrae om leerders die geleentheid te gee om hul talente te ontwikkel. Die kunste behoort ’n belangrike deel van enige kind se opvoeding te wees; dit ontwikkel leerders se potensiaal ten volle en bou brûe tussen gemeenskappe,” het sy gesê.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Kontak Paarl Post Kontak ons
Stemme

Hallo, jy moet ingeteken wees of registreer om artikels te lees.