Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Stronk
Beeldskone teks maak Kellermann móég
Antoinette Kellermann sê ofskoon Karel Schoeman se taalgebruik van Hierdie lewe moeilik is, is die teks beeldskoon.Foto: Conrad Bornman

Karel Schoeman maak haar moeg, sy taalgebruik is moeilik, maar, sê Antoinette Kellermann, die teks van Hierdie lewe is beeldskoon.

Dié gevierde aktrise speel op die Vrystaat Kunstefees in die gelyknamige solostuk van dié Hertzog-bekroonde roman.

Dis deur Saartjie Botha vir die verhoog verwerk om eer te betoon aan Schoeman, een van die grootste Afrikaanse literêre geeste, wat in 2017 dood is.

“Ek en my man het by die huis ’n versameling van sy (Schoeman se) boeke. Ons albei is gek oor sy historiese werk. My man sal deur ál sy boeke wroeg, ek nie. Karel maak ’n mens móég,” beklemtoon Kellermann die woord.

“Toe ek hoor daar is ’n moontlikheid dat ek hierdie rol gaan speel, het ek Hierdie lewe gelees en ek kón dit nie neersit nie. Jy raak só betrokke by die karakters in die werk.”

Kellerman speel ’n vrou in haar 70’s wat wag om dood te gaan en deur die herinnerings van haar onvervulde lewe gaan.

“Dis die herinneringe wat haar aan die gang hou. Sy het gedien en binne daai raamwerk van beperkinge geleef; ‘altyd in die hoek, aan die rand van ander mense se lewens, altyd besig om te kyk en te luister en te dispuut’,” haal Kellermann uit die teks aan.

Ek en my man het by die huis ’n versameling van sy (Schoeman se) boeke. Ons albei is gek oor sy historiese werk. My man sal deur ál sy boeke wroeg, ek nie. Karel maak ’n mens móég.

Kellermann is vir haar spel in Hierdie lewe deur die KKNK met ’n Kanna-prys as beste aktrise vereer.

Volgens haar is dit die moeilikste van die vier solovertonings van haar loopbaan.

“As jy as speler ’n solovertoning doen, kyk jy wat kan jy doen om ’n karakter te skep, want daar moet ’n karakter of ’n dramatiese monoloog wees. Maar hierdie is nie ’n dramatiese monoloog nie, daar gebeur niks (op die verhoog nie), die verhoog is kaal en eenvoudig. Jy het niks, geen tonele om aan te haak of karakters om aan te skep nie.

“Die taalgebruik is nie maklik nie, dis nie dialoogteks nie, dis literêre teks. Hy het ’n manier om sinne aanmekaar te string sonder leestekens. Ek het op die Woordfees by ’n praatjie ’n kort videogreep van hom gesien. Die manier hoe hy praat, is hoe hy skryf ook.”

Volgens die aktrise, wat in die laat 1970’s en vroeë 1980’s vir die destydse Streeksraad vir die Uitvoerende Kunste van die Oranje-Vrystaat (Sukovs) in Bloemfontein gespeel het, is Schoeman se beskrywings uiters fyn.

“Veral sy natuurbeskrywings trek jou in. Ons moes baie fyn kies wat die natuur se invloed in die stuk is, want dit speel ’n verskriklike belangrike rol. Sy (die vrou in die werk) het in die Karoo grootgeword en beskryf dit as ’n arm land, bitter land, dierbare land.”

  • Hierdie lewe is Vrydag om 16:30 en Saterdag om 13:30 in die André Huguenet-teater te sien.
Meer oor:  Karel Schoeman  |  Bloemfontein  |  Vrystaat Kunstefees  |  Feeste  |  Stronk  |  Drama  |  Vermaak
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Kontak Stronk Kontak ons
Stemme

Hallo, jy moet ingeteken wees of registreer om artikels te lees.