Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
UD-Express
Hond ná 21 dae veilig terug
Leeva (agter) was vir 21 dae vermis, maar is verlede Donderdag op die Uitenhage gholfbaan gevind. Hier is hy nou weer veilig by sy hondevriend Luca. Foto: VERSKAF

LEEVA en Luca, twee onafskeidbare honde op Uitenhage, is na 21 dae uit-eindelik weer bymekaar nadat die verlore Leeva danksy inwoners se oplettendheid, die gholfklub-bestuurder se besorgdheid en DBV se hulp gevind is.

“Dit is ongelooflik. Ons het nooit gedink dat soveel ander mense ook vir diere omgee nie.

Ons het baie oproepe gekry en oral waar ons gaan, vra mense ‘het julle al die hond gekry?’. Daar is nou nog mense wat bel en sê hulle het ‘n hond wat soos Leeva lyk, sien rondloop,” sê Cobie Erasmus, mensemaat van Leeva en Luca.

“Baie, baie dankie aan almal wat saam gehelp soek het en ook aan Morris Olivier wat vir Leeva daar op die gholfbaan gesorg het. Ons waardeer dit ongelooflik baie, ons harte juig van dankbaarheid.”

Op 15 Mei het Cobie en Rassie Erasmus van Amandastraat in Van Riebeeckhoogte, se twee reuns per ongeluk by die hek uitgekom en die pad gevat.

“Toe die egpaar agterkom hulle is weg, het hulle dadelik begin soek en oral in die woonbuurt plakkate opgesit. Hulle het ook ’n kennisgewing op sosiale media geplaas. Luca is dieselfde middag naby Laerskool Albertyn gekry, maar Leeva, wat soos ‘n Australiese dingo-wildehond lyk, was skoonveld.

Verlede Donderdag het die Erasmusse ‘n blye oproep vanaf die Uitenhage Dierebeskermingsvereniging gekry dat Leeva deur Morris Olivier, bestuurder van die Uitenhage Gholfklub, by hulle aangemeld is. Hy het die “rondloperhond” al ses dae vantevore op die gholfbaan gesien rondloop en opgelet dat hy baie maer is.

“Dit is ‘n fantastiese hond met die mooiste maniere. Hy het daar by gat een en sewe oorkant Willowdam by die water gebly,” se Morris.

“Ek het die DBV gebel en gesê daar is ‘n hond wat daar rondloop. Hy was baie maer en ek het elke dag vir hom kos gevat. Ons het in die paar dae groot vriende geword.”

Rassie sê alhoewel Leeva baie maer geword het, is hy op-en-wakker en vreet nou vir ‘n vale.

“Sy pote was baie seer, veral die een agterpoot bly hy nog steeds optel. Dat hy vir drie weke oorleef het, is ‘n wonderwerk. Ons noem hom sommer nou Survivor!

Nadat Rassie die hond by die DBV gaan haal het, is hy reguit veearts toe waar Leeva die nodige behandelings gekry het om sy gestel weer op te kikker.

Cobie sê Leeva en Luca was “skoon mal toe hulle mekaar weer sien. Hulle het omtrent gehardloop en gespeel. Dit was so lekker om te sien hoe bly hulle ook was om weer bymekaar te wees.

“Maar kyk, al wat ‘n hek is, is nou behoorlik op slot.

“Ons maak seker dat so ‘n glips met ‘n oop hek nooit ooit weer op hierdie erf sal gebeur nie.”

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Kontak UD Express Kontak ons
Stemme

Hallo, jy moet ingeteken wees of registreer om artikels te lees.