Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Nuus
Grey weier om teen Worcester te speel

Gebeure van drie jaar gelede het blykbaar daartoe gelei dat die hoofwedstryd tussen die o.13A-spanne van Grey Kollege (primêr) en die Primêre Skool Worcester by die afgelope Wildeklawer-toernooi in Kimberley afgelas is.

Bewerings is destyds gemaak dat die Worcester-seuns glo te oud was en van die Vrystaters in die wedstryd erg beseer is.

Grey se skoolhoof en afrigter, Jurie Geldenhuys, het in ’n brief aan die ouers die redes vir dié stap gegee.

“Volgens die wedstryd­bepalings vir vanjaar se toer­nooi was ons o.13-span aanvanklik geloot om in die tweede ronde teen Worcester Primêr kragte te meet.

“Ons het in ’n e-pos aan die skoolhoof gesê ons het ’n beginselprobleem om teen Worcester Primêr te speel. Die bepaling is toe vir die aan­vanklike rondes verander.”

Worcester se voorsitter van die beheerliggaam, Chris O’Neill, sê hulle het nooit self amptelik van Grey Kollege gehoor waarom hulle nie teen die Bolanders wou speel nie, maar net dat die wedstryd afgelas is. Geldenhuys stel dit in sy brief sy span van 2015, met spelers van so jonk as 11 jaar oud, het teen spelers van Worcester van tot 14 jaar oud gespeel.

“Die gevolg was drie Grey-seuns is op draagbare van die veld geneem en het in die hospitaal beland. Nóg drie seuns is met ernstige beserings van die veld af,” lui Geldenhuys se brief.

Hy sê ná die wedstryd het hy die hoof van die Laerskool Newton in Kimberley, die organiseerders van dié toernooi, in kennis gestel dat hulle nie weer teen Worcester Primêr sal speel nie.

O’Neill sê die afgelope vyf jaar wat hulle aan die toernooi deelneem, was nie een van hul spelers te oud nie. Niemand het ook ooit daaroor gekla nie.

Geldenhuys sê al het hy die organiseerders oor die gebeure op die toernooi van drie jaar gelede ingelig, is Grey weer teen Worcester Primêr geloot.

Geldenhuys sê hy is gevra om sy besluit te heroorweeg, maar hy het by sy beginsel­besluit gehou, “wat ek ook só gekommunikeer het”.

“Ons as afrigters en ek as skoolhoof is vir die seuns se veiligheid verantwoordelik. Dit is ’n beginsel- én ’n veiligheidsbesluit. Ons tree in die belang van ons seuns op en stel hul veiligheid eerste.”

- Netwerk24

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Kontak Worcester Standard Kontak ons
Stemme

Hallo, jy moet ingeteken wees of registreer om artikels te lees.