Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Nuus
Siggestremdes ontdek prag van tuin

Die Pionierskool vir siggestremdes se multisensoriese tuin is verlede Donderdag, net soos dit hoort, amptelik met die slaan van ’n ghong geopen.

Die gedagte om ’n multisensoriese tuin te skep waar blindes ’n tuin kan geniet, het reeds in 2016 ontstaan.

Vanjaar het Pionierskool en die Hoërskool Brackenfell vir die ATKV se Handevatprojek ingeskryf en dit is hier waar die multisensoriese tuin die hart van die projek geword het.

“Vir ’n taalonderwyser is dit die perfekte geleentheid om ’n woordanalise te doen wanneer leerders vra hoekom die tuin multisensories genoem word. Dan verduidelik ek dat ‘multi’ na baie verwys en ‘sensories’ na sintuie,” sê dr. Suna Verhoef, ’n Engels-onderwyser by Pionierskool.

Die bakke wat jare gelede gebou is, was oorspronklik om ’n kruietuin van die ruimte te maak, maar dié idee is gekelder, voeg sy by.

Volgens Verhoef het die tuin in 2017 soos ’n hartseer prentjie gelyk met bakke wat oorgroei was met gras, grondvoetpaadjies en ’n stukkende bankie. Maar nou lyk dit heeltemal anders.

’n Mens kan in enige tuin voel of ruik, maar in ’n multisensoriese tuin word voorsiening gemaak sodat ’n besoeker al sy of haar sintuie optimaal kan benut.

In die nuwe tuin is plante wat spesiaal gekies is om aan te raak en te ruik, en paadjies is van verskillende teksture soos kunsgras, boombas, klippe en sand gemaak.

Die tuin het ook instrumente wat leerders of besoekers kan gebruik om musiek mee te maak. Aan sommige bome hang windklokke, gemaak uit onder meer hout en messe en vurke. Mense kan selfs na gedigte in die tuin kom sit en luister.

Botaniese inligting is oral in braille aangebring. Die mure om die tuin pronk met prente wat Afrikaans.com gemaak het van idiome wat met klanke te doen het.

Prof. Franci Greyling en die Byderhandspan van die Noordwes- Universiteit in Potchefstroom het ’n digitale aspek tot die projek gelewer met tuinverse wat deur selfone speel deur ’n QR-kode te skandeer. Dit laat besoekers hul gehoorsintuie inspan.

Digters soos William Rowland asook van die Pionierskool se leerders en oudleerders is gevra om ’n bydrae tot die projek te lewer. Die kodes van die gedigte en stories is in die tuin en elders op die skoolterrein aangebring en besoekers kan op ’n spesifieke plek na gedigte en stories oor die plek luister.

“Ons bars van trots. Dit is ’n gevoel van bemagtiging vir siggestremdes van ons skool en Worcester. Dit sê: ‘Dit is ons plek; ons stories. Ons hoort hier; dit is ons s’n’,” sê Verhoef.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Kontak Worcester Standard Kontak ons
Stemme

Hallo, jy moet ingeteken wees of registreer om artikels te lees.