Ons weet hoe moeilik dit is om by oefening uit te kom wanneer daar ’n nuwe baba in die huis is. Daar is so baie dinge wat in jou pad staan: gebrek aan tyd, ’n roetine wat nog nie wil vlot nie, klere wat nie lekker pas nie, ongemak in jou lyf en angs oor hoe veilig dit is om in die tyd van die pandemie onnodig met of sonder jou baba uit te gaan.

Jy’s waarskynlik moeg ook en die kans is goed dat jy nie wonderlik slaap nie. Hopelik kan ons rustige jogalessie jou help om aan die beweeg te kom en ook sommer lekker met jou baba te speel. Die voordele vir jou van ’n gereelde sessie op die mat is dat dit jou help om jou lyf weer jou eie te maak en ook om emo­sioneel meer gebalanseerd te voel. Vir jou baba help dit om groter liggaamsbewustheid te ontwikkel en die speeltyd is vir julle albei spesiale bindingstyd.

Enige ma en baba kan joga van ses weke ná die geboorte af aanpak. As jy ’n keisersnee gehad het, moet jy egter eers seker maak jou ginekoloog stem saam dat jy weer kan begin oefen.

As jy gereed is om sterker en meer soepel te word, van spanning in jou rug en skouers ontslae wil raak, meer energie wil kry en ook van jou stres en angs wil laat gaan, is baba-joga vir jou!

Julle het baie min nodig: net ’n oefenmat of ’n sagte vloer in die huis en gemaklike klere. Sit sowat 20 minute tot ’n halfuur opsy, sit rustige musiek op en begin…

Vlieënde baba

Plaas baba se lyfie teen jou voetsole. Hou haar hande vas en maak oogkontak. Begin dan jou bene reguit maak om jou baba op te lig.

  • Hierdie posisie maak jou kernspiere en bene sterk, bevorder limfdreinering en is goed vir jou bloedsomloop.

Vegter

Gee met jou linkerbeen ’n tree vorentoe en draaijou regtervoet effens uitwaarts. Buig jou linkerknie, maar hou jou linker- en regterheup in ’n reguit lyn en probeer hulle so plaas dat albei heupe vorentoe wys. Maak seker die buitenste rand van jou regtervoet is ferm met die mat in aanraking en hou jou regterbeen lank en sterk. Trek jou maag in en asem in terwyl jy jou baba oplig. Probeer om jou skouers nie op te trek nie. Herhaal aan albei kante.

  • Die vegterposisie maak jou bene en heupe sterk, verbeter jou balans en maak jou arms sterk.

Brug

Plaas jou baba op jou bobene met haar gesig na jou toe. Bring jou voete nader aan jou sitvlak. Jou voete moet sowat 20 cm uitmekaar wees. Lê terug. Druk jou voete ferm teen die mat. Verbeel jou jy hou ’n bal tussen jou knieë vas. Asem in en lig jou heupe en jou baba op. Lig jou ribbekas ook in die rigting van jou ken op. Skuifel jou skouerblaaie nader aan mekaar, druk jou handpalms ferm in die mat in en kyk of jy jou ribbekas nog ’n bietjie hoër kan lig. Asem uit terwyl jy stadig weer afsak.

  • Die brugposisie maak jou bene en heupe sterk, masseer jou rug en strek jou borug en bors.

Boot

Lê op jou rug met jou bene 90 grade gebuig.Lig jou skouers van die mat af op en trek jou maag in. Hou jou baba oor jou skene met haar gesig na jou toe. Hou haar handjies vas.

  • Hierdie posisie maak jou maagspiere en jou baba se rugspiere sterk.

Hond

Laat jou baba op haar ruggie op die mat lê en plaas jou hande aan weerskante van haar. Staan handeviervoet oor haar met jou knieë reg onder jou heupe, jou hande effens voor jou skouers en jou voete sowat 20 cm uitmekaar. Krul jou tone na binne. Lig jou heupe op en jou sitvlak na die dak terwyl jy uitasem. Probeer jou voetsole dan plat op die mat kry en jou borskas terug in die rigting van jou bo­bene beweeg. Hou jou handpalms met gespreide vingers plat op die mat.

  • Dié posisie strek die dy- en kuitspiere en skouers, maak jou bobene sterk en laat jou gemoed bedaar.

Kind

Plaas jou baba op haar ruggie op die mat. Kniel langs haar. Laat jou groottone aan mekaar raak. Sit terug op jou hakke. Drapeer dan jou bolyf oor jou bobene en plaas jou voorkop teen die grond by jou baba se gesiggie. Jou knieë kan effens uitmekaar uit wees. Jou arms is aan weerskante van jou bene, of jy kan hulle voor jou uitstrek. Voel hoe jy tussen jou skouerblaaie ontspan namate jy jou rug breed maak.

  • Hierdie posisie strek die heupe, bobene en enkels sagkens en laat jou gemoed bedaar.

Swaai baba

Kniel met ’n gemaklik afstand tussen jou knieë. Jou tone wys na agter en die bokant van jou voete druk ferm op die mat. Laat jou baba voor jou sit sodat haar voetsole aanmekaar raak. Hou haar onderbene dan ferm in elke hand vas en gebruik jou voorarms vir stabiliteit om haar lyfie. Lig haar op. Beweeg in ritme met jou asemhaling en swaai haar met beheer heen en weer.

  • Hierdie oefening maak jou arms en kernspiere sterk. Jou baba sal die wiegbeweging baie geniet. Dis goed vir haar ruimtelike bewustheid. Wag tot jou baba ’n redelike mate van kopbeheer het voordat jy hierdie oefening aanpak.