Getty Images

Teen omtrent nege maande oud – dit kan ’n bietjie vroeër of ’n bietjie later ook wees – begin jou baba verstaan dat jy en sy twee afsonderlike wesens is, en dat jy soms nie teenwoordig is nie. Jou baba leef in die oomblik en het geen begrip van die verlede of die toekoms nie, daarom voel dit vir haar asof jy haar verlaat elke keer wanneer jy uit die vertrek gaan, al was jy net ’n paar minute lank weg.

Dis vir haar baie onstellend. Jý weet natuurlik goed jy kom terug, maar daarvan verstaan jou baba nog niks. Wanneer sy jou nie kan sien nie, voel dit vir haar of jy skielik nie bestaan nie. Dit maak haar bang en angstig. Moet dus glad nie sleg voel as jou baba aan jou klou nie. Dis ’n teken dat jy en sy goed gebind het, en dat jou koestering vir haar die belangrikste ding op aarde is. Dit beteken ook dat haar instink reg is en dat haar intellektuele ontwikkeling op dreef is. Help haar met groot empatie en geduld om haar vrees geleidelik te oorkom, en so neem julle saam die eerste klein treetjie na onafhanklikheid.

Het jy geweet? Selfs ’n kind wat meestal goed slaap, kan in hierdie tyd in ’n nagduiweltjie ontaard. Dis omdat haar behoefte aan jou gerusstellende teenwoordigheid groter en dringender is. Hanteer haar met liefde en groot geduld. Onthou, dis net ’n stadium en sal ook verbygaan.

Stap 1: Stel ’n roetine in

As julle elke dag dieselfde roetine volg, sal jou baba geleidelik leer dat spesifieke dinge in ’n spesifieke volgorde plaasvind. Die voorspelbaarheid van ’n roetine wat oor en oor herhaal word, laat jou baba veilig voel en is ’n groot bron van troos.

Stap 2: Gee gerus ’n troosvoorwerp

Jou baba kan troos vind deur altyd ’n bekende, geliefde voorwerp byderhand te hê, soos ’n kombersie of ’n speelding wat van kleintyd af altyd in haar kot was en oral saamgaan.

Stap 3: Wen haar vertroue

Oefen gereeld om die kamer vir baie kort rukkies te verlaat. Aanvanklik sal dit dalk net vir 10 sekondes wees. Probeer om terug te keer voor sy ontsteld raak. As jy dit elke dag saam met haar oefen, sal die rukke wat jy uit die kamer kan wees sonder dat sy huil, langer en langer word.

Stap 4: Paai met jou stem

Maak ’n geluid wat jou baba graag sal wil naboots. Maak die geluid dan oor en weer (roep en antwoord) vir mekaar terwyl jy verder en verder wegbeweeg. Gaan staan agter ’n deur of gordyn en hou aan met die speletjie, sodat jou baba jou kan hoor al kan sy jou nie sien nie. Later kan jy agter ’n toe deur staan.

Stap 5: Leer voorwerppermanensie

Dis ’n groot woord wat eintlik maar net beteken dat jou baba moet leer dat ’n voorwerp (soos ’n ma!) wel bestaan, al is dit nie sigbaar nie. Eenvoudige wegsteekspeletjies gee dit uitstekende oefening. Laat sy sien hoe jy ’n lappie oor ’n speelding gooi en vra haar om die lappie af te trek om die speelding te vind. Sy sal dit oor en oor wil doen. Dis ook hoekom kiekeboe so gewild op hierdie ouderdom is – dis soos towery wanneer ma elke keer agter die handdoek verdwyn en weer te voorskyn kom!

Stap 6: Skep ’n positiewe verband

Kom in die gewoonte om vir haar ’n spesifieke houer gunsteling-speelgoed te gee voor jy die huis moet verlaat. So sal sy hopelik ’n positiewe assosiasie met jou vertrek vorm sodat dit darem nie net sleg is wanneer jy gaan nie. Die opwinding van die interessante speelgoed sal haar aandag aftrek van die vrees wat sy voel, en sommer gou is jy vergete.

Stap 7: Moedig binding aan

Sommige ma’s kan jaloers voel wanneer hul baba met ’n ander volwassene bind. As dit soos jy klink, probeer maar om anders daaroor te dink. Moedig ander gesinslede en die kinderoppasser aan om met jou baba te bind – dit sal haar baie meer sekuriteit gee. Hoe meer geliefde volwassenes jou baba in haar lewe het, hoe beter vir haar. Sy sal geleidelik leer dat ander mense ook in haar behoeftes kan voorsien, en dit is ’n goeie ding.