Arbeidsterapeute, kindersielkundiges, onderwysers – eintlik almal wat iets weet van die ware behoeftes van kinders – is dit eens: Ouers moet tyd maak om met hul kinders te speel. Dis hoe jy hulle help bou – aan spiertjies, ’n selfbeeld en ’n stewige band tussen julle. Die pret is gewaarborg.

1. Wieg en gesels saam

Beweging herinner jou kleinding aan die sagte gesus wat sy in die baarmoeder ervaar het. Gaan gerus voort met baarmoedertipe-bewegings wanneer jou baba in die wêreld is deur haar knus toe te draai en ritmies heen en weer te wieg. Jy kan haar van drie weke af in ’n drasak ronddra; dan is jou hande ook sommer vry om met huistakies aan te gaan. As jy boonop saggies vir haar kan sing terwyl julle beweeg, het jy ’n wenner beet.

2. Kruip en stap saam

Jy is die vriendelike leeu en sy bly die kruipende baba. Kruip saam en maak geluide terwyl jy met jou baba speel. Namate sy ouer word, kan die leeu ál kwaaier word en die baba probeer vang. As dit begin lyk of sy haar eerste treetjies wil gee, kan julle dié speletjie begin speel: Laat haar op jou voete staan, hou al twee haar handjies vas en laat haar op jou voete stap. Gee lekker groot treë. Dit sal haar nie net aanmoedig om self die groot stap te doen nie, maar groot pret ook wees.

3. Blaas en vang seepbelle

Kyk maar, almal – van ses maande tot 60 jaar – word deur seepbelle betower. Vir die kleineres kan jy die blaaswerk doen terwyl baba met haar ogies die blink belle volg, wat baie goeie oefening vir daai oogspiere is. Bewegende babas kan die seepbelle wat jy blaas probeer vang terwyl peuters en kleuters self kan blaas en jóú kan laat hardloop.

4. Lees rympies en liedjies

Aksierympies en -liedjies bly treffers. Dink maar aan Duimpie en sy maats, die apie op die stokkie, handjies klap en koekies bak, en al om die huisie. Skaf ’n verseboek aan – bykans almal, die oues en die nuwes, het ’n hoofstuk met aksierympies. Of koop ’n CD met aksieliedjies wat julle saam kan uitvoer. Jou kind sal tot jou groot verbasing elke keer skaterlag en gou ’n gunstelingrympie of -liedjie hê wat jy oor en oor sal moet voordra.

5. Ruk en rol

Dans saam met jou kind – maak danstyd deur ’n CD met jou gunstelingliedjies te speel, of dans as daar ’n lekker liedjie oor die radio speel. Probeer om jou kind aan verskillende soorte musiek bloot te stel, van klassiek tot ritmiese Afrika-dromme. Jy kan ook vir jou kinders lang linte of een van jou serpe gee om mee te dans. Peuters sal daarvan hou om voor ’n lang spieël te dans. Maak groot bewegings as julle saam dans; jou kind sal jou naboots. Ander musiekspeletjies wat julle saam kan speel is die bekende stoeledans, waar jou kind moet dans tot die musiek ophou en dan baie gou ’n stoel moet kry om op te sit – kies plastiekstoeltjies vir die heel kleintjies. Dieselfde geld vriesspeletjies, waar jou kind in ’n standbeeld moet verander en so moet bly staan as die musiek skielik ophou.

6. Swem saam

Baljaar dié somer in die water – of dit nou in jul eie swembad, die see, ’n skoon rivier of ’n dam is. Die druppels van die watersproeier is ewe lekker (mits julle nie in die Kaap bly nie!). Daar is min kinders wat nie van water hou nie. Kleuters en hul ouer broers en susters is mal daaroor om op pa-dolfyn se rug te sit terwyl hy deur die water duik. Kinders wat skrikkerig is vir die water sal ook baie meer selfvertroue kry as ma of pa saam met hulle inklim.

7. Met dapper en stapper

Stap is ’n perfekte gesinsuitstappie en kan met baie ander leersame dinge gekombineer word. Jou kinders kan self stap (trek net gemaklike skoene aan), fietsry of in ’n drasak of stootwaentjie saamstap. Julle kan om die blok stap, in die naaste park of ’n heuweltjie in jul omgewing aandurf. Maak net seker julle neem genoeg water saam. Maak die staptog interessant deur dit soms ’n luistertog te maak. Dan moet jou kleuter en ouer kind fyn luister na alles wat hulle buite kan hoor: voëlgeluide, motors, dalk water in ’n afvoerpyp. Julle kan dieselfde doen met ’n sien-staptog, waar kleine ogies alles wat hulle sien vir jou moet vertel.

8. Speel die vangspeletjie

Sekere dinge verander nooit nie ... soos die lekkerte van die vang-my-speletjie! Raak saam met jou kinders uitasem terwyl julle mekaar probeer vang. As hulle nog klein is, sal jy goed toneel moet speel en maak asof hulle te vinnig is, maar pasop, later jare sal jy moet laat spaander om nie gevang te word nie!

9. Beproef rofstoei

Rol bo-oor mekaar en veg speel-speel op ’n sagte mat in die huis of buite op die gras. ’n Kussinggeveg op die bed in die hoofslaapkamer is ook altyd groot pret.

10. Soek skatte

Alle kinders is versamelaars. Hulle hou daarvan om blare, klippe en soms, tot jou afgryse, lewendige slakke en wurms op te tel en vir jou as geskenk te bring. Om buite saam ’n skattejag te hou kan ’n wonderlike deel- en leerervaring wees. Sorg dat elke kind en jy ’n sak, emmer of enige soort houer het en soek dan saam na skatte in die tuin of park. Jy kan die skattejag vir ouer kinders moeiliker maak met spesifieke opdragte soos dat hulle 10 ronde klippe moet versamel of net langwerpige of bruin blare mag optel. 

Het jy geweet?
Maak jul eie seepbelle deur twee eetlepels opwasmiddel by ’n koppie water te voeg. Laat staan die oplossing ’n dag of twee as jy kan. As jy ’n eetlepel gliserien byvoeg, is die seepbelle nóg beter. Gebruik ’n ou seepbelblaser en -houertjie.
Water- en sonveiligheid
Onthou dat almal ’n waterbestande sonroom met ’n sonbeskermingsfaktor van 30+ moet aansmeer. Moet nooit jou kinders alleen in die swembad laat speel nie, al swem hulle hoe goed.

Raakgekoop

Playgro se Peek In Roller R179,99, Baby City en Baby Boom.

Playgro Peek in Roller