Stap enige boekwinkel binne en tel hoeveel boeke daar op die rak oor slaap is – maklik meer as honderd! Slaap is nie net een van die grootste bronne van bekommernis en frustrasie vir ouers nie, maar vandag verdien verskeie plaaslike ondernemings hul brood en botter met slaapafrigting. Dit is om ’n goeie rede: Hoe sagkens die aanslag en metode ook al is, slaapafrigting skep steeds ’n mate van spanning vir ouers én babas – en dit is dikwels waarom slaapafrigting tuis misluk, sê Rhonél Scheepers van Sleep Training Consultants, wat konsultante landwyd het. Boonop is daar soveel teenstrydige inligting op sosiale media en in verskillende boeke dat ouers oorweldig voel deur die magdom inligting en dikwels sukkel om te onderskei tussen wat streng genoeg is en wat nie té streng is nie. “Die doel van ’n professionele slaapafrigter is om hierdie spanning van die ouers weg te neem en die baba op ’n kalm en gefokusde manier te leer slaap,” verduidelik Rhonél. Volgens Andalene Salvesen van die ouerskapsafrigtingsgroep Munchkins het slaapafrigting ’n slegte naam gekry omdat dit vroeër jare verbind is met die idee dat babas toegelaat moet word om hul hartjies uit te huil, maak nie saak hoe histeries hulle word of hoe lank die gehuil duur nie. “Studies wys so ’n uithuilery kan lewenslange skade by ’n kind veroorsaak en selfs later tot sielkundige afwykings lei,” sê Andalene. “Dit is glad nie wat professionele slaapafrigters vandag doen nie.” Petro Thamm van Good Night Child Sleep Consultancy beveel aan dat ouers hulp soek sodra hulle voel hulle het ’n probleem in die huishouding. “Slaapafrigting alleen is nooit die antwoord op ’n slaapprobleem nie – daar moet holisties gekyk word na ’n huishouding se roetine en veral sensoriese en voedingskwessies,” verduidelik Petro, wat in Centurion woon. “Die meeste ouers het ongelukkig nie die nodige kennis om hul baba se slaapprobleem holisties te bekyk nie en wanneer hulle ’n program uit ’n boek of van die internet gebruik, misluk dit gewoonlik.” Professionele slaapafrigters volg almal dieselfde beginsels, maar hul metodes verskil. Gesels met ander mammas oor wie en wat vir hulle gewerk het, want die beste verwysing vir ’n slaapafrigter is haar kliënte.

Alle slaapafrigters is dit eens: Tandekry behoort hoogstens vier aande lank ’n uitwerking op slaap te hê en is nie ’n verskoning om nie deur te slaap nie.
RAAKGEKOOP
Nirvana Natural Bliss se natuurlike en organiese babavelsorgprodukte is matig, sagkens en beskerm baba se delikate vel. Baby Massage Oil R129 (100 ml), Baby Powder R99 (100 g), Baby Aqueous Body Lotion R99 (100 ml), Baby Hair And Body Wash R89 (250 ml) en Baby Jelly R99 (50 ml). Te koop by takealot.com en nirvananaturalbliss.com.
Nirvana Natural Bliss

Slaapafrigter 1

Rhonél Scheepers, Mom’s Helper en Sleep Training Consultants

VEREISTES Babas moet minstens ses maande oud wees, minstens 8 kg weeg en bedags genoeg proteïene eet sodat hulle sonder ’n nagvoeding kan klaarkom. Babas word geleer om teen slaaptyd self aan die slaap te raak en hulle self weer aan die slaap te maak elke keer wanneer hulle in die nag wakker word.

KONSULTASIE Die eerste konsultasie is drie uur lank en albei ouers woon dit sonder hul baba by. ’n Holistiese benadering word gevolg waar kinders se mediese geskiedenis en die gesin se omstandighede bekyk word, asook of daar ander kinders is wat afgerig moet word (slaapafrigting word tot op 10 jaar gedoen). Die metode word in diepte bespreek en daarna kan jy besluit of jy die program self gaan implementeer en of die slaapafrigter twee aande by jou huis moet oorslaap.

METODE Jou baba se kamer moet donker en koel wees (maksimum 19 grade C), hy moet in ’n slaapsak wees en sy fopspeen en slaapmaatjie (sagte speelding) byderhand hê, en klassieke musiek wat die afrigter verskaf, moet deurnag speel. Ná storietyd word jou baba wawyd wakker neergesit, die lig word afgeskakel en die deur toegemaak. Huil word beheer en jou baba word nooit toegelaat om langer as vyf minute sonder ingryping te huil nie. Ná die eerste minuut sal jy ingaan en vir hom sê: “Waar is jou fopspeen? Waar is jou teddie? Lekker slaap.” Jy loop uit en trek die deur toe. As jou baba vyf minute lank huil, word hy vinnig opgetel, ’n drukkie gegee, neergesit en die tyd word weer van voor af gemonitor. Die eerste aand doen die konsultant die slaapafrigting terwyl pappa toekyk; die tweede aand doen pappa die slaapafrigting terwyl die konsultant hom bystaan.

SUKSES Sowat 50 persent van kinders slaap op dag 2 al deur, terwyl die res ná 10 dae deurslaap. Dis ’n tiendagprogram.

KOSTE Konsultasies begin by R1 350 en koste vir oorslaap wissel afhangend of daar gereis moet word. Nasorg is 24/7, en is onbepaald en kosteloos beskikbaar per telefoon of WhatsApp.

Slaapafrigter 2

Petro Thamm, Good Night Child Sleep Consultancy

VEREISTES Die program maak voorsiening vir alle ouderdomme en ouderdomsgepaste metodes word gevolg met ’n holistiese benadering tot slaap. ’n Optimale roetine vir ’n baba se ouderdom word bepaal en daar word aan die wakker tyd en slaaproetines gewerk.

KONSULTASIE ’n Volledige ontleding van die baba se persoonlikheid, huishoudelike omstandighede, sensoriese en voedingsaspekte sowel as ander faktore wat slaap beïnvloed word deur middel van ’n vraelys gedoen, waarna ’n plan vir die gesin opgestel word. Dit word opgevolg met ’n konsultasie van 90 minute by jou huis, waar daar met albei ouers gesels, na die omgewing gekyk, probleme geïdentifiseer en oplossings voorgestel word.

METODE Dit word bepaal deur ouers se behoefte. Soms slaap die baba nog in hul kamer of in die bed en word daar ’n plan uitgewerk wat dit in ag neem. Die ouers se ouerskapstyl en behoeftes word in ag geneem om die toepaslikste benadering te bepaal. Ouers doen self die slaapafrigting met slaaptyd en deur die nag en word deur die konsultant bygestaan, wat kan oorslaap of gekontak kan word. So kan sy eerstehands sien hoe die ouers die situasie hanteer en die nodige leiding verskaf. Tradisionele slaapafrigting (beheerde huil) word slegs toegepas nadat alle ander faktore wat ’n baba se slaap beïnvloed, geïdentifiseer en aangepas is. By jong babas word daar aan die sensoriese omgewing gewerk, soos dat baba styf toegedraai word of witgeraas in die agtergrond speel. Kleuters kry weer belonings om hulle te motiveer.

SUKSES Altesaam 92 persent van ouers vind ’n merkwaardige verskil binne twee tot drie dae, en 98 persent behaal sukses in die loop van die tweeweek-program.

KOSTE ’n Konsultasie van 15 minute waarin jou behoeftes bepaal word, is gratis. ’n Pakket wat ’n ontleding en opvolgkonsultasie insluit kos tussen R1 000 en R2 000, terwyl oorslaap sowat R3 000 kos.

Slaapafrigter 3

Andalene Salvesen, Munchkins

VEREISTES Babas moet ouer as agt weke wees. Babas tussen drie en ses maande word geleer om self aan die slaap te raak met een “droomvoeding” in die nag. Ouer babas leer deurnag slaap.

KONSULTASIE Konsultasies vind by jou huis plaas en is een uur lank as dit slegs die ma insluit, en drie uur as dit die hele gesin behels. Konsultasies kan ook per Skype gedoen word. Tydens die konsultasie word die gesin se behoeftes bespreek en ouers word in goeie roetines en gewoontes onderrig. Die konsultasie vind gewoonlik tydens óf ’n dagslapie óf die aandroetine plaas sodat bystand verleen kan word. Die ouers word dan bemagtig om dié metode te herhaal wanneer hulle in die nag alleen is.

METODE Baba se kamer moet donker en koel wees terwyl musiek of witgeraas deurnag speel. Die baba kan in ’n slaapsak wees en in sy kot met sy slaapmaatjies: ’n fopspeen en ’n bersie of teddie.

Jonger babas Ná sy melkvoeding word die baba lomerig en half wakker in sy bed gesit. Bly by hom en as hy huil, luister na die soort huil. Los hom as dit net ’n gekerm is. As dit ’n wind is, tel hom op en vryf die wind uit. As dit ’n desperate gehuil is, tel hom dadelik op en kalmeer hom voor jy hom weer neersit.

Ouer babas Volg dieselfde benadering, maar gaan net by die kamer in as baba desperaat huil. Dis belangrik om tussen ’n gewone kermhuil en ’n desperate huil te leer onderskei. Jou baba moet nooit opgetel word as hy net kerm nie.

SUKSES Die meeste kinders raak ná twee aande op hul eie aan die slaap, maar by party kan dit tot vyf aande duur.

KOSTE Altesaam R1 200 vir ’n konsultasie van drie uur. Opvolgsessies kos dieselfde. 

ADRESBOEK

Good Night Child Sleep Consultancy goodnightbaby.co.za, 087 802 6803, info@goodnightbaby.co.za

Munchkins munchkins.me, 083 287 6543, info@munchkins.me

Sleep Training Consultants sleeptrainingconsultants.co.za, 072 222 6279, rhonel@sleeptrainingconsultants.co.za