Jou baba het waarskynlik iewers rondom ses maande begin eet. Jy voer getrou die lepeltjies puree, maar sy wil heeltyd die lepel by jou gryp. Een oplossing is om vir haar haar eie lepel te gee terwyl jy haar steeds voer. Die ander is om vir haar kos te begin gee wat sy self kan eet. Nie net sal dit haar onstuitbare wil om self dinge te doen bevredig nie, dit sal ook vir haar ’n hele nuwe wêreld vol interessante dinge oopmaak.

Waarom vingerkos?

Jou baba ontwikkel op haar beste in ’n omgewing waar al haar sintuie gestimuleer word. Vingerkos is ’n eenvoudige, natuurlike manier om haar op verskeie vlakke te stimuleer sonder dat jy eens daaroor hoef te dink. Al die vat en voel, pap druk en smeer stimuleer haar tassintuig. Die verskillende temperature en teksture is ook fantasties vir handjies en ’n mondjie wat moet leer voel. Die groot klomp vorms en kleure stimuleer haar sig en omdat vingerkos ’n groter verskeidenheid happies beskikbaar maak as puree, kan dit haar reuk- en smaaksin ekstra stimulasie gee. Selfs haar gehoor word gestimuleer wanneer sy iets krakerigs kou of met haar lepel teen haar tafeltjie kap. Wanneer ’n baba met haar handjies moet eet, oefen haar vingers hard om te kan optel en vashou en bevorder dit so haar fynspierontwikkeling. Om dan seker te maak dat die eetdingetjie tot in die mond kom en nie in die oog of neusgate beland nie, verg hand-oog-koördinasie. Wanneer die stuk piesang in haar mond is, moet sy leer wat om daarmee te doen en hierdie oefening bevorder haar oraal-motoriese ontwikkeling. Dit is die deel van haar ontwikkeling wat belangrik is vir wanneer sy begin praat. Growwe kos help dus jou baba ’n paar maande later om haar woordjies mooi uit te spreek. Van soet en jellierig tot groen en grillerig, koud en korrelrig tot rond en krakerig ... vingerkos is kos vir jou baba se brein.

Doen dit so As jou kind uitreik na die kos en dit self wil neem, hou op oorlog voer en begin vir haar saam met haar growwer puree ook een keer per dag ’n kossie gee wat sy met haar hande kan eet. Jy kan dit dan stelselmatig vermeerder na een handjie- of vingerkos per ete terwyl die res puree bly. ’n Baie gerieflike opsie wat ook haar handvaardighede oefen, is om sakkies puree te gee waaruit sy self kan eet. Daar is verskeie smake om van te kies. Namate sy ouer word en meer vaardig met haar vingers, kan jy die puree-items minder maak en die vingerkos meer tot sy ná haar eerste verjaardag al haar kossies groot en grof kan eet. Laat jou baba toe om self te ontdek. Sy kan die kos pap druk en deur haar vingers laat peul, dit op haar tafeltjie smeer en selfs in haar hare inwoel. Dit is alles deel van kos ontdek en is waardevolle stimulasie. Leer haar net reg van die begin af dat ons nie kos of eetgerei gooi nie. Twee goue reëls is om haar nooit te dwing om iets te eet nie en om nie iets anders te gee as sy nie wil eet wat jy voorgesit het nie. As sy iets wil hê wat op jou bord is, kan jy dit vir haar gee, mits dit nie sout of suiker bevat nie.

SMULKOS VIR 3 STADIUMS

Die sleutel tot ’n veilige en suksesvolle vingerkosfees is om die regte kos te gee vir die stadium waarin jou baba is. Met hierdie riglyne kan die fees begin!

1ste vingerkosse: 7-8 maand In hierdie stadium het jou baba ’n palmare greep. Dit beteken dat sy kos met haar handjie kan vat. As jy dink hoe lekker sy jou vinger vashou, dan weet jy wat nou die ideale vorm van kos is: Dit moet min of meer so dik en lank soos jou vinger wees. Omdat dit die eerste stukke kos is, moet dit ook lekker sag wees. Maak seker dat jy dit maklik tussen twee vingers kan platdruk. Onthou dat geen babakos sout of suiker behoort te bevat nie.

  • Botterskorsievingers Skil, stoom tot sag en sny in vingers.
  • Papaja-, mango-, en waatlemoenvingers Skil en sny in die lengte in vingers.
  • Murgpampoentjie Stoom tot gaar en sny die punte af.
  • Piesangvingers Skil en druk jou vinger van onder af in sodat jy die piesang in drie dunner dele deel. In die volgende stadium kan jy piesangwieletjies gee, wat goed is vir vingertjies.
  • Avokado Skil en sny in die lengte in repies.
  • Patatvingers Stoom, skil en sny in vingers.
  • Aartappelskyfies Koop dik, bevrore aartappelskyfies en bak dit in die oond, of maak jou eie: Kook ’n groot aartappel tot halfgaar, trek die skille af, sny in vingers en bak in die oond.
  • Stokvisvingers Kies bevrore stokvisfilette sonder grate. Stoom en breek in repies wat in die handjie sal pas.
  • Saggekookte pasta Kies skroefpasta en kook tot sag.
  • Nektarienskywe Kies ’n sagte een, skil en sny in groterige skywe.

2de vingerkosse: 9-11 maande Nou het jou baba al ’n tweepunt-knypgreep, wat beteken dat sy klein goedjies tussen haar duim en wysvinger kan optel. Jy kan nou vingerkosse gee wat klein is en fyn motoriese vaardighede help ontwikkel. Handjiekos wat ’n titsel fermer is as dié wat jy in die eerste stadium gegee het, is ook ’n goeie idee.

  • Lemoenskyfies Skil diep af en sny wiggies uit die vliese wat die skyfies skei.
  • Roereiervingers Klits die eier met ’n vurk, maak gaar sonder om te roer en sny in vingers.
  • Koeskoes-balletjies Plaas ’n eetlepel koeskoes in ’n bakkie en voeg twee eetlepels kookwater by. Bedek en laat 5 minute staan. Roer ’n teelepel maaskaas by en vorm balletjies.
  • Botterbone Kies tuisgekookte bone sonder sout.
  • Ertjies of klein gemengde groente Kies die bevrore soort en stoom gaar.
  • Babatamaties Kies die sagte, ronde soort. Sny dit aanvanklik in die helfte en gee dit ’n maand of wat later net so heel.
  • Broodvingers Kies sagte, lae-GI-heelgraan- of bruinbrood. Smeer met margarien en ’n vulsel soos lewerpuree, grondboontjiebotter, maaskaas of roereier, vou toe en sny in duimbreedte-repies.
  • Druiwe Kies druiwe met ’n sagte skil. Gee dit aanvanklik in die helfte gesny en ’n maand of twee later heel.
  • Komkommervingers Sny ’n stuk komkommer so lank soos ’n vinger. Sny die skil af tot ’n lang blokkie met die pitte in oorbly.
  • Broccoli-boompies Breek broccoli in boompies en kies dié met lang steeltjies waaraan baba kan vashou. Stoom tot sag, maar nie pap nie.

3de vingerkosse: 12 maande en ouer Nou is jou baba se handjies en vingers al so goed geoefen dat sy kan leer om self met ’n lepel te eet en self uit ’n bekertjie te drink. Jy kan ook harder kosse begin gee terwyl jy verskillende vorms en groottes afwissel. Blokkies, vingers en balletjies help om dieselfde kos interessant te hou.

  • Aarbei Was en sny in halwes, kwarte of gee sommer net so heel.
  • Saggekookte hoenderrepies Kies ’n boudjie, kook tot dit byna van die been afval en gee ’n repie sonder been.
  • Groenbone Sny die steeltjie af en stoom heel tot sag.
  • Babawortels Kies die bevrore soort en stoom of kook tot gaar.
  • Bruinrys Sy kan die gaar rys met haar vingers of lepel eet. Jy kan dit ook met avokado meng en ’n balletjie maak.
  • Appel Kies een met ’n sagte skil of skil af en gee net so heel sodat baba klein stukkies kan afknaag.
  • Mielie op die stronk Sny in stukke van 3-4 cm breed en kook tot gaar.
  • Maaskaas Kies volvetmaaskaas en bied dit aan op ’n lepel met ’n lekker breë handvatsel.
  • Botterskorsiesop Maak dit goed dik en laat sy dit self met ’n lepel eet.
  • Pekanneute of okkerneute Kies hierdie sagte neute en vermy steeds harde neute soos heel amandels. 


RAAKGEKOOP
Purity se Mixed Berry-sakkie (110 ml) R8,99, beskikbaar by alle kleinhandelaars en groot apteke.
Purity Pouch