VRAAG:

My pasgeborene is skielik ontevrede en huil soms ure aanmekaar. Hoe weet ek of sy koliek het? Sy huil meestal saans met badtyd en dan is dit skielik verby. As dit koliek is, wat kan ek doen om haar te help?

Dr. Maretha Combrink antwoord: As ’n andersins gesonde baba langer as drie uur per dag aanmekaar huil en dit meer as drie dae per week en vir langer as drie weke doen, word koliek gediagnoseer.

Dit kom 10 tot 40 persent van babas oor en seuntjies en meisies word ewe veel aangetas. Die huilepisodes bereik gewoonlik teen ses weke oud ’n hoogtepunt en hou selde langer as ses maande aan. Die presiese oorsaak van koliek is onbekend, hoewel sommige mense reken dit is die gevolg van krampe of buikpyn. Ander moontlikhede sluit in oorstimulasie of ’n verstopte neus wat voedingsprobleme en winde kan veroorsaak. Onderliggende toestande soos hardlywigheid, ’n anale skeurtjie, reflukssiekte en laktose-intoleransie is die sondebokke by minder as 5 persent van babas wat hewige huilepisodes het.

Gevaartekens daarvan sluit in koors, swak voeding of braking, ’n geswelde buik, slaperigheid en swak gewigstoename. Die behandeling van koliek is gewoonlik konserwatief en sluit kalmerende metodes soos styf toedraai in, die speel van witgeraas op die agtergrond, om baba op haar sy te draai of ’n boontjiesak teen haar magie te plaas. Ook ma en pa het steun nodig, want die aanhoudende gehuil kan hulle baie gefrustreerd laat voel en selfs tot nageboortelike depressie lei.

Daar is verskeie krampwaters en koliekmiddels beskikbaar, maar navorsing kon nog geen middel vind wat sowel doeltreffend as veilig is nie. Borsgevoede koliekbabas kan moontlik baat vind by die probiotikum Lactobacillus reuteri. Navorsing toon geen duidelike voordeel van spinale manipulasie of massering nie. Servikale manipulasie word nie aanbeveel nie omdat die veiligheid daarvan nie seker is nie.