1. Rustige reuke

Kort ná sy geboorte kan jou baba al sy ma se unieke geur tussen ander uitken en soek hy outomaties by jou troos en versorging. Dis dus geen verrassing nie dat een van die reuke wat jou baba die beste kalmeer, jou liggaamsreuk is.

Hou jou baba teen jou vas of dra hom in ’n babadrasak sodat hy jou kan ruik. Hoe minder klere daar tussen julle is, hoe beter. As jy hom nie self kan vashou nie, kan jy ’n kledingstuk by hom neersit waaraan jou geur kleef. (Maak net seker hy kan nie daarin verstrengel raak nie.)

Jy kan ook een van sy babakombersies ’n rukkie lank teen jou lyf dra sodat jou geur daaraan kleef; dit sal hom veiliger laat voel. Moenie te veel parfuum aantik wat jou natuurlike reuk oorheers nie.

Die geur van laventel en kamille is ook sussend. Spuit ’n bietjie laventel-reukwater op baba se beddegoed of sit hom in die bad en drup twee tot drie druppels laventelolie in die water. (Moenie meer gebruik nie, essensiële olies is baie gekonsentreerd.)

Die meeste winkelrakke kreun onder laventelgegeurde badprodukte. Jy kan ook ’n paar druppels laventelolie by baba se wasgoedwater gooi. Of drup ’n bietjie olie op sy motorstoeltjie om hom in die motor rustig te hou terwyl jy die verkeer aandurf.

2. Soete smake

Studies het gewys dat babas van soet smake hou en dat sukrose en glukose hulle tot bedaring kan help bring.

Interessant genoeg neem die kalmerende uitwerking van sukrose by normale babas ná sowat ses weke af. Daarna help troos en aktiewe kalmering meer. Sukrose is minder kalmerend vir ouer babas met koliek, selfs al word groot hoeveelhede toegedien.

Dis natuurlik nie wys om jou kleinding met soetgoed tot bedaring te probeer bring nie, maar die goeie nuus is dat borsmelk outomaties soet is en dus ook kalmerend op jou baba inwerk.

3. Liefde met gevoel

Alle babas het aanraking nodig en baie daarvan. Dit laat hulle veilig en gekoester voel. Babas word gekalmeer deur ferm, diep aanraking; ligte aanraking kan hulle maklik oorstimuleer en irriteer.

Gee jou baba vel-tot-vel-kontak Sit baba kaal op jou kaal bors neer met sy oor naby jou hart sodat hy jou hartklop kan hoor. Jou hartklop, die ritme van jou asemhaling en die warm gemak van jou vel teen syne sal hom laat ontspan.

Draai jou baba styf in ’n kombersiekokon toe Sy arms moet ook saam toegedraai word. As jy jou baba so styf toedraai, voel dit vir hom asof hy weer in die veilige omgewing van die baarmoeder is. Vryf jou baba se rug met diep, ferm hale.

Masseer jou baba Babamassering kalmeer die senustelsel terwyl dit jou baba se spiertjies help ontspan. As jou baba reeds taamlik kalm is, kan babamassering hom verder help ontspan. Dit sal nie ’n skreeuende baba laat bedaar nie, maar kan help dat jou baba op die duur minder huilerig is.

Olie of room kan ingespan word om verskillende dele van baba se lyf met ferm bewegings te masseer. Skaf ’n goeie babamasseringsboek aan of woon ’n kursus by om hierdie kalmeringstegniek te verken.

4. Klanke wat streel

In die baarmoeder het jou baba se oortjies al goed gewerk en het hy gewoond geraak aan die ritmiese klank van jou hartklop (60 tot 70 slae per minuut), die gesuis van bloed en water in sy ore en die dowwe klanke wat ’n mens deur water hoor. As jy jou baba kalmeer, help dit dus om hierdie klankwêreld na te boots. Eentonige, lae klanke met ’n ritme van sowat 60 slae per minuut (dus een per sekonde) werk die heel beste.

Jou stem Jou baba kan reeds binne die eerste maand ná geboorte sy ma se stem tussen dié van ander uitken. Jou sagte, troostende stem bly een van die kalmerendste klanke wat hy kan hoor – daarteenoor kan jou kwaaier stem hom ontstel. Hou jou stem dus rustig, kalmerend en vertroostend as jy jou kleinding tot bedaring wil bring.

Sing wiegeliedjies, praat met hom of sê “sjjj” as hy huil – dié geluid herinner hom aan die suisgeluide wat hy in die baarmoeder gehoor het. Hoe harder baba huil, hoe harder sal jy “sjjj” moet sê.

Witgeraas Navorsing het gewys dat knieserige babas goed reageer op witgeraas, oftewel die eentonige, ritmiese klank van implemente soos haardroërs, wasmasjiene, stofsuiers en waaiers, of die gesuis van motorbande op die pad. Dis waarskynlik ook omdat dié geluide aan die baarmoederklanke herinner.

Deesdae kan ’n mens CD’s met witgeraas koop of witgeraas-apps aflaai om babas te kalmeer. Jy kan ook met jou selfoon ’n opname van witgeraas maak (soos die stofsuier of wasmasjien) en dit vir jou baba speel.

Strelende musiek Nes met volwassenes kan die musiek of geluide wat babas hoor, hul gemoed beïnvloed. Strelende, sagte musiek sal die meeste babas help bedaar. Vivaldi of Mozart werk goed, maar kyk waarop jou baba die beste reageer.

Stilte Sommige babas verkies dit om ’n bietjie stilte te geniet. Dit beteken nie ’n doodse stilte nie, maar net ’n omgewing waar daar nie ’n harde en aanhoudende geraas is nie.

Jou borsgeluide Plaas jou baba sodat hy met sy koppie teen jou nek lê waar jou stembande is. Neurie of sing dan, verkieslik in ’n lae stemtoon (pa’s is veral goed hiermee). Jou baba sal die vibrasies van die stembande voel en na die klanke luister.

5. As dinge te wild raak

Deel van die geheim van ’n kalm baba is om die balans tussen oorstimulasie en genoeg stimulasie reg te kry – en dis soms moeilik omdat sommige babas baie vinniger oorgestimuleer word as ander.

As ’n baba te veel stimulasie kry in die vorm van te veel geraas, helder ligte en aktiwiteite in sy omgewing, kan hy oorweldig voel, veral omdat sy senustelsel nog nie ten volle ontwikkel het nie.

’n Oorgestimuleerde baba kan dit moeilik vind om hom self te kalmeer of te slaap en sal knieserig wees. Jy sal hom daarmee moet help. Vroeë tekens dat jou baba oorweldig voel, kan insluit dat hy sy kop wegdraai, nies of sy handjies begin suig. Latere tekens is dat hy woes met sy arms en bene begin skop en waai, sy oë glaserig raak en hy uiteindelik deurdringend begin huil.

Stimuleer baba dus net wanneer hy wakker en aktief is en wees op die uitkyk vir tekens van oorstimulasie. Neem hom dan na ’n kalmerende omgewing waar hy kan afskakel.

6. Sien en word kalm

Veral aan die begin vind jou baba jou gesig interessanter as enige speelding en jou gesigsuitdrukkings kan ’n rol speel in sy gemoedstoestand. Hou jou gesig naby genoeg dat hy jou kan sien (die afstand tussen jou gesig en bors is ideaal) en glimlag vir hom. ’n Bekende omgewing kan hom help bedaar.

Iets wat die aandag aftrek Soms is ’n onverwagte prentjie al wat nodig is om baba van sy ongelukkigheid te laat vergeet.

’n Kalmerende omgewing Sagte kleure soos grys, ’n sagte geel, blou of room kan help om jou baba te kalmeer, terwyl helder klere soos rooi, oranje en heldergeel die teenoorgestelde uitwerking het.

Sagter ligte Beligting het ’n invloed op jou baba. Kies helder ligte waar jou baba wakker en aktief is en sagter ligte as jy jou baba tot bedaring wil bring. Trek die gordyne voor slaaptyd toe.