Vraag:

My baba is nou net ouer as ’n jaar. Sy slaap baie sleg. Ek werk en is oormoeg. Ek het geskop teen slaapafrigting, maar voel nou dit is my enigste opsie. Is slaapafrigting skadelik vir haar?

Antwoord:

Lenmarie Stanton: Baie dokters en ouers meen dis in orde om jou kleuter vir ’n rukkie te laat huil tot sy weer aan die slaap raak. En baie ouers wonder of dit hul baba gespanne maak, of dit hulle emosioneel benadeel en of dit skade aan hul verhouding met hul kind sal aanrig.

Slaapafrigting is omstrede, maar volgens ’n onlangse studie in die joernaal Pediatrics is die antwoord op al die bogenoemde vrae nee. Die navorsers het gekyk na die vlak van die streshormoon kortisol by babas en ouers, die ouers se spanningsvlak, emosionele en gedragsprobleme en die bindingspatrone van ouers en babas. Hul bevinding was dat dit in orde is om jou baba ’n bietjie te laat huil; dat almal beter sal slaap en dat almal dan gelukkiger sal wees.

In ’n ander studie is gevind daar was geen verskil tussen die kinders van ouers wat hul kleingoed laat huil het sonder om hulle te troos en dié wat heelnag wakker gebly het om hul kinders te troos nie. Jy kan dus slaap inkry én ’n goed aangepaste kind hê.

Ek wil net beklemtoon dat slaapafrigting nie beteken jy laat jou baba deur die nag huil nie. Dit beteken dat jy jou baba stelselmatig help om hom self te reguleer wanneer hy wakker word pleks daarvan dat hy altyd op jou staatmaak om dit te doen.

Dit is natuurlik ons instink om te keer dat ons baba huil, maar sommige mylpale in ’n baba se lewe gaan altyd ’n bietjie huil vereis. Of jou baba nou huil as hy self aan die slaap moet raak, as hy leer loop (daar is altyd ’n kans vir struikel), as hy dagsorg toe gaan (om ouers agter te laat is moeilik), as hy begin maatjies maak (kinders kan wreed wees) of as hy sport beoefen (jy kan nie altyd wen nie) – huil sal hy nog dikwels huil.

Dit help nie om hom nie toe te laat om te huil nie; dit kan hom trouens seermaak. As jou baba steeds wakker word, kan jy gerus met jou pediater praat. As daar geen mediese oorsake is nie, sal dit nie skade aanrig as jy nie op elke huilslag reageer nie. 

Navorsing wys dat kinders wat snags ’n bietjie gehuil het, nie slegter af is as dié wat getroos is nie.