VRAAG:

My pasgeborene is een week oud. Sy slaap eintlik maar meestal. Ek voed op aanvraag. Ek lees baie dat pasgeborenes elke drie uur móét drink, maar my kleinding slaap nog baie en sal sommer vyf of ses uur aanmekaar slaap en dan eers wakker word. Moet ek haar maar los tot sy wakker word?

DR. MARETHA COMBRINK ANTWOORD:

Pasgebore babas het tussen agt en 12 voedings per 24 uur nodig. Babas behoort nie meer as vier tot vyf uur tussen voedings te slaap nie. As dit wel gebeur, moet jy jou baba wakker maak om haar te voed.

Pasgebore babas loop in hul eerste twee weke die gevaar van lae bloedsuiker weens te min glikogeen- en vetreserwes.

Met swangerskap voldoen die plasenta aan jou baba se energiebehoeftes deur glukose (suiker) van jou na haar oor te dra. Ná geboorte word hierdie oordrag onderbreek en is babas vir hul eie energiebehoeftes verantwoordelik.

Hormoon- en metaboliese veranderinge vind plaas om die brein en ander belangrike organe van genoeg glukose te voorsien.

Pasgeborenes verloor in die eerste dae van hul lewe gewig, maar behoort dit weer aan te sit en teen 14 dae oud hul geboortegewig te bereik.

As jou baba dus teen twee weke oud nie dieselfde (of meer) weeg as met geboorte nie, moet jy die pediater, klinieksuster of borsvoedingskonsultant raadpleeg. As sy goed groei en mooi gewig aansit, kan jy slegs op aanvraag voed.