VRAAG: Ek hoor so baie teenstrydighede:Is ’n fopspeen aanvaarbaar of nie?

DR. MARETHA COMBRINK ANTWOORD: Die gebruik van fopspene word al van so vroeg as 1473 in die mediese literatuur aangeteken. Hoewel die voorkoms en funksie van fopspene in 2020 heelwat moderner is, bly die gebruik daarvan omstrede. Hier is ’n klompie voor- en nadele wat jy in ag kan neem voor jy besluit of jy ’n fopspeen vir jou baba wil aanskaf.

Die suigaksie het ’n kalmerende uitwerking op babas. ’n Fopspeen kan dus gebruik word wanneer jou baba ’n bietjie vir ’n voeding moet wag. Die suigaksie help ook tydens pynlike prosedures soos immunisasie of bloedtoetse, sowel as om die druk in die middeloor eweredig te hou wanneer baba hom op ’n vliegtuig bevind.

Dit wil ook lyk of dit babas met koliek en refluks help en rustig hou as hulle suig sonder om te voed.

Navorsing wys daarby dat wiegiedood 61 persent minder voorkom by babas wat met slaaptyd fopspene suig.

Fopspene dien ook as beskerming teen tandskade omdat dit keer dat babas op hul tande kners.

Daar is ook natuurlik nadele: Tepelverwarring kan ont­staan wanneer babas foppies suig voor hulle vier tot ses weke oud is. Aan die ander kant help fopspene vroeggebore babas wat buisvoeding kry deur solank hul suigvermoë te ontwikkel en sterker te maak.

Babas wat foppies suig kry meer oorinfeksie en as ’n kleuter tot drie jaar oud sy fopspeen suig, kan hy tandheelkundige probleme opdoen wat soms ortodontiese behandeling kan verg.

Babas wat heeldag aan ’n foppie loop en suig se spraak­ontwikkeling is soms stadiger.

In ’n neutedop: Die gebruik van ’n fopspeen is aanvaarbaar, mits die volgende in gedagte gehou word:

  • Fopspene word in die eerste maand van lewe ontmoedig tot borsvoeding vasgelê is, behalwe in die geval van vroeggebore babas wat buisvoeding kry.
  • Fopspene moet net met slaaptyd ge­bruik word.
  • Van ses maande af kan die fopspeen steselma­tig onttrek word.
  • Moet liefs glad nie ná een jaar oud meer die foppie gebruik nie.
  • Fopspene moet gereeld gewas en geste­riliseer word om infeksie te voorkom.
Het jy 'n vraag?

E-pos jou vrae na briewe@babaenkleuter.co.za.

Vrae kan ongelukkig nie persoonlikbe­ant­woord word nie.