VRAAG

My babaseuntjie van agt maande bly bedags by die huis waar ’n kinderoppasser mooi na hom omsien. Hy was heel gelukkig om my te sien vertrek, maar deesdae huil hy as ek werk toe gaan. Dit maak dit moeilik, al weet ek daar word goed na hom omgesien. Hoe kan ek die skuldgevoel hanteer en dit ook vir my baba makliker maak?

LENMARIE STANTON ANTWOORD:

In hierdie fase kan jou kind soos twee afsonder­like babatjies reageer. Die een kan ontvanklik, liefdevol en spontaan wees en die ander angstig, klouerig en iemand wat vinnig skrik vir onbekende mense en omgewings. 

Teen agt maande oud begin jou kind vir die eerste keer onderskei tussen bekende en onbekende omgewings en situasies. 

Voorspelbare angs is ’n teken dat jou kind ’n gesonde verhouding met jou het. Angs naby vreemdelinge is ’n eerste emosionele mylpaal wat jou kind behaal. Jy dink dalk daar skort iets met jou seuntjie wat op drie maande gemaklik was met vreemdelinge en nou op agt maande angstig raak as vreemdelinge nader kom, maar dit is normaal vir sy ouderdom en daar is nie rede tot kommer nie. 

Op hierdie ouderdom is hy ook meer klouerig wanneer jy hom moet verlaat, want dis die begin van skeidingsangs. Hy begin besef dat voorwerpe permanensie het en dat daar net een van jou is. 

Wanneer hy jou nie kan sien nie, sal hy dus weet jy is êrens, maar nie by hom nie en dit kan emosionele ongemak veroorsaak. Omdat hy nie ’n begrip van tyd het nie, sal hy nie weet wanneer en of jy gaan terugkom nie.

Namate hy ouer word, sal sy herinneringe aan jul tye saam hom gerusstel terwyl jy weg is en verwag hy dat jy terugkom, maar vir eers is hy net bewus van die hede. Daarom kan hy knieserig word en huil elke keer dat jy hom verlaat, al is dit net vir ’n paar oomblikke. 

Dié angs duur gewoonlik van agt tot 18 maande oud en begin teen die tweede helfte van die tweede jaar afneem. Dis dikwels ’n emosionele en soms pynlike fase van ontwikkeling, maar ’n teken dat hy ’n behoefte daaraan het om by sy eerste groot liefde – jou – te wees. 

Beproef dié wenke: 

  • Babas is meer vatbaar vir skeidingsangs as hulle honger, siek of moeg is. Vertrek liefs nadat hy geslaap of geëet het en probeer waar moontlik by hom bly as hy siek is. 
  • Moenie ’n bohaai maak oor jou vertrek nie. Laat sy oppasser ’n afleiding skep (soos ’n speelding of spieël), sê tatta en glip vinnig weg.
  • Onthou dat sy traantjies ná jou vertrek vinnig ophou vloei. Hy probeer jou oortuig om te bly, maar as hy jou nie meer sien nie, sal hy sy aandag gou na sy oppasser verskuif.

Babatjies met sterker bindings sal vroeër skeidingsangs openbaar en ook vinniger deur hierdie fase beweeg. Moet jou nie verwyt oor sy besitlikheid nie. Wees liewer warm, wys jou liefde en behou jou sin vir humor. Dit sal die emo­sionele grondslag vorm vir die jare wat volg.