Al wat regtig nodig is, is dat jy besluit jy gaan borsvoed. Daarna kan jy agteroorsit en jou swangerskap geniet, veilig in die wete dat jou liggaam baie wyser as jy is wanneer dit by die voeding van jou pasgeborene kom. Om die waarheid te sê, hoe minder jy nou doen, hoe beter.

Vergeet daarvan om jou tepels te rol of te skrop, of in die son te gaan lê. As jy dit moeilik vind om oor die saak te ontspan, hou in gedagte dat jou liggaam hard aan die werk is om te verseker dat die melk op die regte tyd en in die regte hoeveelhede vir jou nuwe babatjie beskikbaar sal wees. Gebruik dié tyd om inligting te bekom. Vroue wat borsvoeding nie baasraak nie, is dikwels oningelig of het die verkeerde inligting gekry.

Jy hoef nie sekere kosse uit te skakel terwyl jy borsvoed nie.

Dit is ’n goeie idee om ’n borsvoedingsklas by te woon of koop ’n boek oor die onderwerp – moenie net die hoofstuk in jou algemene babaversorgingshandboek lees nie; jy’t meer inligting as dit nodig. Jou liggaam begin al in week 26 van jou swangerskap kolostrum vervaardig, wat beteken dat jy selfs ’n vroeggebore baba kan borsvoed.

Jou liggaam word deur die teenwoordigheid van die vrugwatersak gekeer om groot hoeveelhede melk te vervaardig – die oomblik dat dit uit die pad is, begin jou liggaam fluks die melk vervaardig wat jou honger baba nodig het. Dit kan tot vyf dae duur voor die groot hoeveelhede melk inkom en intussen is dit belangrik om jou baba baie gereeld te voed.

Die goue uur

In ideale omstandighede behoort jou baba haar eerste voeding binne die eerste uur of twee van haar lewe te kry. Jou baba is kort ná die geboorte lekker wakker en sal gretig wees om aan jou bors te suig. Gryp die geleentheid aan om borsvoeding aan haar bekend te stel en so ’n goeie begin te bewerkstellig.

As jou baba om die een of ander rede van jou geskei is, begin dan binne die eerste ses uur ná geboorte uitmelk. As jou babatjie by jou is, maar vaak is en nie te geïnteresseerd lyk in haar eerste voeding nie, plaas haar sonder klere (behalwe vir ’n doek) teen jou kaal bors.

Dit behoort te sorg dat sy ná ’n kort rukkie belangstelling in jou bors begin toon. Sommige babas het ’n proeseltjie kolostrum nodig om hul suigrefleks aan te wakker. Vra die hospitaalpersoneel aan diens om jou hiermee te help en die beste raad te gee. Moenie skaam wees om te vra nie.

Hoe gereeld?

Die meeste voltermynbabas behoort elke drie uur te drink. Dit klink vir jou dalk veeleisend, maar onthou dat hulle baie klein hoeveelhede van die kaloriedigte kolostrum op ’n slag inneem.

Kolostrum hou hulle warm en aan die groei, en word perfek deur hul onvolwasse spysverteringstelsels opgeneem sodat hulle ná sowat drie uur vir die volgende voeding gereed is. Hierdie eerste paar dae van kolostrumvoeding is goeie oefening vir jou en baba sodat julle haar posisionering tydens borsvoeding en haar aanhegting regkry.

HET JY GEWEET?
Borsbabas ly minder aan diarree en hardlywigheid, en is ook minder geneig om allergieë op te doen.

Wenke vir maklike borsvoeding

VIR MA

Raak gemaklik

Verwyder jou bostuk en hele ondersteuningsbra met elke voeding – so sal jy nie voel dat jou klere besig is om jou te wurg nie.

Kry ondersteuning

Probeer om in aanraking te kom met ma’s wat suksesvol borsvoed. Hul selfvertroue sal ’n positiewe invloed op jou hê. ’n Ondersteuningsgroep vir borsvoedende ma’s sal jou beslis ook bystaan om suksesvol te borsvoed.

Vol borste

Wanneer jou melk inkom, sal jou bors eers effens knopperig voel en dan ál voller word. Jy sal dalk heel beïndruk wees met jou toenemende bragrootte… Dis absoluut noodsaaklik om jou baba in hierdie stadium so gereeld moontlik te voed – vergeet van enige voedingsroetine – om te keer dat jou borste oorvol raak. Dit kan tot infeksie of selfs ’n abses lei.

Kuur vir seer borste

Koolblare in jou bra het ’n wonderlik verkoelende uitwerking en bring beslis verligting vir vol borste. Dis waar dat dit ná ’n ruk in jou bra dalk nie meer so lekker ruik nie, maar leef maar saam met die reuk of wissel die blare dikwels – dis die moeite werd in die lig van die groot verligting wat dit bring.

Eet gebalanseerd

Hoewel dit belangrik is om ’n goed gebalanseerde dieet te volg, is dit nie nodig om sekere kosse uit te skakel nie – dis regtig nie ’n probleem as jy lemoene, tamaties, knoffel en selfs ’n bietjie sjokolade eet wanneer jy borsvoed nie. Balans is die geheim.

VIR BABA

Hou baba paraat

Trek al jou babatjie se klere behalwe die doek uit en plaas haar op jou kaal bolyf met haar gesig na jou borste gedraai en haar maag na jou maag.

Regte hoogte

Jou baba moet op tepelhoogte wees – as haar neus in een lyn met jou tepel is, behoort jou posisionering omtrent reg te wees.

Voed op aanvraag

Jou baba kan net ’n sekere hoeveelheid melk per dag inneem; moet dus nie bekommerd wees oor oorvoeding nie. Klein voedings is in hierdie stadium beter vir jou baba.

Vuil doeke

’n Baba wat genoeg melk inkry, sal ná voedings rustig word en nat sowel as vuil doeke produseer – enigiets van ’n vuil doek ná elke drinksessie tot een groot stoelgang elke paar dae is normaal. Laat jou baba vir jou eie gemoedsrus gerus in die eerste paar weke by ’n babakliniek weeg. So sal jy kan bevestig dat sy genoeg te drinke kry en dit gee jou die selfvertroue om haar suksesvol voort te voed.

Korrekte vashegting Kielie haar mond met jou tepel en wag tot sy haar mondjie wyd oopmaak, soos ’n babavoëltjie wat vir ’n wurmpie wag. Plaas haar op haar bors wanneer haar mond so groot oop is. Die tepel is maar net die opening waaruit die melk kom – jou baba moet haar mond om jou tepel en areola kry om suksesvol te drink.