Slaapkenners is dit eens dat ’n roetine die geheim van beter slaap vir jou en jou baba is. Babas is op hul gelukkigste wanneer hulle in ’n roetine is, want hulle weet wat om volgende te verwag. Babas met voorspelbare slaaprituele slaap makliker, dieper en langer. Wanneer jou baba se brein die eerste stappe van die slaaptydroetine herken, voel hy dat die hele patroon bymekaarkom en dit help dat hy vinniger aan die slaap raak.

Wanneer begin ek?

Jy kan die slaaproetine begin vestig wanneer jou baba tussen ses en agt weke oud is. Babas jonger as ses maande kan tussen 18:00 en 19:00 gaan slaap en ouer babas tot en met 18 maande tussen 19:00 en 20:00, sê die slaapkonsultant Nicole Johnson in haar e-boek 5 Ways to Help Your Child Sleep Through the Night.

Hoe werk dit?

Hoe jy jou baba se roetine aanpak, hang af van jou persoonlike voorkeur. Volharding en ’n kalmerende skedule wat aand ná aand dieselfde lyk gaan egter julle sukses bepaal. Jou roetine kan in die bad- of woonkamer begin, maar maak seker dat dit in die ruimte eindig waar jou baba slaap. Dis belangrik dat jou baba van sy slaapruimte hou en dit met aangename ervarings verbind, sodat dit nie net ’n plek word waar hy gelos word om te slaap nie. Onthou ook dat wat vir jou vriendin, suster of ma gewerk het, moontlik glad nie vir jou gaan werk nie. Hou dus by wat vir julle die beste is.

Wat kan jy verwag?

Jy kan jou baba nie dwing om te slaap nie. Jou rol is om die omstandighede te skep wat jou baba vaak kan maak en wat slaap ’n aantreklike opsie maak. Kundiges stem ook nie saam oor wanneer en of jong babas snags kan deurslaap sonder om te eet nie. Sommiges sê hulle behoort deur te slaap wanneer hulle hul geboortegewig verdubbel het, ander sê op ses weke, terwyl sommige pediaters weer van mening is dat babas tot en met nege maande oud soms nog een tot twee voedings per nag nodig het. Wees ook maar aanpasbaar. Sodra julle albei aan die roetine gewoond is, kan jou baba besluit dis tyd om self haar roetine te verander.

Het jy geweet?
Babaslaappatrone word dikwels omvergewerp wanneer baba ’n nuwe vaardigheid aanleer soos om te kruip.

Moets en moenies

Doen dít

  • Dink mooi oor jou roetine na. Die eerste probeerslag werk dalk nie op die lang duur nie. Dis nie prakties om elke aand die hele klankbaan van Baby Sense se wiegeliedjies deur te luister nie!
  • Wees voorspelbaar.
  • Hou alle rituele kalm.
  • Wees inskiklik: As jou kind siek is of spanning deurmaak, is dit in orde om van die roetine af te wyk. Moet dit egter nie heeltemal los nie.
  • Gee slaaptyd jou onverdeelde aandag.

Vermy dít

1. Moenie die ritueel te lank uitrek nie. Dit behoort sowat 30 tot 45 minute te duur, voeding ingesluit.

2. Moenie die ligte aanlaat nie. Jou kind moet leer om nie dag en nag te verwar nie en navorsing wys dat dit sleg vir sy gesondheid is om met ’n helder, brandende lig te slaap.

3. Moenie jou baba met ’n bottel in die bed sit nie. Melk en sap waaraan deur die nag gesuig word, kan tandbederf veroorsaak, vog kan in die ore opbou en dit kan ’n slaapassosiasie word wat hom in die nag laat wakker word.

4. Moenie jou kind te vinnig vaste kos voer nie. As hy nie daarvoor gereed is nie, gaan dit nie sy slaap bevorder nie.

Praktiese aandroetine

17:15 Bad

’n Warm bad is kalmerend. As jou baba dit toelaat, is ’n gepaardgaande babamassering van onskatbare waarde. Trek sy doek en nagklere rustig aan.

17:25 Word rustig

Speel ’n stil speletjie waar baba op die mat sit en rustig word.

17:30 Tyd vir ’n melkie

Vermy dat hy aan die slaap raak terwyl hy voed.

17:45 Vertel ’n storie, sing of speel musiek

Jou stem het ’n baie strelende uitwerking op jou baba. Vertel ’n kort storie in ’n stadige, afgemete stem of sing ’n wiegeliedjie. Kenners beveel ook aan dat jy dieselfde storie of liedjie elke aand herhaal. Jy kan ook kies om daarna Barokmusiek of rustige wiegeliedjies te speel, wat jou baba sal help om stelselmatig van vaak tot slaap oor te gaan. Dit doof ook ander geraas uit.

18:00 Lê neer

Sit jou baba in sy bedjie en vryf sy ruggie liggies tot hy amper slaap. Skakel dan die ligte af.

Wenk
Babas op vaste kos: Begin die roetine met sy laaste vastekos-maaltyd om 16:30.

Raakgekoop

Johnson’s se Baby Top-to-Toe-reeks reinig en bevogtig jou baba se vel sagkens. Babaolie R39,95 (200 ml), babareinigingsmiddel R39,95 (300 ml) en vogdoekies R32,95 (vir 72). Te koop by alle groot kleinhandelaars.