Daar’s is min dinge wat ’n baba so van die plesier kan laat jil as wanneer hy hom teen volle spoed in sy loopring wegskiet en die wêreld uit ’n heerlike hoogte kan verken. Nog lekkerder is dat jou hande losgemaak word om gou kos te kook of die wasmasjien te laai. 

Aan die een kant waarsku ontwikkelingskenners teen die gebruik van loopringe, maar aan die ander kant vertel jou skoonma dat haar kinders almal in loopringe rondgewoerts het en kyk net hoe oulik is hulle vandag.

Die eerste ding wat jy moet weet is dat ’n loopring jou kind nie gouer gaan laat loop nie. Om die waarheid te sê, in studies is gevind kinders wat dikwels in ’n loopring was, het gemiddeld later gesit, gekruip en geloop as dié wat nie loopringe gehad het nie.

’n Loopring help ma’s meer as babas, sê Riana Knouwds, ’n arbeidsterapeut van Vereeniging. 

“As jy jou kind ’n kort rukkie in ’n loopring laat ry behoort dit nie skade aan te rig nie, maar baie ma’s hou nie by die voorgeskrewe tyd nie.”

Alet Victor, ’n arbeidsterapeut van Centurion in Pretoria, sê arbeidsterapeute se hoofbeswaar teen loopringe is dat dit met die normale ontwikkelingspatroon van ’n baba kan inmeng.

“Dikwels wil ’n kind nie meer op die vloer rol of kruip as hy eers die regop gevoel van ’n loopring ervaar het nie, en so loop hy dan ander belangrike ontwikkelingsgeleenthede mis.”

Dit meng in met ontwikkeling

Riana sê ouers gebruik loopringe dikwels omdat babas dit geniet om alles te kan sien, maar ongelukkig gebeur dit dikwels voor die liggaam gereed is om ’n regop posisie te handhaaf.

“Die gevolg is dat baie babas dan later nie wil kruip nie, maar eerder regop wil wees. Kruip is belangrik vir spierontwikkeling, hand-oog-koördinasie, skouerstabiliteit en gewrig- en elmboogontwikkeling. Dit help die boog van die hand ontwikkel en maak die gewrigte sterker. Dit help babas ook om hul omgewing beter te verwerk en tasdefensiwiteit te voorkom. Daarby speel dit ’n belangrike rol in ruimtelik-visuele persepsie.”

Riana merk dikwels op dat kinders in die skool sukkel om lang rukke stil te sit.

“Dis soms omdat hul liggaam nie sterk genoeg is om ’n posisie te handhaaf nie. Die loopring help dit veroorsaak omdat babas minder kans kry om te kruip en die kruipstadium soms heeltemal oorslaan.”

Nog ’n probleem is dat babas se romp nie sterk genoeg word nie, sê Riana. “Die gevolg is dat hulle val-loop – die baba gebruik sy momentum om te beweeg en gebruik nie sy liggaam korrek nie.”

Elke baba se ontwikkeling volg ’n baie spesifieke patroon, verduidelik Alet.

“Elke vaardigheid wat jou kind bemeester, is ’n bousteen waarop ’n volgende behendigheid gebou word. Voor jou baba leer loop, moet sy kop- en nekspiere sterk wees sodat hy sy kop regop kan hou. Daarna moet hy leer rol, dan kruip, en dan loop.

“As ’n baba te vroeg in ’n loopring ry, kry die nodige spiere nie genoeg kans om te ontwikkel nie. Ander spiere, soos in die bal van sy voet, word weer oorgestimuleer. Dit kan sy simmetrie deurmekaarkrap. Dis amper soos ’n vrou wat net hoë­hakskoene dra en later nie meer platvoet kan loop nie.

“Verder gee die loopring te veel ondersteuning om die maagspiere, wat jou baba se loopbalans kan ondermyn.

“As enige van hierdie boustene nie na wense vasgelê word nie, benadeel dit ’n kind se hele ontwikkelingspatroon.”

Hand-oog-voet-koördinasie word onderdruk omdat jou kind minder vrylik op die vloer rondbeweeg, sê Alet. “Die loopring keer dat jou baba sy omgewing verken deur te vat, proe en voel – selfs al het party loopringe allerhande oulike aktiwiteite.”

Nog ’n probleem is dat ’n loopring net op een vlak beweeg.

Op hierdie ouderdom moet jou baba eerder die kans kry om in, uit, op, onder of deur meubels of ander hindernisse te kruip, klouter en seil. Hy moet ook uit een posisie in ’n ander probeer kom, soos van sit na staan, kruip na sit, of om hom teen banke op te trek. So kry al sy spiere en gewrigte op ’n natuurlike manier oefening en kry hy die kans om sy omgewing te verken.

“Die loopring gee te veel ondersteuning en jou baba se lyf is nie in die korrekte posisie nie. Hy hang gewoonlik in die loopring en beweeg net met behulp van die bal van sy voet. Babas skop dikwels ook eerder agtertoe of vorentoe en loop nie op hul voete nie,” sê Alet.

Riglyne vir loopringe

  • Jou baba se voete moet plat op die grond wees (hy moenie in die loopring hang nie) en hy moet hom self kan opstoot en regop kan staan.
  • Jou baba moet reeds kan rol, sit en kruip voor hy in ’n loopring geplaas word. • Plaas jou baba net vir kort rukkies in sy loopring: nie meer as 15 minute op ’n slag nie.
  • Hou die loopring weg van trappe waar dit kan afval, toue of riffels waarteen dit kan vassteek en afdraandes waar die loopring te vinnig sal versnel.
  • Maak seker jou huis is loopring­bestand. Onthou dat jou baba hoër as gewoonlik kan bykom.

Die regte tyd

Loopringe is vir baie ma’s ’n uitkoms in daardie moeilike oorgangsfase wanneer jou baba nog nie kan kruip nie, maar gefrustreerd heen en weer wieg en huil omdat hy nie kan kom waar hy wil wees nie. Maar hierdie einste frustrasie doen hom egter baie goed, sê die arbeidsterapeut Riana Knouwds.

“Dit laat hom die volgende trappie op die ontwikkelingsleer uitklim. Ons tel hulle te vinnig op omdat ons wil keer dat hulle huil. Frustrasie dwing jou kind egter om vir sy volgende vaardigheid te oefen. As hy dit nie doen nie, loop hy gehalte-ontwikkeling van sy spiere, visuele persepsie en vestibulêre stelsel mis.”

Die arbeidsterapeut Alet Victor meen loopringe kan wel ingespan word wanneer jou baba reeds kan kruip en al begin opstaan om te loop. “Dit sal hom dalk aanmoedig om ook sonder die loopring te probeer loop. Dit voor­sien ook dan in sy behoefte om regop te kom, versterk sy beenspiere en verbruik energie.”


Bly veilig

In Kanada is loopringe weens veiligheidsrisiko’s heeltemal verbode.

Die Stigting vir die Voorkoming van Kinderongelukke in Suid-Afrika raai die gebruik van loopringe af en waarsku dat talle babas jaarliks weens loopring-verwante beserings behandel word.

Volgens die stigting kry die meeste kinders seer as hulle met die loopring by trappe afval en so bene breek of kopbeserings opdoen. Voort­durende ouerlike toesig is dus ononderhandelbaar, waarsku hulle.

Beproef dit liewer

Die beste plek vir enige baba om te ontwikkel is op die grond, sê die arbeids­terapeut Alet Victor.

“Hier is hulle veilig, kan in en uit enige posisie kom en kan maklik en veilig besig gehou word. Laat jou baba iets interessants doen en maak die omgewing om haar veilig.”

Kinders kan van baie klein af betrek word by wat hul ouers doen, is haar raad. “As jy kos maak, kan jy jou baba ’n bakkie met meel of jelliepoeier gee om mee te speel. As pappa in die tuin werk, kan ’n bal, grafie of selfs net blare ingespan word. Bokse en emmers waaruit dinge in- en uitgepak kan word of waar jou kind kan in- en uitklim, hou kinders lank besig en sorg vir ure se plesier en ontdek­kingstogte.”