Wat is refluks?

As melk of kos wat in die maag is tot in die slukderm opstoot, word dit refluks genoem. Refluks is nie ongewoon nie en gesonde kinders en grootmense kan dit ’n paar keer per dag kry, gewoonlik ná ete. Jy weet meestal nie eens dit gebeur nie! Regurgitasie ontstaan wanneer die teruggespoelde melk tot in die mond kom en selfs by die mond uitkom. Refluks en regurgitasie is normaal as jou baba mooi groei en gelukkig is – jy hoef dus nie daaroor bekommerd te wees nie. Regurgitasie is meer algemeen by babas omdat hul slukdermpie nog so kort is, maar dit kom teen omtrent 12 maande vanself reg. As jou baba se lyfie hom egter nie self teen die gewone uitwerking van refluks kan beskerm nie, ontstaan reflukssiekte. Dit beteken dat die refluks meer gereeld as normaal is en langer duur, en dus probleme veroorsaak. Reflukssiekte moet behandel word.

Is dit reflukssiekte?

Een van die algemeenste tekens van reflukssiekte is gereelde regurgitasie, oftewel ’n baba wat baie spoeg. Dit alleen beteken egter glad nie dat sy reflukssiekte het nie. As hierdie gereelde gespoeg veroorsaak dat jou baba nie genoeg gewig aansit nie, infeksie in haar slukderm kry of soveel pyn het dat sy buitengewoon baie huil en selfs voedings weier, het sy reflukssiekte. ’n Baba met reflukssiekte kan ook baie prikkelbaar wees, hoes of haar ruggie krom trek van die pyn. Alle babas met reflukssiekte spoeg egter nie, en dit kan dus gebeur dat sy nooit spoeg nie en tog hierdie komplikasies ontwikkel. Ongelukkig is al die tekens van reflukssiekte nie-spesifiek en kan hulle ook deur ander toestande veroorsaak word. As ma kan jy dit dus nie self diagnoseer nie. As jy vermoed jou baba het reflukssiekte, moet jy liewer ’n pediater raadpleeg.

Dokters onderskei tussen spoeg, refluks en refluks-siekte.

By die pediater

Jou pediater sal vra wanneer die gespoeg begin het en hoeveel dae en hoeveel keer per dag jou baba spoeg. Hy sal ook jou baba se groei nagaan, uitvra oor voedings en soek na tekens van infeksie in die slukderm. Vertel jou pediater ook van enigiets anders wat jy opgelet het, soos as jou baba bloed opbring, donker stoelgange het, meer as gewoonlik huil, moeilik asemhaal, koors het of lusteloos is. In sommige gevalle sal jou dokter jou baba laat opneem om toetse te doen wat sal help vasstel of die refluks normale perke oorskry.

Verander voedingstyd

Giet ’n eetlepel vol borsmelk op die kombuiskas uit. Jy sal sien dat al is dit nie baie nie, lyk dit wel na baie. Die hoeveelheid wat jou baba spoeg lyk gewoonlik vyf keer meer as wat dit is. Al lyk dit dus of sy alles opgegooi het, is dit waarskynlik net ’n bietjie. Maak die volgende veranderinge aan jou baba se voedings:

  • Gee minder melk op ’n slag, maar meer gereeld. Gee ook melk op aanvraag, byvoorbeeld ’n bietjie elke twee uur pleks van groter hoeveelhede elke vier uur.
  • In sommige gevalle kan ’n koeimelkallergie ook regurgitasie veroorsaak. As jy borsvoed en jy vermoed koeimelkallergie is die probleem, kan jy twee tot vier weke lank alle suiwel uit jou dieet skakel en kyk of die gespoeg afneem. Vroue wat nie borsvoed nie, sal ’n spesiale borsmelkvervanger moet gebruik om dieselfde toets te doen – raadpleeg ’n dieetkundige om jou daarmee te help. As dit nie beter word nie, is suiwel nie die oorsaak nie en kan dit weer ingesluit word.
  • In die geval van reflukssiekte kan dit help om die voedings te verdik. Vra jou pediater of dieetkundige daaroor. Verdikte melk sorg wel dat minder melk by jou baba se mond uitkom omdat dit nie so hoog in die slukderm kan opbeweeg nie. Navorsing wys egter dat die melk nie minder kere in die slukderm opstoot nie, en die suur melk kan selfs langer in die slukderm agterbly. Dit gaan dus nie in alle gevalle die probleem oplos nie. As die slukderm te veel gebrand word, sal die dokter medisyne voorskryf wat die suur in die magie sal verminder sodat die melk wat opstoot, nie so brand nie. 

Dís hoe jy baba help

Of jou baba nou reflukssiekte het of net baie spoeg maar steeds gelukkig is, is daar tog ’n paar dinge wat jy kan doen om te help.

  • Winde kan die melk maklik laat uitkom. Vryf dus windjies gedurende en ná voedings versigtig uit sonder om druk op haar magie te sit. Laat haar op jou been sit eerder as dat sy oor jou skouer hang en vryf haar ruggie.
  • Hou jou baba direk ná ’n voeding sowat ’n halfuur lank so stil as moontlik en regop. Ruil haar doek dus liewer voor ’n voeding as agterna, en maak seker dat die doek nie te styf om haar magie span nie.
  • Die refluks kan minder wees as sy op haar maag pleks van haar rug lê. Moet jou baba egter nooit op haar maag of sy laat slaap nie, want dit verhoog die gevaar van wiegiedood. Belê in een of twee skuins kussings waarop jou baba kan slaap sodat haar bolyf gelig is.
  • Moet eerder nie ’n baba met refluks in ’n motorstoeltjie neersit nie, aangesien die posisie waarin jou baba sit refluks aanmoedig. Hou haar dus net in die motorstoeltjie terwyl julle ry en nie ander tye nie.
  • As jou baba bottel drink en spoeg, maak eers seker dat jy nie dalk net te veel melk op ’n slag gee en dit is hoekom sy spoeg nie.
Byt vas!
Oor die algemeen is die meeste babas wat spoeg gelukkig en kry hulle geen probleme nie. Net ’n klein persentasie ontwikkel reflukssiekte. Hoewel dit nie altyd maklik is nie, sal jy met genoeg ondersteuning daardeur kom. Reël kuierafsprake saam met ander ma’s wat ook babas het wat baie spoeg. Net die wete dat daar iemand anders is wat dieselfde as jy deurmaak, sal jou gemoed goed doen. Wanneer jou baba begin eet sal sy ook heelwat minder spoeg.

Raakgekoop

Maxi-Cosi se Stella-stootwaentjie R7 799, babawinkels landwyd.

Maxi-Cosi se Stella-stootwaentjie.
Het jy geweet?
Gaan na www.adsa.org.za om ’n dieetkundige in jou omgewing te vind.