Verbeel jou jy lê in ’n knus, warm, donker wêreld, omring deur dowwe klanke. Die volgende oomblik kyk jy vas teen ’n skerp lig en word jy oorweldig deur vreemde geluide en reuke. Daar word vir die eerste keer aan jou geraak ...

Dis hoe dit vir jou baba voel wanneer hy gebore word, want skielik moet sy sintuie oortyd begin werk.

JOU BABA SE VISIE

Klein babatjies is sensitief vir lig. Hulle sien net dowwe beelde en kan nie ver sien nie; net sowat 20 tot 25 cm. Interessant genoeg is dit omtrent hoe ver jou baba se gesig van joune af is wanneer jy borsvoed!

Namate ’n baba ouer word, verbeter syvisie. Waar pasgebore babatjies slegs die buitekant van patrone kan sien, herken hulle op drie maande die buitelyn van jou gesig wanneer jy die kamer binnekom.

Op vier maande begin jou baba kleure onderskei. Op ses tot sewe maande oud begin hy speelgoed bestudeer. Hy kan nou ook kleure net soos ’n volwas­se­ne onderskei.

Van agt tot 12 maande af kan hy al ’n speelding aan die ander kant van diekamer raaksien! So ’n groot baba sal ook graag dieselfde boekie oor en oor wil bekyk.

Wat jy kan doen

  • Maak oogkontak met jou baba wanneer jy borsvoed.
  • Gee hom speelgoed met kontraste­rende kleure; dit help hom om kleur en vorm te begin onderskei.
  • Moenie jou baba oorstimuleer met te veel speelgoed met flitsende ligte nie.
  • Gee hom ’n veilige spieël om mee te speel.
  • Hang tot ses maande oud ’n bewertjie bo sy bed en stootwaentjie sodat hy die voorwerpe met sy ogies kan volg.
  • Wissel speelgoed elke dan en wan af sodat baba iets nuuts het om visueel te ondersoek.

JOU BABA SE TASSINTUIG

In die eerste paar maande van sy lewe is jou baba van jou afhanklik vir aanraking. Hy beskik nog nie oor die hand-oog-koör­dinasie om self aan goed te vat nie.

Jou klein baba is baie sensitief vir aanraking en verkies sagte materiale. Babas voel ook met hul mondjie en vanaf vier maande leer hulle baie deur voorwerpe in hul mond te sit.

Dit is nou die tyd om jou baba aan verskillende teksture bloot te stel. Wanneer hy begin beweeg, is hy vry om die wêreld te ontdek en die teksture en oppervlakke in jul huis en tuin te verken.

Wat jy kan doen

  • Maak baie vel-tot-vel-kontak met jou baba. Dit laat hom geborge voel en kan selfs sy immuniteit versterk.
  • Masseer jou babatjie.
  • Stel jou groter baba aan verskillende teksture en temperature bloot.
  • Laat jou baba toe om morsig te speel.
  • Gaan na die webtuiste van The International Association of Infant Massage by iaimsa.co.za om vas te stel waar jy ’n kursus in babamassering kan volg.

JOU BABA SE GEHOOR

’n Pasgebore baba kan niks van die mengelmoes klanke om hom verstaan nie, maar hy is klaar besig om die wêreld deur sy oortjies te leer ken. Babas verkies menslike stemme bo ander geluide. Hulle verkies ook hoë stemme, daarom is jou instink om babataal te praat in die kol!

Namate jou baba ouer word, word sy vermoë beter om te hoor en klanke van mekaar te onderskei. Op net vier dae oud kan jou klein Einstein al sy moedertaal van ander tale onderskei.

Tussen drie en sewe maandebegin hy verskillende klanke uitken en op sewe maande herken hy sy naam. Tussen agt en 12 maande luister jou baba wanneer daar met hom gepraat word en herken hy woorde soos bal en bad.

Wat jy kan doen

  • Gesels gedurig met jou baba.
  • Speel vir hom musiek.
  • Vermy onnodig steurende klanke, soos die televisie wanneer niemand kyk nie.
  • Sing vir jou baba. Jou baba is dol oor jou stem.

JOU BABA SE REUKSINTUIG

Jou baba se reuksintuig is al met geboorte goed ontwikkel en hy leer jou geur vinnig ken. Hy is baie sensitief vir reuke en hou nie van slegte reuke nie.

As jy jou baba fyn dophou, sal jy agterkom hoe sy reuksintuig ontwikkel. Iewers tussen vier en ses maande sal hy die kos wat jy vir die res van die gesin berei, begin ruik en daarin belangstel.

Wanneer hy gemaklik met vaste kos is, kan jy van jul kos vir hom fynmaak. So leer hy om die geur en smaak met mekaar te vereenselwig.

Van agt maande af kan jy sy reuksintuig begin stimuleer. Stap buite en gee hom dinge om te ruik, van die soet geur van blommetjies tot die reuk van ’n rubberbal.

Wat jy kan doen

  • Vermy sterk gegeurde sepe en was­poeiers omdat dit ’n baba se reuksintuig kan oorstimuleer.
  • Vermy sterk parfuum terwyl jy borsvoed.