Om die eerste ses weke met ’n baba te oorleef, is ’n reuse-taak – maar om dit met ’n meerling te doen, is ontsagwekkend! Ma’s wat al daar was en dit oorleef het, sê hoewel die versorging van hul babas in die vroeë maande die moeilikste was, dit mettertyd baie makliker geword het. Daar is soveel vervulling en bevrediging daarin om meerlinge groot te maak, maar as jy wil oorleef, moet jy jou goed voorberei.

Maak so reg

Vind ’n meerling-steungroep in jou omgewing of sluit aan by ’n aanlyn-forum om met ander ma’s in dieselfde omstandighede te gesels. Jy sal nuwe vriende maak en die geleentheid hê om besonderhede en bekommernisse met ander ouers in dieselfde bootjie te bespreek. Hier volg die belangrike dinge wat jy nog voor jou babas se geboorte moet doen.

Organiseer hulp. Dis ’n groot ding om ’n meerling te hanteer. As jy dus weet jy het ondersteuning, maak dit die taak baie makliker. Praat met jou familie of vriende oor wie wat vir jou kan doen – nie net in noodgevalle nie, maar ook wanneer jy ’n blaaskans nodig het.

Sorg vir ’n goed ingerigte kamer. Sonder ’n plek af waar jou babas gaan slaap, bad en selfs voed. Maak seker dis goed toegerus met bababenodigdhede en dat alles maklik toeganklik is wanneer jy dit nodig kry. Oorweeg ’n tweeling-wiegie as julle nie ’n gesinsbed gaan deel nie.

Kies name. Moenie vergeet om jou babas se name te kies nie. Jy gaan min tyd hê om daaraan te dink as hulle eers daar is. Skryf sommer ook al jou geboorteaankondiging.

Berei boeties en sussies voor. Gesels met die ouer kinders oor wat met die babas se koms gaan verander. Maak hulle deel van die kamervoorbereiding. Sit ook “stiltyd-speelgoed” bymekaar, en verslap jou streng reëls oor skermtyd effens.

Voorgeboorteklasse. Woon voorgeboorteklasse vir meerlinge by as jy dit enigsins kan bybring. Moenie te lank daarmee wag nie, want meerlinge word meestal vroeg gebore. Jy wil dus voor die geboorte klaar opgelei en gereed wees.

Herken ’n voortydige geboorte. Statistiek wys dat 70 persent van meerlinge vroeg gebore word. As jy die tekens daarvan herken, sal jy vinnig en doeltreffend kan optree wanneer dit gebeur. Jou dokter, ginekoloog en boeke is goeie bronne van inligting, maar die joernalis Helen Mulley, ma van Joseph en Tev, sê jy moet liefs enige onverwagte simptome dadelik met jou dokter deel, al is dit hoe vreemd. “Ek is op 38 weke geïnduseer, want my lyf – veral die dele om my gewrigte – het vreeslik gejeuk. ’n Google-soektog het gewys dat dit een van die simptome is van verloskundige cholestase, wat te doen met ’n oorwerkte lewer en wat algemeen in die laaste trimester met meerlingswangerskappe voorkom. Dit word ook verbind met doodgeboorte. Ek het dit aangemeld, hulle het my lewerfunksie getoets en het my onmiddellik vir ’n induksie laat kom.”

Jou babas is hier

Dis aansienlik makliker om ’n tweeling te versorg as jy hulp van buite in die vorm van familie of vriende kan kry. Selfs al is jy ’n uiters doeltreffende en geduldige ma wat glo jy kan alles vir ’n onbeperkte tyd hanteer, gaan die aanhoudende versorging van ’n meerling jou in ’n stadium gedaan laat voel. “Gelukkig het ek ’n geduldige maat en ’n baie ondersteunende ma en suster, maar selfs met hierdie hulp was dit baie moeilik,” sê Helen. “Dit was frustrerend dat ek nie al my aandag tegelykertyd aan albei seuns kon wy nie, en dit het my veral gevang as ek gesels het met die ma’s van enkelkinders van dieselfde ouderdom as my twee. Dit het geklink of hulle van vroeg af ’n betreklik romantiese verhouding met hul pasgeborene gehad het.” Die geheim is om te leer om jouself te vergeef omdat jy net een mens is, is Helen se raad. “ Jy moet ook alle hulp aanvaar wat aangebied word. Moenie trots probeer wees nie. En moenie bang wees om gevoelens te verwoord wat die boodskap uitstuur dat jy nie ’n ’natuurlike’ ma is nie. “Jy sal gou agterkom dat die meeste mense ’n bietjie soos jy voel, selfs daardie ‘romantiese’ ouers van enkelkinders. Babas gaan jou altyd die middelpunt van hul bestaan maak, al het jy op daardie oomblik ander verpligtinge ook.”

Haar gewrigte het vreeslik gejeuk – toe google sy en sien dis iets wat meerling-ma’s oorkom en ’n induksie kan vereis!

Slaap en voeding

Ervare ma’s stem oor die algemeen saam dat pasgebore tweelinge (en meerlinge) ’n 24-uur-slaap- en voedingskedule nodig het. Pasgeborenes slaap 14 tot 18 uur per dag in die eerste week en van 12 tot 18 uur teen die tyd dat hulle een maand oud is. Dit sluit dagslapies van sowat twee tot drie uur in.

Beplan dus slim om te sorg dat jy ook genoeg slaap inkry. Dit maak nie saak hoeveel jy het om te doen nie, slaap wanneer jou babas slaap. Jy kan uitbrand as jy produktief probeer wees en take probeer afhandel terwyl jou babas in droomland is. Kry eerder een van jou “helpers” om die skottelgoed te was, inkopies te doen of die badkamer skoon te maak. Jou prioriteit is om te voed, te versorg en broodnodige slaap in te kry.

Moenie ’n martelaar wees nie. Wees voorbereid vir wanneer jou babas in die nag wakker word. Hou die doeke en ander benodigdhede byderhand sodat die babas (en jy) vinniger terug in die bed kan kom. Jy kry moontlik teenstrydige raad oor wanneer om jou babas te voed. Dit kan ontwrigtend wees as jy op aanvraag jou bors (of die bottel) aanbied wanneer hulle honger is en dan die een voed en sy doek ruil terwyl die ander een slaap.

Hou tred met elke baba se voeding en doekruilings deur ’n tabel in te vul. Soms kan dit ook help om by ’n skedule te hou wat jou toelaat om hulle saam te voed. Babas van dieselfde gewig en metabolisme sal waarskynlik teen dieselfde tyd honger wees. Dit sal dinge ongetwyfeld makliker en minder stresvol maak. Dit sal egter nie altyd moontlik wees nie. Gesels met die pediater om jou te help om die regte benadering te ontwikkel.

En as daar 3 of meer is?

As jy een van daardie gelukkige ma’s is wat drie vir die prys van een gekry het en jy beoog om te borsvoed, het jy die volgende keuses:

  • Borsvoed een of twee van hulle en bottelvoed die ander een. Roteer dit oor ’n tydperk van 24 uur sodat elkeen van hulle ’n beurt kry om aan die bors te drink.
  • Borsvoed al drie op verskillende tye. Hierdie opsie is baie tydrowend en stresvol, aangesien jy nie baie tyd vir slaap gaan oorhê nie.

Jou gesondheid is van die grootste belang as jy ’n drieling suksesvol wil borsvoed. Eet gesonde kos, drink genoeg vloeistof en kry genoeg rus. Dit behoort genoeg te wees, maar laat weeg jou babas gereeld – ongeveer twee keer per week – om seker te maak hulle sit genoeg gewig aan.

Wat is Helen se topwenk vir ma’s van tweelinge? Die “babakatposisie”. Terwyl almal voorstel dat jy jou broos pasgeborene soos ’n delikate stuk porselein optel terwyl jy die lyfie met die een hand ondersteun en met die ander hand die koppie vashou, moet ma’s met tweelinge doen wat ma’s met net een arm kan doen.

Plaas baba A veilig op jou skoot en baba B op sy ruggie langs jou. Gryp dan ’n handvol van baba B se groeipakkie en frokkie vas en lig hom aan sy bors op tot hy langs baba A lê. Hou te alle tye sy ruggie parallel met die bank sodat geen stremming op sy nek of rug geplaas word nie.

10 algemene foute wat nuwe meerling-ouers maak

1. Hulle is te doeltreffend

Dit werk nie altyd om ’n handleiding streng te volg nie, want gesinne het verskillende gewoontes en behoeftes. Wees eerder buigsaam in jou benadering en beproef ’n verskeidenheid skedules, tegnieke en produkte – een behoort vir jou te werk.

2. Hulle ontspan en rus nie genoeg nie

As ’n mens die heeltyd daarop fokus om die regte ding te doen en al jou aandag aan jou kinders toewy, kan jy jouself afskeep. Plaas iemand in beheer terwyl jy gaan bad, stap of slaap. Jy sal verbaas wees oor hoe goed dit voel.

3. Hulle pak te veel aan

Jou babas het in die eerste paar maande jou onverdeelde aandag nodig. Dis nie nou die tyd om ’n projek aan te pak, ’n nuwe stokperdjie te begin of die huis van voor tot agter skoon te maak nie. Daar gaan later meer as genoeg tyd daarvoor wees.

4. Die babakas is leeg

Twee of meer babas werk hul pad teen ’n verstommende pas deur goedere en voor jy weet, is alles opgebruik. Hou die kas vol doeke, vogdoekies en wat jy ook al nodig kan kry.

5. Hulle slaap nie

Vind tyd om te slaap – dit gaan jou in staat stel om jou pasgebore spannetjie baie doeltreffender te versorg.

6. Hulle het nie 'n stootwaentjie nie

’n Stootwaentjie gaan waarskynlik jou beste belegging wees. Moenie te veel oor die prys kibbel nie – ’n waentjie van goeie gehalte sal jou lewe aansienlik makliker en plesieriger maak.

7. Hulle is ongeorganiseerd

Dit help baie as jy ’n tabel invul om tred te hou met voedingstye, hoeveelhede, doekruilings, medikasie en ander belangrike dinge. Dit sal jou ook in beheer laat voel. As dit nodig is, kan jy jou babas uitken deur ’n bietjie naellak op ’n toonnael te verf – dit is prakties.

8. Hulp is ongeorganiseerd

Organiseer die mense wat jou help doeltreffend. Wees spesifiek met jou opdragte en delegeer soveel jy kan sodat jy op jou prioriteite kan fokus.

9. Julle is kluisenaars

Baie ouers sluit hulle in hierdie tyd van die wêreld af. Nooi vriende oor vir koffie en koek en laat hulle dit maak en voorsit!

10. Depressie slaan toe

Onthou dat dinge net tydelik is en dat babas grootword. Hulle gaan binnekort minder voed en meer slaap. Behou perspektief en beskou alles as deel van ’n proses. Praat met ander oor hoe jy voel, die dokter en pediater inkluis. Dit sal verbygaan. Geniet in hierdie vroeë maande wat jy kan.

Getty Images
Uit die mond van ma’s wat weet
  • Maak tyd om uit die huis te kom. Doen dit gereeld. Die vars lug sal jou en jou babas goed doen. Wanneer hul voeding- en slaapgewoontes meer begin ooreenstem, word dit makliker om daardie kosbare uitstappies aan te durf. Sit die babasakke die vorige aand reeds reg.
  • Gee iemand anders ’n beurt. As jy hulp het om die meerlinge te versorg, maak beurte sodat een van julle altyd uitgerus is.
  • Jou huis. Jou huis hoef nie altyd vlekkeloos en netjies te wees nie. Die belangrike ding is dat jy seker maak alles werk en dat jy jou baba goed kan versorg. Babatoerusting in amper elke kamer gaan dinge makliker maak.
  • ’n Daaglikse bad. Dit is nie nodig om al jou babas elke dag te bad nie. ’n Bo-en-onder-bad of ’n bad elke tweede dag is heeltemal in die haak. Melkvoedings en doekruilings is egter prioriteite.
  • Vergeet van kieme. Moenie te veel oor kieme bekommerd wees nie – jy hoef nie elke baba se toerusting apart te hou nie. Hulle bring soveel tyd naby mekaar deur dat hulle gewoonlik kieme deel.
  • Blink ogies is belangriker as blink deurknoppe. ’n Gelukkige kind met ’n vol magie is belangriker as aandete en huiswerk. Moenie skuldig voel omdat jy eerder tyd saam met jou babas deurbring nie. Delegeer al die ander sleurtakies aan iemand anders.