Spraak- en taalontwikkeling is van die belangrikste mylpale in vroeë kinderontwikkeling. Die meeste van ’n kind se toekomstige sosiale en verstandelike ontwikkeling hang van hierdie mylpale af. ’n Taalagterstand kan lei tot isolasie, frustrasie, leerprobleme, gevolg deur ’n lae selfbeeld en swak akademiese prestasie.
Hoe kan jy seker wees jou kind se spraak-en taalontwikkeling is op die regte vlak en hoe kan jy help om hierdie mylpaal die beste te bereik?
Baie mense glo kinders loop op een en praat op twee. Dit is egter nie so nie, want reeds op eenjarige ouderdom moet hulle al enkele woordjies kan sê. Die eerste drie jaar van ’n kind se lewe is die belangrikste tydperk om spraak en taal aan te leer. Dis dan dat kinders die taal van hul omgewing soos sponse absorbeer.
