Wanneer jou baba vir sy eerste mediese ondersoek gaan, is reflekse een van die belangrikste dinge op die pediater se lys. Reflekse help babas om in die eerste dae ná hul geboorte te kommunikeer, oorleef en groei.

Neurotipiese babas (dus babas sonder gestremdhede) behou sekere reflekse, maar die meeste verdwyn later terwyl ’n paar nuwes bykom.

Suigrefleks

’n Sterk suigrefleks is ’n teken van ’n gesonde voltermynbaba. Dit is ’n oorlewingsrefleks wat verseker dat jou baba onmiddellik begin suig sodra jy jou tepel in sy mondjie sit. Dié refleks is op sy duidelikste kort voor ’n voeding wanneer jou baba wakker is.

As jy jou vinger of tepel in sy mond sit, sal hy sterk suigbewegings maak. Hy beskik al van 24 weke swangerskap af oor die suigrefleks, maar sal waarskynlik eers van 36 weke swangerskap af sterk genoeg kan suig om te kan borsvoed.

Hierdie refleks verswak geleidelik en verdwyn teen die ouderdom van omtrent ’n jaar.

Soekrefleks

Dis ’n uiters nuttige refleks, veral as dit by jou baba se voeding kom. Jy kan dit inspan om jou pienkvoet beter te laat vassuig omdat dit jou beheer gee oor hoe hy sy mond oopmaak en sy kop draai.

As jy aan sy mondhoek of wangetjie raak, sal hy outomaties sy kop in die rigting van die aanraking draai met sy mondjie wawyd oop en sy lippies soekend na jou tepel. Moenie sy kop na die tepel probeer druk deur aan sy wang te raak nie, want dan gaan hy na die verkeerde kant toe draai.

Dié refleks kan jou baba ook uit die slaap hou as daar gedurig ’n kombersie is wat aan sy wang raak. Aanraking aan ander dele van sy mond sal soortgelyke reaksies ontlok: As hy op sy rug lê en jy raak met jou vinger aan die middel van sy onderlippie en beweeg dit af na sy ken, sal sy mondjie outomaties oopgaan terwyl hy sy tong op die vloer van sy mond hou.

As jy met jou vinger op die middel van sy bolip druk en dit na sy neusie opbeweeg, sal sy mondjie oopgaan en sy tongetjie sal teen sy verhemelte wees. Al drie hierdie reflekse is gewoonlik twee tot drie dae ná geboorte teenwoordig en verdwyn dan geleidelik in die loop van ’n paar maande.

Asimmetriese toniese nekrefleks

Dié refleks is gewoonlik met geboorte al teenwoordig. Dit staan ook bekend as die skermpostuur. Wanneer jou baba se koppie na een kant gedraai en 15 sekondes lank in daardie posisie gehou word, sal die arm en been aan daardie kant reguit word en die teenoorgestelde arm en been sal outomaties buig.

Dit word minder opvallend tussen drie en vyf maande. As jou baba nie uit hierdie posisie kan loskom nie of die refleks langer as ses maande aanhou, kan dit op probleme dui.

Duikrefleks

As ’n baba reg ná geboorte in die water beland, soos met ’n watergeboorte of selfs in ’n swembad, sal sy keel outomaties toetrek sodat hy nie water sluk nie en sal hy sy asem ophou. Moet dit egter om vanselfsprekende veiligheidsredes nie tuis beproef nie.

Hierdie refleks verdwyn gewoonlik teen twee maande oud.

Terugtrekrefleks

Dié refleks is gemik op die vermyding van pyn. ’n Speldprik op baba se voetsool sal veroorsaak dat hy sy been en voet vinnig terugruk en die ander been en voet uitstoot. Dié refleks word kort ná geboorte sigbaar.

HET JY GEWEET? Jou baba het sowat 26 verskillende reflekse wat deur dokters gebruik word om sy algehele fisieke en neurologiese welstand te toets en te meet.
Getty Images

Die plantare vatrefleks (toonvasvat-refleks)

Jou dokter sal dit toets deur sagte drukking onder jou baba se voetjie toe te pas terwyl hy met sy beentjies gedeeltelik gebuig op sy ruggie lê. Jou kleinding se tone en die bol van sy voet sal na die dokter se hand toe buig.

Hierdie refleks is teenwoordig met geboorte, vervaag geleidelik en verdwyn teen twee tot drie maande oud. Die plantare refleks word soms verwar met die Babinski-refleks, waar die kant van die voet ferm gestreel word en baba se tone dan reguit sprei.

Dié refleks is ook teenwoordig met geboorte en verdwyn geleidelik in die eerste jaar.

Asemteugrefleks

Dis daardie wonderlike refleks wat jou baba sy eerste asemteug laat neem sodra hy gebore word. Dokters is nog nie seker wat presies dit aanmoedig nie.

Palmare vatrefleks (vatrefleks)

Met hierdie refleks kan jy ’n ouer sussie flous dat baba vreeslik lief is vir hom, want hy hou dan haar handjie so styf vas! As jy ’n vinger of voorwerp in baba se handpalm druk, gryp hy dit ferm vas. Jou baba sal jou vinger so styf vasgryp dat jy hom daaraan sal kan optrek, maar hy kan ook skielik sonder waarskuwing laat los.

Dié refleks is reeds vanaf 32 weke swangerskap teenwoordig en sal ná twee of drie maande verdwyn. Jou baba sal dan voorwerpe laat val wanneer jy dit in sy handjie sit tot hy later leer om dit willekeurig vas te hou.

Kruiprefleks

As jou baba op sy maag lê en sy voetsole word aangeraak, sal hy sy bene in ’n kruipposisie tot onder sy maag opbeweeg. Hierdie refleks begin teen vier maande oud verdwyn.

Willekeurige kruipbewegings begin eers verskeie maande later.

Outomatiese looprefleks

Jou dokter sal jou baba ondersteun terwyl hy hom in ’n staande posisie hou met sy voetsooltjies op ’n harde, plat oppervlak. Jou baba sal dan sy voetjies afwisselend een voor die ander plaas soos ’n baba wat probeer loop.

Hierdie refleks duik op tussen twee dae en drie weke ná geboorte en verdwyn gewoonlik weer teen sowat ses weke.

Moro-refleks (skrikrefleks)

Dié refleks laat jou baba op ’n harde geluid reageer deur sy arms wydoop te gooi en dan weer nader aan sy lyfie te trek wanneer hy op sy rug lê. Waarskynlik sal hy daarna begin huil. Die Moro-refleks verdwyn geleidelik teen drie tot vier maande oud.

Dit word gewoonlik deur dokters gebruik om jou kind se fisieke en neurologiese ontwikkeling te toets. ’n Swak, gedeeltelike of asimmetriese reaksie kan op siekte of breinskade dui, en baie vroeggebore babas se Moro-refleks is ook nie 100 persent nie. ’n Oorreaksie kan weer op ’n siekte soos meningitis dui.

As die refleks teen ses tot agt maande nog teenwoordig is, kan dit ook die gevolg wees van vroeë geboorte of breinskade.