Werk slim met jou mediese fonds

akkreditasie
Hoe om die meeste uit jou mediese-fonds-plan te haal.

Dokters, hospitale en medisyne kos geld. Baie geld. En met elke kind styg jou mediese uitgawes. Dankie tog dus vir mediese fondse – maar dié instellings vreet self elke maand ’n groot hap uit jou sak en as jy boonop bybetalings moet doen of as jou voordele halfpad deur die jaar opraak, voel jy lus om nes jou kind ’n aanval van vloerstuipe te kry.

Met kinders kan ’n mens nie sonder goeie mediese sorg nie. Die goeie nuus is dat jy baie kan doen om jou mediese kostes laag te hou.

Kies jou mediese fonds slim

Daar is ’n swetterjoel mediese fondse op die mark. Hoe besluit jy watter een die beste vir jou is? ’n Goeie begin is ’n besoek aan webtuistes soos www.medicalaidcomparisons.co.za of www.hippo.co.za/medicalinsurance. asp.

Hier kan jy die voordele, opsies en kostes van die verskillende mediese skemas vergelyk. Ons het David Bombal, hoof van bemarking by Old Mutual Health Solutions, gevra om ons deur die doolhof van mediese fondse en keuses te begelei.

Hy sê as jy geld wil spaar, moet jy weet wat jou gesin se behoeftes is en dit dan pas by die regte mediese fonds en voordele-opsie. Elke goeie mediese fonds behoort jou ’n reeks voordele-opsies te gee om van te kies, sê David. (Jy kan jou voordele-opsie een keer per jaar verander om aan te pas by jou gesin se veranderende behoeftes.)

“Die keuse van opsies is gewoonlik waar die verwarring begin, want dis nie altyd maklik om te verstaan nie en jy kan dalk uiteindelik betaal vir allerhande dekkings wat jy eintlik nie nodig het nie.”

David verduidelik dat mediese fondse basies op 3 breë gebiede dekking bied:

  1. In die hospitaal vir operasies, kraam, en so meer.
  2. Buite die hospitaal vir jou dag-totdag mediese kostes soos dokter- of tandartsbesoeke en voorskrifmedikasie
  3. Chroniese medikasie vir die deurlopende behandeling van spesifieke toestande.

“Eenvoudig gestel sal die vlak van dekking wat jy in elkeen van hierdie drie areas kry bepaal wat jy betaal en jy moet jou keuses dus daarvolgens maak.

Prioriteit #1: Hospitaaldekking

Hospitaaldekking is ononderhandelbaar, beklemtoon David. “Alle mediesefonds-voordele- opsies bied dit en dis eintlik die ware rede vir fondsdekking. Dis dus belangrik dat jy dit reg doen. Jy kan binne ’n oogwink groot mediese rekeninge in ’n hospitaal opbou en gehaltedekking is dus noodsaaklik.”

Die invloed hiervan op die koste van joumediese fonds word veral bepaal deur die hospitaaldekking en die totale dekking wat voorsien word, sê David. Die kernvraag Bied die opsie dekking teen privaat tariewe of mediesefondstariewe?

“Dié verskil in dekking kan belangrik wees as jy in die hospitaal beland,” sê David. “ ’n Plan met dekking teen mediesefondstariewe dek jou tipies vir een keer die tarief wat deur die Nasionale Gesondheidsverwysingspryslys (NGVPL) voorgeskryf word, terwyl privaat tarief-opsies jou vir 2 of 3 keer dié tarief dek.”

Byvoorbeeld: Volgens 2009 se NGVPL is die verwysingsprys vir ’n ginekoloog by ’n natuurlike geboorte R2 194, maar ’n ginekoloog kan drie tot drie en half keer dié tarief vra. Teen drie keer die tarief sal dit jou R6 582 kos, en as jou dekking teen mediesefondstariewe is, sal jy sowat R4 388 uit jou eie sak moet opdok. En dit sluit nog nie die narkotiseur se rekening vir epidurale verdowing in nie.

David beklemtoon dat die dekkingstarief krities belangrik is. “Om duurder vir ’n voordeelopsie te betaal, kan hier dus eintlik op lang termyn beteken dat jy minder betaal.”

’n Alternatief: Jy kan ook bykomende gapingdekking kry. “Dis ’n bykomende versekeringsproduk wat jy kan koop en dit betaal die verskil tussen wat die spesialis in die hospitaal vra en wat die mediese fonds betaal – tot by ’n sekere maksimum.”

Hierdie opsie kan jou sowat R100 per maand kos, en jou dekking kan aangevul word tot sowat vier keer die NGVPL-tarief. Dit beteken jy het ’n mediesefondstariefhospitaalplan, maar kan steeds die voordeel van privaat tariewe geniet deur ’n klein bedraggie ekstra per maand te betaal.

Beperkings en voordele:

Dis ook belangrik om na die totale dekking van jou hospitaalvoordele te kyk, sê David. “ ’n Plan met ’n totale jaarlikse grens van byvoorbeeld R500 000 vir hospitaaldekking sal baie -goedkoper wees as ’n plan met ’n onbeperkte limiet.

Net so behoort ’n plan wat jou dekking gee in ’n spesifieke netwerk hospitale goedkoper te wees as een wat jou in enige hospitaal dekking gee.

Sublimiete:

"Sommige voordele-opsies bied ‘onbeperkte hospitaaldekking’ en gee jou dan ’n sublimiet vir ’n verskeidenheid prosedures soos die behandeling van kanker, nierdialise, orgaanoorplantings en soms selfs kraam. Of kraam kan beperk word tot natuurlike geboorte en noodkeisersneë en elektiewe keisersneë uitsluit.

Jy kry dus waarvoor jy betaal.” Dis uiters belangrik om die fyn druk ook te lees, beklemtoon David. “As jy ’n goedkoop hospitaalplan oorweeg, kyk na jou keuse van hospitale, die keuse van spesialiste daar, bybetalings op uitgesoekte prosedures, die dekkingstarief en die algehele jaarlikse voordele-perk en sublimiete op sekere prosedures.”

Prioriteit #2: Dag-tot-dag-uitgawes

As jy die regte hospitaaldekking in plek het, kan jy dag-tot-dag-voordele by jou mediese fonds voeg – of kies om hierdie uitgawes self te betaal.

“Vir sommige gesinne is dit nie die moeite werd om buitehospitaal-dekking van ’n mediese fonds te kry nie, vir ander maak dit weer sin. Die sleutel is om bewus te wees van hoeveel geld jy tipies aan gesondheid uitgee en dan te verstaan presies wat jou mediese fonds sal dek en tot watter waarde. Daarna kan jy besluit.”

Die mediesefonds-opsie Daar is ’n verskeidenheid strukture en opsies beskikbaar vir dag-tot- dag-onkostes, verduidelik David. “Dis hier waar mediese fondse gekompliseerd kan begin raak!”

Basies kom dit neer op twee soorte dekking: tradisioneel en nuwe-generasie – met ’n hele spektrum tussenin.

Nuwegenerasie-dekking:

Dis waar ’n jaarlikse voordelebedrag vir buitehospitaalmediese kostes toegeken word en jy dit kan bestee soos jy verkies, sê David. “Tipies is dit besparings en rol dit oor van een jaar na die volgende, wat beteken jou fonds bou op in jare wat jy minder eis om jou meer geld te gee in jare wanneer jy meer eis.

As jy die mediese fonds verlaat, word jou oorblywende ‘spaargeld’ aan jou uitbetaal. As jy dus nie baie eis nie en jou buitehospitaal- mediese koste goed beheer, is dit ’n uitstekende opsie. Dit pas ook mense wie se uitgawes tipies gefokus is op een of twee gebiede soos huisdokters en medisyne, aangesien jy al jou voordele in ’n enkele area kan uitgee.”

Tradisionele dekking:

Dis wanneer jy ’n sublimiet per dekkingsarea kry, soos ’n beperking op die geld vir gewone doktersafsprake, een vir akute voorgeskrewe medisyne, een vir die tandarts en so meer. “Wanneer jy ’n limiet in een van dié areas bereik het, betaal jy die res van die jaar self vir verdere uitgawes, maar jy kan nog onder ander sublimiete eis.

Soms is daar ’n algehele jaarlikse limiet. Al kan jy dus nie meer huisdokter toe gaan nie, kan jy steeds ’n fisioterapeut besoek tot daardie jaarlikse limiet bereik is.”

Tussenin is ’n hele paar ander opsies. “Sommige opsies voorsien ’n netwerkdiens, byvoorbeeld onbeperkte basiese tandheelkunde mits jy van ’n spesifieke netwerk tandartse gebruik maak.

Nog ’n opsie kan ’n drempelvoordeel bied, waar jy kan eis tot op ’n sekere punt en daarna betaal die mediese fonds onbeperk vir ’n reeks behandelings (’n veiligheidsnet vir jare wanneer jy baie eis).

Ander kan tradisioneel in struktuur wees met ’n spaarstelsel daarby en ’n algehele jaarlikse limiet.”

Bykomende dekking

Dit verwys na voordele wat nie jou algehele buitehospitaalbeperkings raak nie, maar sy eie sublimiete het. Dit sluit in die koste van medikasie watuit die hospitaal geneem word, duur skanderings (gespesialiseerde dienste buite die hospitaal), kunsledemate en so meer.

As jy self wil betaal

Vir mense met goeie selfdissipline is dit soms beter om net ’n hospitaalplan te kry en buitehospitaalkoste self te finansier, sê David. “Maak die sommetjies en jy kan dalk verbaas wees.

’n Gesin van vier kan miskien sowat R2 300 vir ’n goeie hospitaalplan betaal en R3 700 vir soortgelyke hospitaaldekking plus tradisioneel gestruktureerde buitehospitaal-voordele. Dis R1 400 per maand ekstra.

As die jou gewone doktersafsprake dan byvoorbeeld beperk word tot sowat R5 000 per jaar, kan ’n gesin wat die meeste van hul buitehospitaalkostes aan doktersafsprake en medisyne bestee, uitwerk dat dit dalk beter is om ’n hospitaalplan te hê en die R1 400 apart te spaar, sodat hulle uiteindelik sowat R16 800 ’n jaar het om op buitehospitaal-kostes uit te gee.”

Prioriteit #3: Chroniese toestande

Volgens wet moet ’n mediese fonds in al sy voordele-opsies dekking bied vir 25 chroniese toestande. Dit staan bekend as die voorgeskrewe minimum voordele (VMV). Dit sluit in toestande soos hoë bloeddruk, diabetes, cholesterol en asma.

Wat verskil is die vlak van dekking vir hierdie opsies. Goedkoper opsies kan jou keuse van medikasie beperk, die koste per voorskrif, asook die diensverskaffer of apteek wat jy kies, sê David.

“As jy of jou kinders ’n nie-VMV-toestand het, bied skemas wel dikwels ’n vorm van dekking – met limiete of daarsonder – by sekere duurder voordele-opsies vir ’n lys vasgestelde toestande. Maak jou eie sommetjies om te sien of die koste van ’n opgradering minder is as die koste van die medikasie per maand.”

Stap 2: Slim met doktersbesoeke

  • Vra jou dokter en apteker vir generiese medisyne – dit bevat dieselfde bestanddele en is baie goedkoper.
  • Moenie kanse waag met jou kind se gesondheid nie, maar vra jou af of ’n doktersbesoek regtig nodig is. Soms kan jou apteker net so goed help – verniet.
  • Vra jou dokter vir afslag op kontant.
  • Gesels met jou dokter as jy fi nansieel vasdraai. Hulle is ook net mense en is soms baie tegemoetkomend. Praat oor duurder en goedkoper behandelings vir ’n toestand.
  • As jy ’n groot mediese uitgawe wil aangaan, onderhandel die tariewe vooraf eerder as dat jy later met reuse rekeninge opgeskeep sit wat jy sukkel om te betaal. Dit kan jou ook help om betyds goedkoper alternatiewe te oorweeg.
  • Vind uit wat jou mediese fonds sal betaal. Hou by die reëls van jou mediese fonds – anders moet jy dalk self die rekening betaal.
  • Soek ’n goeie dokter wat ingekontrakteer is en dus mediesefonds-tariewe vra eerder as privaat tariewe sodat jy nie bybetalings hoef te maak nie.
  • Hou jou mediese rekords en eis dit terug van belasting.
  • Probeer geboortes so natuurlik moontlik hou. Die NGVPL-tarief vir ’n ginekoloog wat ’n keisersnee doen is eintlik ’n bietjie laer as vir natuurlike geboorte, sê David. “Maar die totale rekening is uiteindelik baie hoër omdat jy ’n dag ekstra in die hospitaal moet deurbring en ’n operasieteater moet gebruik. ’n Keisersnee kan dus uiteindelik 50 persent meer kos as ’n natuurlike geboorte!”
  • Moenie ’n spesialis gaan spreek as jou huisdokter net so goed kan help nie.
  • Maak gebruik van gratis aanbiedinge by apteke om jou bloeddruk, cholesterol of bloedsuiker te meet.

Stap 3: Leef voorkomend

Maak seker jou kleinding word volgens die voorgeskrewe immunisasieskedule geïmmuniseer. Jy kan dit gratis by staatsklinieke laat doen. Sommige staatsklinieke is werklik vinnig en netjies, by ander sal jy dalk moet wag. Immunisasie by privaat babaklinieke is ook gewoonlik goedkoper as by ’n dokter.

Moenie rook nie. Dit speel ’n rol in oneindig baie siektes en kwale, veral by kinders.

Ontwikkel ’n gereelde handewasroetine. Dis een van die maklikste en goedkoopste maniere om die oordrag van kieme en siektes te stuit.

Borsvoed jou babas. Navorsing wys borsvoeding help om jou kleinding teen ’n hele rits siektes te beskerm (oorinfeksie en diarree inkluis), verminder die risiko vir latere chroniese toestande soos diabetes en verhoog jou kind se immuniteit. Dit kan ook jou risiko vir sekere soorte kanker verminder.

Volg ’n gebalanseerde dieet. Gebruik aanvullings indien nodig.

Oefen gereeld. Oefening versterk jou bene en spiere, hou jou gewig onder beheer en verminder die risiko vir toestande soos diabetes, cholesterol, hoë bloeddruk, hartsiektes en beroerte. En dis ’n uitstekende antidepressant.

Maak seker julle kry genoeg slaap in. (Goed, ons weet ons vra die onmoontlike met ’n baba in die huis!)

Laat julle gereeld ondersoek sodat probleme betyds raakgesien kan word – dis dan gewoonlik goedkoper om te behandel.

Kry die griepinspuiting as enigeen van julle se immuniteit nie baie goed is nie.

Neem jou baba vir gereelde kliniekbesoeke (staatsklinieke, privaat klinieke of babaklinieke by apteke) om haar vordering te monitor. Dis goedkoper as die dokter en bied uitstekende ondersteuning in die eerste maande.

Besoek self die kliniek gereeld vir gratis gesinsbeplanningsraad en voorbehoedmiddels.

Ontwurm jou hele gesin gereeld.

Jongste uitgawe

Feb - Mei 2022

Jongste uitgawe
Lees Baba & Kleuter gerieflik in digitale formaat.
Begin lees