Vraag

My babadogtertjie is nou drie maande oud en ek is amper op pad terug werk toe. Sy gaan bedags by ’n oulike oppasser bly. Ek het nie kameras in my huis nie, maar hoe sal ek weet dat sy wel met haar speel, gesels en haar stimuleer?

Lizanne du Plessis, arbeidsterapeut, antwoord

Dis nie altyd maklik om terug te keer werk toe nie. Gelukkig is daar in verskeie langtermynstudies gevind dat wanneer ’n ouer terugkeer werk toe, dit voordele vir haar kind se ontwikkeling kan inhou. Maar soos met alles in die lewe is daar nadele ook aan verbonde wanneer jy weer begin werk.

Wanneer kinders gelief, veilig en geborge voel, vind gesonde brein- en emosionele ontwikkeling plaas. Daarom is dit belangrik dat jou babatjie bekend moet wees met die oppasser. Reël vooraf ontmoetings en bring tyd saam deur voor jy teruggaan werk toe. Dis belangrik dat die oppasser warm en empaties moet wees. Sy moet deernis hê en verdraagsaam en meelewend wees. Skep ’n omgewing wat gekenmerk word deur koesteringsrituele en voorspelbare roetines. Moedig die oppasser aan om byvoorbeeld kiekeboe met jou baba te speel elke keer wanneer haar doek geruil word. Laat sy vir jou terugvoering gee oor die dag se doen en late, hetsy dit op ’n stukkie papier, in ’n boekie of op ’n app is. Moedig haar aan om nie net te skryf wat hulle doen nie, maar ook hoe jou dogtertjie daarop reageer.

Bring ’n rukkie soggens voor jy werk toe gaan en smiddae wanneer jy by die huis kom saam met jou dogtertjie en die oppasser deur. Hou dop hoe jou kind reageer wanneer die oppasser by haar is. Tel sy jou babatjie op, gee sy vir haar drukkies, lag sy saam met haar en troos sy as sy hartseer of knieserig is? Jy sal vinnig agterkom as iets nie pluis is nie.

Kyk of daar ’n band tussen jou dogtertjie en die oppasser ontstaan. Glimlag jou dogtertjie as sy die oppasser sien en is sy gretig om na haar toe te gaan? Daar kom natuurlik ’n tydperk wanneer skeidingsangs deel is van normale ontwikkeling en wanneer jou dogtertjie sal huil as jy loop. Maar voor dit gebeur, sal daar maande van groei en ontwikkeling wees waarin jou dogtertjie ’n band met die oppasser behoort te vestig.