Humor help met baie fasette van jou kind se ontwikkeling – dis nie net vir die lekker nie. Dit maak hom slim en help hom om sosiaal aan te pas. Wanneer jy lag, skei jou liggaam endorfiene af wat jou beter laat voel. Humor is natuurlik ook ’n heerlike manier om tyd saam met jou kind deur te bring. Trek jou graadeentjie ’n bietjie nader en kyk watter van hierdie 15 grappies die mondhoeke laat opkrul.

Lekker leesstof
Wees op die uitkyk vir Jaco Jacobs se nuwe boek Ek wil nou nie snaaks wees nie en ander skaterlagrympies (R170, Pan Mac Kids Local). Dis nuut op die rak!

  • Wat begin met ’n T, eindig met ’n T en is vol tee? ’n Teepot.
  • Hoe weet jy daar is ’n olifant onder jou bed? As jou neus aan die dak raak!
  • Wat is blou en gaan op en af? ’n Blou op-en-affertjie. Wat is groen en gaan op en af? ’n Groen op-en-affertjie. Wat is rooi en gaan heen en weer? ’n Rooi op-en-affertjie wat omgeval het.
  • Wat noem ’n mens ’n suigstokkie as jy klaar geëet het? ’n Stokkie.
  • Wat is wollerig en klink soos ’n kat? ’n Mat.
  • Wat het die piesang vir die hond gesê? Niks. Piesangs kan nie praat nie.
  • Wat noem jy ’n donkie met een been, een oog, wat klavier speel terwyl hy ’n bakkie bestuur? Talentvol!
  • Hoeveel kante het ’n kerk? Drie. ’n Binnekant, ’n buitekant en ’n predikant.
  • Wat noem ’n mens ’n vlieg sonder vlerke? ’n Loop.
  • Wat reis om die wêreld maar bly in die hoek? ’n Posseël.
  • Wat het die 0 vir die 8 gesê? Mooi belt!
  • Wat kan jy in jou linkerhand vashou, maar nooit in jou regterhand nie? Jou regter- elmboog.
  • Wat het die een muur vir die ander muur gesê? Ek kry jou op die hoek.
  • Wat is wit en sit onder ’n boom en huil? ’n Yskas wat nie kan boomklim nie.
  • Wat het ’n lang slurp en is in Australië? ’n Olifant wat verdwaal het.

Grappies maak slim