“Ek is moeg.” Ekskuus? Hoe is dit moontlik ná ’n ononderbroke nagrus? Hoe durf jy dit sê? Probeer ’n bietjie deurnag borsvoed, winde uitvryf, weer borsvoed en as jy gelukkig is, jou oë ’n paar minute toemaak voor alles weer van voor af begin! Woede. Koelbloedige woede borrel en bruis deur my. Dit is alles jou skuld. Ek háát jou!

Dit klink dalk of ek oordryf, maar ongelukkig is bogenoemde verskynsel iets wat ná baba se koms gereeld in ons huis gebeur. Ek is getroud met ’n wonderlike man – ’n fantastiese pa en boonop my sielsgenoot. Terwyl ek skryf, kom ek met ’n skok agter dat dié uitbarsting eintlik niks met hom te doen het nie, maar dat ek die helfte van die probleem uitmaak.

Die Amerikaanse paartjie-berader John Gottman sê 67 persent van paartjies se huweliksbevrediging stort ná baba se koms ineen. Dis ’n skrikwekkende syfer, maar so seker as wat baba ontelbare doeke gaan vuil maak, so seker is dit dat jou baba álles verander. En dit kan jou selfs jou huwelik kos. Die rede: Baie mammas hap gereeld na manlief oor die kleinste goedjies en die klein jakkalsies kan uiteindelik ’n huwelik verwoes.

Daar is ’n wetenskaplike verduideliking vir die skielike irritasie met jou wederhelf. ’n Eenvoudige vyf-letterwoord: NODIG. Nuwe ma’s word deur ’n 24 uur-per-dag-vir-almal-daar-wees-gevoel oorweldig. Jou baba het jou (vanselfsprekend) nodig. Jou vriendskappe het aandag nodig. Jou lyf het aandag nodig en tussen doeke, dummies en deurnag-sessies deur moet jy nog ’n liefdevolle vroutjie vir jou man probeer wees. Die meeste vroue probeer die allesoorweldigende verantwoordelikheid hanteer, maar dit plaas baie druk op ’n mamma en druk lei tot angs, wat lei tot irritasie en dit lei tot die “groot ontploffing”.

Die meeste mans is egter salig onbewus van hul irriterende gewoontes. ’n Paar (irriterende) dinge wat niksvermoedende pa’s doen: Hy het geen doekruil-vaardighede nie. Die een keer dat hy ’n doek ruil sit dit so skeef dat alles in elk geval papnat is! Hy teug aan ’n glas wyn (die ysblokkies klingel) terwyl jy borsvoed. Is dit ondersteunend? Hy slaap soos ’n baba en jy hoor elke geluid en spring telkemale op, vinniger as wat jy kan sê supermamma!

Dis genoeg om elke ma se hare te laat rys, maar die waarheid is: Die meeste mans probeer hul bes, net op hul eie unieke manier. Janice Dunn, skrywer van die boek How Not To Lose Your Husband After Kids, sê: Mans is anders as ons bedraad. Jy ken die gewilde sêding “Manne kom van Mars en vroue kom van Venus”. Wel, dis waar! ’n Britse studie waarin navorsers die breingolwe van sowel slapende mans as vroue gemeet het, het die volgende geopenbaar: ’n Huilende baba was die nommereen-wakker-maakgeluid vir vroue, maar dié geluid het nie eens onder mans se top 10 geval nie – ná ’n motoralarm en glo dit of nie, ’n harde wind!

Wat kan jy dus doen om nie jou man ná die kinders se koms te verloor nie?

Erken dat julle verskil: Besef dat daar fisiologiese verskille is en maak vrede daarmee.

Gebruik jou woorde. Kommunikeer! Sê vir hom wat hy moet doen. Mans het nie ’n sesde sintuig nie! Stilswye werk nie. En onthou: Nieverbale leidrade is op mans gemors.

Hou op vergelyk. Ek werk harder, is moeër as jy en is dus geregtig op ... Dis dalk ’n cliché, maar julle is ’n span. Werk eerder saam en nie teen mekaar nie.

Wees lief vir jouself. Maak tyd vir jouself, al is dit hoe moeilik. Bel jou ma, skoonma of huur ’n betroubare babaoppasser. As jy af en toe ’n girls’ night het, sal jy nie die piep kry as jou man ná werk ’n bier gaan drink nie.

Verdeel die huistake. Deesdae werk sowel mans as vroue en selfs tuisbly-mammas het ’n blaaskans nodig. Praat daaroor en kry ’n manier wat vir julle werk: “Ek sit die kinders in die bed, was jy solank die skottelgoed.”

Aan die moedelose, moeë, lekbors-, vet-en-skuldig-voelende ma: Jy sal hierdeur kom. Een van die dae is baba op pad kollege of universiteit toe en gaan dié ’n druppel in die emmer wees. Tyd is ’n wonderlike ding. Dié fase sal verbygaan; jy gaan binnekort gewoond raak aan jou nuwe rol as ma en vrou. Jy gaan hom nie vir altyd haat nie. Die klein bondeltjie is hoeka die helfte van hom.