Getty Images

Vier Rooibos!

Nooi ’n vriendin vir ’n koppie rooibostee om Nasionale Rooibosdag op 16 Januarie te vier. Op hierdie dag word erkenning gegee aan gebruikers, verwerkers, landbouers en plaaswerkers in die rooibosbedryf. Gaan na rooibosday.com of rooibosinfohub.com vir idees oor hoe julle hierdie dag kan vier.

Massering vir jou & baba

’n Swangerskapsmassering hou talle voordele in vir ma én baba – dit help seer spiere ontspan, verbeter bloedsomloop en beweging, verminder swel-ling van die bene en verlaag stres en angstigheid. Evolve Spa in Kempton Park bied ook babaoppassersdienste terwyl jy ontspan. Kry nog inligting by evolvedayspa.co.za of maak ’n afspraak deur ’n e-pos te stuur na info@evolvedayspa.co.za.

Santa’s Village by die V&A Waterfront in Kaapstad

Ontmoet Vader Kersfees

Van 8 tot 24 Desember kuier Kersvader se helpers by Santa’s Village by die V&A Waterfront in Kaapstad, en van 13 Desember af sluit die man in rooi by hulle aan. Kom maak ’n draai en vertel vir Kersvader wat jy vir Kersfees wil hê. Toegang is gratis. Kry nog inligting by waterfront.co.za.

Getty Images

Elke kind in SA verdien inentings

Vir elke 1 000 geboortes wat in Suid-Afrika aangeteken word, sterf sowat 33 met geboorte en tot 40 voor hul vyfde verjaardag. Nedbank het saam met die Nelson Mandela-Kinderfonds die #VaxTheNation-inisiatief bekendgestel om alle kinders in Suid-Afrika ’n kans te gee teen voorkombare, maar rampspoedige siektes.

Al wat jy hoef te doen om te help, is om jou rekening by Nedbank aan Nedbank Children’s Affinity te koppel. Alle geld wat ingesamel word deur die affiniteit-skenkings wat Nedbank namens sy kliënte maak, sal aan die Nelson Mandela-Kinderfonds geskenk word. Lees meer by nedbank.co.za.

Hardloop vir outisme

Daar word na raming jaarliks sowat 7 000 kinders met outisme in Suid-Afrika gebore. Die Afrikaanse Taalmuseum en Taalmonument (ATM) en die Paarlse Atletiekklub se jaarlikse Aandwedloop vind Woensdag, 12 Desember 2018, op die Paarlberg plaas en alle geld wat ingesamel word, word aan die Boland Skool vir Outisme geskenk.

Die gesellige 5 km-Woordloop begin om 18:40 (inskrywingsgeld R25) en is gemik op die hele gesin – selfs stootwaentjies is welkom! Deelnemers skryf in met ’n prettige Afrikaanse woord pleks van ’n nommer. Die 10 km-Aandwedloop begin om 18:30 (inskrywingsfooi R50) en tydelike nommers (vir dié wat nie lid van ’n atletiekklub is nie) is beskikbaar teen R30.

Die Boland Skool vir Outisme is ’n geregistreerde niewinsgewende organisasie wat in 2010 gestig is en wat leerders van so ver as Tulbagh, Stellenbosch, Saron en Wellington huisves. Jy kan op drie maniere inskryf: aanlyn vóór 5 Desember by entrytime.com of sa-active.co.za, by die Taalmonument (daagliks van 08:00 tot 17:00) of op die dag van die wedloop tussen 17:00 en 18:15. Toegang gratis vir ondersteuners.

Gee ’n bietjie liefde
TLC Children’s Home is ’n kinderhuis in Johannesburg wat tot 32 babas en kinders jonger as drie jaar huisves. Jy kan hierdie kinders help deur slegs R100 te skenk vir die Adopt-a-Cot-inisiatief. Hierdie maandelikse skenkings word gebruik om vir die baba wie se kot jy borg, formulemelk, doeke, klere, kos, medisyne en enigiets anders te koop wat hy of sy nodig het. Gaan na tlc.org.za/adopt-a-cot/ vir nog inligting.
Lindt Teddy-sjokolades

Koop sjokolade-teddiebere vir ’n goeie doel

As jy twee Lindt Teddy-sjokolades (100 g) koop, skenk Lindt ’n skooltas aan ’n kind by SOS Children’s Villages. Al wat jy moet doen, is om die unieke kodes van jou sjokolades op Lindt se mikrowebtuiste te deel. Die inisiatief duur tot 25 Desember 2018. Gaan na lindt.co.za vir nog inligting, of besoek hul Facebook-bladsy by facebook.com/LindtChocolateSA.

Peppa Pig Show by die V&A Waterfront in Kaapstad

Die varkie-konsert

Jou kinders gaan gek wees oor die interaktiewe musiekproduksie Peppa Pig Show. Dit word van 16 tot 30 Desember 2018 by die V&A Waterfront in Kaapstad gehou. Die konserte begin 11:00 uur soggens by die amfiteater. Gaan na waterfront.co.za vir nog inligting.