KIES DIE REGTE HOND

Leefstyl Die soort hond wat julle gaan kies hang van jul gesin se behoeftes af. Wees realisties oor jul leefstyl en of die hond wat julle kies, genoeg oefening gaan kry. Die beroemde hondeghoeroe Cesar Millan reken op sy webtuiste cesarsway.com dat as jou kinders aktief is en buite speel, ’n aktiewe hond goed by die gesin sal inskakel. Sy raad is ook dat as jou kinders dit verkies om in die huis te speel, julle liefs ’n hond moet kies wat die regte temperament vir so ’n leefstyl het. Hou in gedagte dat oortollige energie tot gedragsprobleme kan lei.

Huis-huis Kies ’n hond wat pas by die soort huis waarin julle woon. ’n Groter ras is meer geskik vir ’n huis met ’n groot tuin waar hulle na hartelus kan speel. As jy in ’n woonstel woon en daar nie baie plek is nie, is ’n kleiner en rustiger hond dalk meer geskik.

Versorging Groter honde eet meestal meer as kleiner rasse en ’n hond met lang hare moet dikwels by ’n hondesalon versorg word.

Temperament Jou klein ekstrovertjie sal baie beter pas by ’n hond wat vriendelik en toeganklik is, terwyl ’n gereserveerde kind wat daarvan hou om op sy eie te wees, goed met ’n versigtiger hond sal klaarkom. Cesar beveel ook aan dat jou kleingoed die hond eers ontmoet voor julle hom koop.

INTERESSANTE FEIT

Volgens dosomething.org kry net 1 uit 10 honde wat gebore word, ’n permanente huis.

5: Soveel hawelose diere is daar vir elke hawelose mens op die planeet.

Doen jou deel

Die Wet Nose Animal Rescue Centre is ’n niewinsgewende organisasie wat hulle daarvoor beywer om diere te red en nuwe huise te vind vir weggegooide, mishandelde en onversorgde diere. Gaan na wetnose.co.za as jy inligting oor aanneming soek of dalk geldelik wil help. Dis ’n gebruiksvriendelike webtuiste en wemel van oulike diere wat die regte huis soek.

Getty Images
HET JY GEWEET? Labradors, yorkshire-terriërs en bulhonde is van die gewildste honde in Suid-Afrika.
KInders en hul troeteldiere

Gesonde honne

Hoewel die twee nou nie juis vergelykbaar is nie (party mense sal stry), het kinders en honde een ding gemeen: Inentings vir albei spesies is ononderhandelbaar. Een van die belangrikes wat jou hond elke twee jaar moet kry, is die inenting teen hondsdolheid. Dié virus word deur ’n besmette dier se speeksel (dus wanneer jy gebyt word) oorgedra én versprei vinnig. Volgens mayoclinic.org is hierdie siekte bykans altyd noodlottig teen die tyd dat die simptome sigbaar word. Sorg dus dat jou troeteldier teen hierdie lewensgevaarlike virus ingeënt is!

Het jy geweet? Die hondsdolheid-inenting is in 1885 deur die Franse wetenskaplikes Louis Pasteur en Émile Roux ontwikkel en word as ’n mediese deurbraak beskou. Dit is op 6 Julie 1885 vir die eerste keer getoets, op die jonge Joseph Meister wat deur ’n besmette hond aangeval is. Die inenting het sy lewe gered. 

RAAKGEKOOP
Sagte slaapplek vir jul beste vriend. Hondebed R399,99, MRP Home.
Mr Price Home