Te midde van die chaos van bors- voeding, te min slaap en die splinternuwe en reuse-verantwoordelikheid wat saam met ouerskap kom, kan ’n mens baie maklik vergeet hoekom jy en jou lewensmaat in die eerste plek jul skoene onder dieselfde bed ingeskop het. Of soos een uitgeputte nuwe ma dit stel: “As jy ’n baba het wat net vir 20 minute op ’n slag slaap, is sy slaaptye nou nie juis die ideale tyd om jul sekslewe op te kikker nie, tensy julle werklik die storie blitsig kan doen! Dit is regtig moeilik om so vinnig van my ma-rol na my vrou-rol oor te skakel wanneer my man ‘daardie kyk’ in sy oë kry.”

Niks is onmoontlik nie

Die goeie nuus is dat daar werklik hoop vir jou sekslewe is in die maande nadat jy die lewe geskenk het, al vertel jou vriendinne vele stories wat dit onmoontlik laat klink! Die geheim is om jou verwagtinge van intimiteit aan te pas eerder as om dit tot heel onder op jou doenlysie te skuif. Leandie Buys, ’n kliniese seksuoloog van Port Elizabeth en skrywer van die boek Seasons of Sex, sê dit kan baie help om jou libido en jul sekslewe op dreef te kry as jy jou maat visualiseer soos hy was toe julle net begin uitgaan het. Laat jou toe om dieselfde opwinding te ervaar wat julle destyds gevoel het. En, soos altyd, is kommunikasie uiters belangrik. “Jy en jou maat beleef nou soveel veranderinge. Daarom is dit belangrik dat jy jou gevoelens met hom deel,” sê Leandie. “Praat oor jul bekommernisse, jul begeertes, jul behoeftes, jul voorkeure en jul verwagtinge. Hoe meer openlik en eerlik julle met mekaar daaroor is, hoe dieper word jul emosionele en seksuele band.” As jy steeds bang is dat jul sekslewe deur jul bedrywige en uitputtende ouerskapskedules ondermyn word, volg die volgende wenke om nuwe lewe in jul gevoelens te blaas.

Wenke wat die liefdesvlam aanblaas

1. Beklemtoon intimiteit eerder as seks

’n Sensuele massering met aromaterapeutiese olies is ’n goeie beginpunt om intimiteit te skep, sê dr. Wilmé Steenekamp, ’n dokter van Potchefstroom wat ook in die veld van seksuologie praktiseer. Om erkenning te gee aan jou maat is ook baie sexy, sê sy. “Gee dus gereeld eerlike verbale erkenning aan hom vir wie hy is – en lewer positiewe kommentaar oor hoeveel hy vir jou beteken.” Wilmé beklemtoon dat jy jou tyd moet gun om by moederskap aan te pas. “Aanvaar dat jy nou ’n nuwe rol in die lewe het en dat ’n kopskuif nodig is om te onthou dat jy ook ’n sensuele wese en liefdesmaat is.”

2. Reël afspraakaande

As so ’n groot deel van jou dag bepaal word deur jou baba se behoeftes, is dit besonder belangrik om ook tyd in jou beplanning in te werk vir seks, sê Leandie. “Jy dink dalk met nostalgie terug aan die tye toe jy op die ingewing van die oomblik alles kon los en lakenpret kon hê, maar die werklikheid is dat julle ná die koms van jul pienkvoet dit waarskynlik meer doelbewus sal moet beplan.” Henna de Bruin van Johannesburg, wat heeltyds werk en ook die ma van ’n tweejarige is, sê sy het tydens kraamverlof seksafsprake met haar man gemaak, maar gewoonlik aan die slaap geraak sodra sy gaan sit het, wat nog te sê lê. “Noudat Liam ouer is, is seks in die week steeds moeilik. Teen die tyd dat die gesin en die troeteldiere almal gevoer is, die kombuis soortvan skoon is en ons seun gebad en in die bed is, wil ons net omdop – en nie op mekaar nie!” Henna sê sy het toe besef dat dit noodsaaklik is om oor naweke tyd opsy te sit om die romanse lewendig te hou. “Ons maak nie ’n groot drama daarvan deur byvoorbeeld uit te gaan nie, want dit word baie duur, maar ons laai my seun vir ’n paar uur by my suster se huis af en maak dan ’n punt daarvan om net weer met mekaar kontak te maak.” Wilmé stel voor dat ouers een belangrike reël volg tydens alleentyd-afsprake: “Moenie vir langer as 30 minute oor jul baba en gepaardgaande verantwoordelikhede praat nie. Daarna moet julle gesinsake los en die moeite doen om mekaar weer te leer ken.”

3. Tyd vir ’n vinnige enetjie

Wie het gesê liefde maak moet ’n marathonpoging in ’n dubbelbed diep in die nag behels? ’n Vinnige, stomende liefdesessie in die stort, sensuele masserings met aromaterapeutiese olies en selfs die gebruik van seksspeelgoed en smeermiddels om dinge aan die gang te kry, is alles opsies wanneer jou tyd beperk is. “Toe ons tweelingdogtertjies nog ons kamer gedeel het, het ons skielik ons rusbank herontdek, asook die spaarkamer en die eetkamertafel,” bieg ’n jong ma van Pretoria met ’n breë glimlag. Stacy Nelkin, skrywer van You Can’t Afford to Break Up: How an Empty Wallet and a Dirty Mind Can Save Your Relationship, herinner ons dat die hormoonveranderinge ná die geboorte jou libido beduidend laer kan maak – en dis ook goed so. “Dít is wanneer jy met jou maat kontak maak deur hom plesier te gee – deur byvoorbeeld orale seks – en hom só gelukkig te hou,” stel Stacy voor. “Onthou altyd dat seks nie net na omgang verwys nie, en dat orale seks soms makliker is as penetrasie.” Wilmé sê ’n mens moet nou maar aanvaar dat jy waarskynlik vir ander style en plekke van seks voorsiening sal moet maak. “Uiteindelik kan die koms van die kleinding julle aanpor om te eksperimenteer en as paartjie seksueel te groei,” sê sy.

4. Werk sag met jouself

Die erogene dele van jou lyf kan dalk ’n bietjie anders voel ná die geboorte van jou baba, jy kan dalk ’n paar ekstra kilogramme met jou saamdra ná die swangerskap en jy kan dalk skaam voel as jou borste melk begin lek tydens seks (ja, dit kan gebeur en dis heeltemal normaal!). “Praat met jou maat oor hoe jy oor jou lyf voel,” is Wilmé se raad, “en werk daaraan om al die onvermydelike veranderinge aan jou lyf ná kindergeboorte te aanvaar en te leer liefkry. Onthou, as jy vol selfvertroue is oor jou lyf, is jy sexy!”

5. Dink stout en flankeer

“Oefen jou brein seksueel deur erotiese boeke te lees of seksuele gedagtes te koester – veral op daardie dae wanneer jy dink julle dalk liefde kan maak,” sê Leandie. “Stuur vir mekaar e-posse of teksboodskappe gedurende die dag en hou dinge so gewaag as waarmee jy gemaklik voel. Fantasie is ’n uitstekende seksuele opkikker.”

6. Vind jul ritme

’n Gebrek aan slaap is ’n absolute passiedoder, sê Ann Botha van Kaapstad, ’n ma van ’n aktiewe kleuter. “Wanneer jy so moeg is dat jy skaars jou eie naam kan onthou, is die laaste ding waarvoor jy lus voel om vir iets anders as slaap in die bed te spring. Om die waarheid te sê, vir die eerste paar maande van my seun se lewe was dit al klaar ’n reuse taak net om my tande te borsel en klere aan te trek.” Ann onthou dit was eers toe sy self begin slaap het toe haar baba slaap, dat sy geleidelik haar energie herwin het – en ook haar belangstelling in seks.

7. Wees realisties

“Ek en my man is baie bewus daarvan dat, terwyl ons uitstekende ouers wil wees, ons ook in ons huwelik moet belê,” vertel Lynn Paulsen van Port Elizabeth, ma van ’n tweejarige. “Maar dit beteken nie dat ons druk op onsself plaas om seks te hê elke keer as baba slaap of vir ’n paar uur by my ma se huis is nie.” Wanneer dit vir jou voel asof seks werk geword het, onthou dat liefde nie altyd gaan oor die wonderlikste orgasme nie, maar eerder oor die nabyheid aan en saamwees met jou en jou maat, sê Wilmé. Lynn beaam dit: “Een van die belangrikste lesse van ma wees is dat dit my geleer het om die stil oomblikke wat ek saam met my man het, te waardeer. “Dit gebeur maar min, want ons dogter het baie onvoorspelbare slaappatrone, maar ek het geleer om die meeste daaruit te haal.”