Ons woon sedert Desember 2012 in Dar es Salaam, Tanzanië.

Sedert ons na Tanzanië verhuis het, is ek ’n tuisteskepper.

Ons oudste seun is 13 jaar oud en my jongste is 23 maande. Ons oudste drie kinders is in ’n internasionale skool met leerders van oor die wêreld heen en Internasionale Dag is ’n groot hoogtepunt waartydens ons trots Suid-Afrikaanse kultuur en kos ten toon stel.

Aanvanklik was dit vir my ’n groot aanpassing om die skoolstelsel te leer ken en my kinders die nodige leiding te gee met die middaghuiswerk-sessies. Dit is anders as die opvoedingstelsel in Suid-Afrika.

Ek dink dis heeltemal anders om in Afrika as ekspats te woon as oorsee. In ons geval, soos met die meeste gesinne hier, is die tydperk van die betrekking in die buiteland gewoonlik vasgestel en nie permanent nie. Ons leef dus met die wete dat daar ’n stadium sal wees wanneer ons permanent na Suid-Afrika sal terugkeer.

Ek glo dat ongewone situasies, soos om half permanent in die buiteland te woon, kinders vorm en meer aanpasbaar maak. Hulle leer gou hoe om hulle op lughawens en lang vlugte te gedra. Ons jongste was 12 weke oud toe hy die eerste keer na Tanzanië gevlieg het.

Wanneer die kinders na ’n skoolkamp gaan en tussen twee en vyf dae van die huis af weg is, is dit amper soos ’n buitelugskool, maar met ’n groot verskil. Verbeel jou jy is in ’n vreemde land, vreemde omgewing en meestal is daar niemand in die groep wat jou moedertaal kan praat nie!

Hierdie uitdagings is soms vir ons moeilik, maar ook opwindend.

Dit is interessant om te sien hoe ’n negejarige sy heldhaftigheid ontdek en dat die lippie nie soos mamma s’n bewe nie.

Ons kinders neem deel aan verskeie sportsoorte. Ongelukkig loop my seuns die geleentheid mis om rugby en krieket te speel, en hier is ook nie netbal of veldhokkie nie. Ons kinders is tans lede van ’n swemprogram waar hulle die geleentheid kry om in ander dorpe en lande deel te neem.

Ons geniet dit om saam met hulle nuwe plekke te verken en nuwe vriende te maak.

Die kinders neem ook deel aan sokker, basketbal en kultuuraktiwiteite soos drama, dans en musiek.

Ná ses jaar hier het ons al ons voete gevind en haal ons die meeste uit ons tyd hier.

Ons bring graag ons rustye oor naweke langs die strande van Tanzanië deur. Ons geniet dit om nabygeleë eilande te verken. Ons hou van staanroei en geniet die klimaat.

In die somer is die humiditeit uiters hoog. Lugversorging is beslis dan ons beste vriend.

Ons leer baie deur die oë van ons kinders en geniet die saamweestye juis omdat ons op ’n plek woon waar oupas en oumas net soms kom kuier.

Om in die buiteland te woon, beteken dat jou vriende soos familie word. Gesinstye is ’n hoogtepunt wat ons beslis koester.

Dit is ook die geval met die meeste ander gesinne in ons gemeenskap en om afskeid te neem ná die verstryking van kontrakte bly ’n moeilike emosionele ervaring vir ouers en kinders.

Sedert ons aankoms het die beskikbaarheid van bekende kossoorte hier baie toegeneem en deesdae kan ons amper enige maaltyd berei nes ons dit in Suid-Afrika sou doen.

Ons geniet dit om te braai en om ons vriende en bure van die buiteland met Suid-Afrikaanse geregte te bederf.

Al is ons vér van die huis af, kry ons die geleentheid om Suid-Afrika gereeld te besoek en tyd met ons familie en vriende deur te bring. Dit is wat dit anders maak om in Afrika te wees as van ons vriende wat in Europa of Asië woon.

Ons het wel unieke uitdagings wat ons beslis nie kan ontken nie. Dit is en bly ’n uitdaging om in die baie besige verkeer te bestuur en in ’n vreemde land te woon. Ons het ’n baie streng ritueel met die gebruik van muskietweerder en slaap snags onder muskietnette ten einde malaria te voorkom. Malaria en Dengue-koors is steeds ’n baie groot kommer in dele van Afrika.

Besoeke aan Suid-Afrika sal altyd vir ons ’n hoogtepunt wees. Ons doen omvattende beplanning vir hierdie besoeke, aangesien ons die meeste van ons klere, skoolbenodigdhede en sporttoerusting in Suid-Afrika moet koop.

Die meeste bekende produkte hier word ingevoer van Suid-Afrika, Kenia en Europa.

’n Mens moet beslis jou huiswerk doen, aangesien sulke huishoudelike aankope maklik astronomiese bedrae kan bereik.

Ek is die meeste van alles dankbaar vir die geleentheid om myself, my gesin en ons vasteland in ander omstandighede te leer ken.

Ons liefde vir die natuur, die see en die skole waarin ons kinders is, maak dit onmoontlik om die noodsaaklikheid van herwinning en bewaring te ignoreer.

Daar is vele hoogtepunte van ons tyd hier: Ons het die geleentheid gehad om te sien hoe seeskilpaaie vir die eerste keer water toe gaan, ons het op Zanzibar saam met dolfyne geswem en was in die Morogoro-wildtuin waar leeus buite die park se grenslyne langs die pad gelê het.

Al hierdie ervaringe maak ons net liewer vir Afrika, veral om dit amper ongestruktureerd te ervaar. Ons luister tóg gereeld na Afrikaanse musiek en verlang na die ongelooflike Vrystaatse sonondergange.