Getty Images

Ondersteun dié wat seer het

Khululeka Grief Support is ’n geregistreerde niewinsgewende organisasie wat hul daarvoor beywer om kinders en tieners in rou te ondersteun. Hierdie organisasie help kinders om seer te hanteer, soos wanneer hulle iemand aan die dood afgestaan het. Hiervoor samel Khululeka fondse in om vier ondersteuningsgroepe te stig vir tienermeisies tussen die ouderdom van 13 en 19. Vir meer inligting oor Khululeka se Thundafund.com kontak vir Nicholas by Nicholas@thundafund.com, of stuur ’n epos na Khululeka by deborah@khululeka.org, of besoek www.thundafund.com/project/_griefsupport.

Mobile Mommy Makeovers

Mooi by jou huis

As jy in die Johannesburg-omgewing en die ma van ’n pasgeborene is, is Mobile Mommy Makeovers dalk net wat jy nodig het. Hulle verskaf dienste soos haarstilering, naelversorging en haarverwydering by jou eie huis. Vir meer inligting besoek www.mobilemommym.co.za.

Het jy geweet?
Groep B streptokokkus word in 25% van gesonde, swanger vroue gevind wat gewoonlik geen simptome wys nie. Hierdie bakteriële infeksie staan algemeen bekend as groep B strep (GBS) en kan via die vrugwater, of moontlik gedurende vaginale geboorte aan jou baba oorgedra word. Hoewel nie alle babas wie se ma GBS het, geïnfekteer word nie, kan die babas wat wel aangesteek word baie siek hiervan word. Hierdie infeksie kan veroorsaak dat jou baba vroeg gebore word, of na geboorte neonatale sepsis, longontsteking en meningitis kry. Meningitis kan tot doofheid, blindheid en leergestremdhede, en selfs die dood lei in sommige gevalle. Jy kan tussen 35 en 37 weke van jou swangerskap vir GBS getoets word. Hierdie toets behels ’n vinnige en pynlose vaginale en rektale monster. Die monster word dan na die laboratorium gestuur waar die bakterie geïdentifiseer word. Vra jou ginekoloog meer hieroor. As jy geïnfekteer is, word antibiotika gedurende geboorte vir vroue gegee om die risiko te verminder dat hierdie bakteriële infeksie na die baba oorgedra word. Daar is glo vordering in die ontwikkeling van ’n entstof teen GBS om oordrag van ma na pasgeborene te voorkom. Indien ’n inenting slegs 80% effektief is en 90% van vroue bereik, kan dit wêreldwyd ’n potensiële 231 000 gevalle voorkom.
100percentbreastfed.co.za

Borsvoed eksklusief

Suid-Afrika het van die laagste syfers in die wêreld as dit by eksklusiewe borsvoeding kom. Die 100% Breastfed-veldtog is daarop gemik om bewustheid te skep vir eksklusiewe borsvoeding en die voordele wat dit vir ma en kind inhou. Hierdie veldtog wil ma’s herinner dat die liggaam ontwerp is om baba te voed. Wanneer jy formulemelk gebruik, betaal jy eintlik vir iets wat nie naastenby so goed is as dít wat jou eie liggaam kan produseer nie. Die veldtog poog ook om die aantal babasterftes te verminder in gemeenskappe waar inligtingsbronne nie maklik beskikbaar is nie, of selfs onbeskikbaar is. By www.100percentbreastfed.co.za kan jy gratis video’s met verskeie bekendes soos Zolani Mahola, Jo-Ann Strauss en Rachel Kolisi kyk en aflaai wat jou kennis oor eksklusiewe borsvoeding verbreed.

Leer iets

Abraham Kriel Kinderhuis Nylstroom bied op 2 Junie 2018 om 09:30 ’n oggend vir ma’s aan by Woodhill Country Club, Pretoria. Gaan luister wat kenners te sê het oor binding, verhoudings, ontwikkeling en aandaggebrek-hiperaktiwiteitsindroom (ADD/ADHD). Kaartjies kos R250 en sluit middagete in. Kontak vir Gerda by 082 410 2635, of stuur ’n epos na hoof@akknyl.co.za vir meer inligting, of vir enige skenkings.