Jy kan so goed sien presies hoe en waar dinge verkeerd gegaan het, en hoe jy alles anders moes aangepak het vir ’n beter uitkoms. As jy net toe geweet het wat jy nou weet...

Vyf jaar gelede het my oudste dogter se skoolhoof die nuwe hoërskoolkinders en hul ouers verwelkom deur te verwys na die matrieks van 2020! Almal se oë het gerek. Dit het ver weg geklink, maar ook naby. 

Ek onthou dit soos gister – my klein vissie in die groot dam wat dapper haar nuwe skoolavontuur aanpak. En hier is dit nou: matriek in 2020. 

Ek het nog steeds die beker wat my ma vir my gegee het toe ek in 1990 in matriek was. Daar is ’n prentjie van Garfield op en ’n leuse: “Hard work never killed anyone, but I’m not taking any chances.” 

Die beker gaan nou ’n erfstuk word, want op haar eerste matriekdag gaan ek dit plegtig oorhandig aan die vissie wat nou soveel groter is en haar plek in die skooldam gevind het.  

Met my perfekte 20/20-visie kan ek nie help om ’n bietjie na te dink oor die dinge wat ek as die ma van ’n skoolkind dalk anders kon gedoen het. Miskien moes ek meer met huiswerk gehelp het? Moes ek meer wedstryde bygewoon het? Ag, ek kan aan honderde dinge dink, maar die tyd daarvoor is eintlik nou verby. Die jaar gaan verbyvlieg, dit weet ek.   

As jou kind hierdie jaar graad O of 1 toe gaan, is my 20/20-raad aan jou: Gaan lees weer die storie van die skilpad en die haas en gesels met jou kind daaroor. Skool is die tipe langafstandwedloop waarin ’n skilpad wat elke dag ’n klein treetjie nader aan matriek vat, sal oorwin.

Stuur asseblief vir ons foto’s van die eerste dag!