Daar is een deel van my man se werk wat my egter noop om die vertrek te verlaat. Hy sit van tyd tot tyd in lang zoom-vergaderings oor nuwe aanstellings. Van die gesprekke oor die verskeie kandidate kan vir ure aanhou en dis eentonig genoeg dat ek niks hoor nie, net ’n gedruis in die agtergrond.

Die oomblik as ek egter hoor daar is ’n gaping in ’n CV, en dis ’n vrou, en swangerskap en iets babaverwant is die verduideli­king, dan spits my ore onwille­keurig. Ek wil sommer inspring en ook ’n stuiwer in die armbeurs gooi, want my feministiese hobbelperdjie is permanent opgesaal en reg vir ry! Ek kan dit nie help nie… ek begin dan baie fyn luister na elke nuanse en is gereed en oorgehaal om vir my man allerhande handtekens te begin wys en gesigte te begin trek. So kan ’n uitputtende tien minute in die blokke verbygaan en my eie werk kom tot stilstand. Ek is reg vir veg namens die onbe­kende suster wie se naam ek nie eens gehoor het nie.

Dan pak ek maar my rekenaar op en gaan sit elders in die huis.

Al is ek so op my hoede, het ek nog nie een enkele keer gehoor dat ’n negatiewe gevolgtrekking weens gesinsverpligtinge gemaak word nie. Dit word aanvaar as ’n geldige rede dat ‘n beroep vir ’n ruk tot stilstand gekom het. Dis immers ook die wet dat daar nie in sulke omstandighede gediskri­mi­neer mag word nie, maar dis vir my ’n riem onder die hart dat dit werklik gerespekteer word.

Dis nou al meer as ’n jaar dat ek so teen my sin ‘afluister’. Miskien kan ek nou maar bietjie begin ontspan oor die susters se aansoeke, en dan word die gesprekke weer net ’n gedruis.

Wat dink julle? Ek sal graag in ons tuis-kantoor wil bly sit, want dis waar die kaggel is. Ek en my hobbelperdjie kry koud by die kombuistafel.

Geniet hierdie uitgawe en bly warm en gesond. As ons weer gesels is dit lente!

Groete

Helen


Lily Rose
Lily Rose

ONS LIEF LILY ROSE

‘n Doeksak moet baie dinge wees: Prakties, duursaam, wasbaar en liggewig. Lily Rose se sakke voldoen aan al hierdie vereistes en dan is die sakke boonop nog stylvol en begeerlik ook! ‘n Lily Rose-sak kos R2 100 en sal jou moeiteloos laat wissel tussen jou rolle as superma met doeke en bottels, en werkende vrou met ‘n skootrekenaar endokumente. Die sakke word plaaslik vervaardig uit neopreen. 

Bestel by lilyrosecollection.co.za