VRAAG 1: Ek het my kind se Pad na Gesondheid- kaart verloor. Hoe kry ek ’n nuwe een en sal die suster al die vorige inentings kan invul?

ANTWOORD: Hier by Netcare kan die Pad na Gesondheid-kaart net uitgereik word deur die hospitaal waar die baba gebore is. As jy tot dusver gewerk het met een suster by een kliniek wat ’n legger en mediese geskiedenis van jou baba het, kan sy die inligting oor inentings op haar stelsel sien en dit op die kaart invul. Jy word verplig om ’n verklaring af te lê dat jy die kaart verloor het.


VRAAG 2: Kan ek my baba iets vir die pyn gee voor ek hom vir die inenting neem?

ANTWOORD: Nee. Dis outyds om jou baba vooraf ’n pynmiddel te gee en word nie meer gedoen nie omdat dit met die absorpsie van die entstof kan inmeng. Wag liewer tot na die tyd en gee net ’n middel as jou baba werklik ongemaklik lyk. Die meeste babas makeer agterna niks nie.


VRAAG 3: Hoe kan ek die inenting vir my baba minder stresvol maak?

ANTWOORD: Die meeste ouers stres meer as baba! Maar jy kan gerus agterna vir jou baba ’n melkvoeding gee – nie omdat hy gespanne is nie, maar om hom te laat bedaar.


VRAAG 4: Kan my baba ingeënt word al het ek die kaart by die huis vergeet?

ANTWOORD: Die algemene reël is “nee”. As jy egter ’n geskiedenis by die kliniek het, jou kinders al ’n ruk lank soontoe neem en die kliniek hul besonderhede op rekord het, kan die suster dalk tog besluit om jou te help.


VRAAG: Ons gaan weg en my baba se volgende inenting gaan dus ’n maand later moet geskied as wat op haar kliniekkaart aangedui is. Is dit ’n probleem?

ANTWOORD: Nee, dis in die haak. Dinge gebeur mos maar. Inentings kan altyd ingehaal word. Ons moedig mense egter wel aan om waar moontlik by die skedule te hou.


VRAAG: Ek het my baba op die privaat skedule begin, maar nou het ek vasgestel daar is ’n baie goeie staatskliniek naby ons waarheen ons eerder wil gaan. Kan ek van privaat na staat verander?

ANTWOORD: Ja. In die meeste gevalle is die entstof dieselfde, maar die staatskliniek bied slegs die verpligtes aan en nie die opsioneles soos dié teen waterpokkies of meningitis nie. Hepatitis A is byvoorbeeld verpligtend. By die staat kry babas op ses maande ’n inenting wat net masels dek, terwyl die privaat skedule die drie-in-een-entstof toedien wat teen masels, pampoentjies en Duitse masels beskerm.


VRAAG: Daar is ’n groot puisie waar my baba haar TB-inenting gekry het. Kan ek dit uitdruk en ’n antibakteriese room aansmeer?

ANTWOORD: Glad nie! Dis normaal dat ’n puisie daar ontwikkel. Dit kan selfs soms soos ’n pitsweer lyk. Ma’s word soms paniekerig daaroor en raadpleeg die dokter, maar dis regtig nie nodig nie. Die puisie sal self ryp word en bars. Jy moet in geen omstandighede daaraan druk nie. Geen rome, pleisters of ontsmettingsalkohol moet aangewend word nie. Dit sal vanself uitdroog en dan is daar gewoonlik ’n rofie wat ook self afval. Dit kan maande duur en soms bly daar ’n klein litteken op die arm agter.


VRAAG: Ek is so bang vir newe-effekte. Waarvoor moet ek op die uitkyk wees?

ANTWOORD: Daar is regtig nie newe-effekte nie. Wat kan gebeur is dat jou baba in die eerste 48 uur ná die inenting ’n bietjie knieserig is of ’n koors ontwikkel. Dis algemeen. Maar dis al. ’n Koors is ’n temperatuur wat tot 38,5 grade C of selfs hoër styg. As dit gebeur, kan jy Panadostroop gee. Hou andersins by jou gewone roetine en moet niks uitskakel nie.


VRAAG: My baba is allergies vir eier. Is daar enige inentings wat ek moet vermy?

ANTWOORD: ’n Eierallergie is nie ’n kontra-indikasie vir inenting nie. Jare gelede was dit die maselsinfeksie op ses maande. Maar geen baba eet op ses maande al eier nie.


VRAAG: Van hoe oud af kan my baba die griepinenting kry?

ANTWOORD: Griepinentings kan van ses maande af gegee word. Dit word veral aanbeveel vir vroeggebore babas en babas in dagsorg.


VRAAG: Wat is die belangrikste verskille tussen die staatskedule en die privaat skedule?

ANTWOORD: Die verskil is dat die privaat skedule bykomende vaksiene insluit teen nie- lewensbedreigende siektes. As jy hulle kan bekostig, word dit aanbeveel.


VRAAG: Ek hoor dikwels sommige entstowwe is uit voorraad. Moet ek dit vooruit probeer bestel en hou, of sal dit verval?

ANTWOORD: Dit word nie aanbeveel dat jy die entstowwe self vooruit koop nie, want dit moet teen die korrekte temperatuur geberg word. Entstowwe het nie gewoonlik ’n kort raklewe nie. As jy kliniek toe gaan en hoor dat hul voorraad op is, sal hulle dit vir jou bestel en sal jy in kennis gestel word wanneer dit beskikbaar is. In die meeste gevalle is ’n entstof nie beskikbaar nie as gevolg van ’n landwye tekort, nie net ’n tekort by die spesifieke kliniek nie.