Ses weke ná die geboorte van jou kleinding moet jy ginekoloog toe gaan sodat hy of sy kan seker maak dat jou lyf ná die swangerskap en geboorte na wense herstel.

1. Jou baarmoeder

Net voor jy kraam, weeg jou baarmoeder sowat 1 kg, maar ses weke later het dit tot 100 g of minder gekrimp. Die grootste verkleining vind in die eerste twee weke plaas en jy sal dit waarskynlik kan voel saamtrek, veral as jy borsvoed.

2. Bloeding

Of jy nou normaal gekraam of ’n keisersnee gehad het, jy sal ’n ruk lank bloei. Bloeding is die eerste paar dae swaar, maar neem vinnig af. Ná vyf weke behoort dit verby te wees.

3. Jou borste

Melkproduksie behoort binne 36 tot 96 uur ná die geboorte goed gevestig te wees. Voed op aanvraag, want dit is die vinnigste en gerieflikste manier om jou borste gewoond te kry aan die vereistes van borsvoeding.

Die Kaapstadse ginekoloog dr. JP du Buisson gee goeie raad: “Smeer tepelroom ná die geboorte aan om te keer dat jou tepels bars. As jou tepels reeds gebars het, kan dit help om elke dag vyf tot 10 minute lank met ontblote borste in die son te sit tot dit beter is.” JP sê jy kan ook by ’n fisioterapeut om ’n laserbehandeling gaan aanklop.

4. Jou serviks, vagina en perineum

Teen dag sewe behoort jou serviks weer toe te wees. Net ná die geboorte sal die vulva en vagina groot, glad en geswel wees en die vagina kan blou lyk. Die swelling behoort ná drie weke heeltemal weg te wees. Klein skeurtjies in die vagina herstel baie vinnig. As jy ’n episiotomie gekry of geskeur en steke gekry het, kan dit ’n ruk lank pynlik wees. “As jy ’n episiotomie gehad het, is dit gewoonlik drie tot vier dae ná die geboorte die seerste,” sê JP. “Daarna word dit gou beter.”

Bad gereeld in soutwater om infeksie te voorkom. JP se raad is dat jy ook een groot eetlepel sout met ’n liter warm water meng en dit laat afkoel. Giet dit in ’n spuitbotteltjie en spuit die seer plekkie twee tot drie keer per dag oor die toilet of in die stort. Doen dit nadat jou maag gewerk het. Moenie tampons gebruik nie. “Doen daagliks bekkenvloeroefeninge om die bekkenvloer te help versterk, selfs al het jy ’n keisersnee gehad,” sê JP.

5. Jou maagvel en -spiere

Jou maag sal weke ná die geboorte nog sag, verkreukel en pap wees. Hoe gouer jy begin oefen, hoe gouer sal dit na normaal terugkeer, maar JP se raad is dat jy ses weke wag as jy ’n keisersnee gehad het. Die linea nigra of donker streep op jou maag sal ál ligter word, maar dit kan tot drie maande duur voor dit heeltemal verdwyn. Rekmerke verdwyn nie, maar word mettertyd minder opvallend. Hou aan om olie of rekmerkroom aan te smeer; dit hou jou vel elasties.

6. Spysvertering

Jy kan met winderigheid sukkel, veral ná ’n keisersnee. Dis normaal om tot vyf dae ná die geboorte nie ’n stoelgang te hê nie, aangesien die dermkanaal dikwels geledig word voor of tydens die geboorte en dit ’n rukkie duur voor dit weer vol is. Hardlywigheid kan ’n probleem wees, veral as jy ’n episiotomie of keisersnee gehad het. “Gebruik gerus ’n stoelgangversagter soos Movicol,” is JP se raad. Aambeie is algemeen by vroue wat normaal gekraam het. Jou dokter kan medikasie voorskryf wat sal help.

7. Jou enkels

Volgens JP kan jou voete vir 10 tot 14 dae ná jou baba se geboorte nog geswel wees. “As jy swel, is dit belangrik dat albei enkels swel,” waarsku hy. “As net een been geswel en seer is, moet jy dadelik dokter toe gaan.” 

Raakgekoop

Mama Mio se Superstar in a Jar hou jou vel vogtig, en beskerm droë en gebarste vel. R450, shop.poisebrands.co.za.

Mama Mio Superstar in a Jar