Groente is in elke opsig ideaal: minder cholesterol, minder versadigde vette, minder totale vette, geen dierproteïen, meer vesel, hope vitamiene … daar is regtig net mooi geen nadeel daaraan om ’n kind groot te maak wat lief is vir groente nie. Maar dis soms makliker gesê as gedaan. Dit gebeur ongelukkig dikwels dat babas van groente hou en as peuters hul neus daarvoor begin optrek. Hierdie 10 slim wenke sal jou help om oor en onder en verby daardie hekkie te kom.

10 slim wenke
  1. Bied dieselfde groente op verskillende maniere aan. Soms sal jou kind gaar wortels weier, maar graag aan ’n rou wortel knaag. Beproef bevrore ertjies as versnapering pleks van gaar ertjies. Rou babaspinasie word ook soms makliker in slaai aanvaar as wanneer dit pap gekook is.
  2. Sorg dat jou kind betrokke is wanneer jy kos maak. Vra hom om die broccoli af te spoel en in blommetjies te breek. Hy kan ook die stomer aanskakel. Wanneer kinders betrokke is by die bereiding van ’n maaltyd (en by die inkopies daarvoor) is hulle geneig om gesonder te eet. Laat die hele gesin weet dat boetman gehelp het met vanaand se broccoli en dan is die kans baie goed dat hy dit sal eet.
  3. Peuters is baie lief vir vingerkos en doopsouse – bied dus groenterepies as peuselhappies en in kosblikke aan.
  4. As tamatiesous op pasta in jou huis gewild is, kan jy fyngerasperde groente of groentepuree by die sous voeg. Jy kan ook ’n dikker sous met groentestukkies in maak, soos ratatouille.
  5. As jou peuter van kapokaartappel hou, kan jy variasies daarvan prakseer deur wortel, spinasie, blomkool of broccoli by te voeg. Fynpatat is ook baie voedsaam en heerlik.
  6. Byna alle groente is lekkerder as jy kaas byvoeg. Laat jou peuter jou help om die kaas oor te sprinkel en kyk saam hoe dit in die oond begin borrel.
  7. Berei plaatkoekies van oorskietgroente. Druk die groente fyn en maak ’n beslag deur eier en meel by te voeg tot die mengsel dik is. Braai klein porsies in ’n braaipan tot lekker bros.
  8. Ontwikkel jou kind se smaakvoorkeure deur kruie by te voeg. Selfs in klein hoeveelhede voeg kruie voedingstowwe by die maaltyd. Maak dit ’n avontuur en laat jou kind aan die basilie of dille ruik. Vra hom om die geure te identifiseer.
  9. Wortelkoek? Leer hoe om met groente te bak. Botterskorsie- of pampoenpuree kan gebruik word in muffinresepte en gerasperde patat kan by sommige koekieresepte gevoeg word. Google is jou vriend.
  10. Moenie van bone en lensies vergeet nie. Dis mos ook groente en kinders is gewoonlik mal daaroor. Bone is uitstekende vingerkos, maar as jou kind nie daarvan hou nie, kan jy dit fynmaak en by enige sous of sop voeg. Jou kind sal van niks weet nie, maar nog steeds die ekstra voedingstowwe inkry.