VRAAG:

Ek kry taamlik gereeld mastitis, maar is vasberade om aan te hou borsvoed. Wat is my behandelingsopsies?

En hou dit enige risiko vir my baba in?

ANTWOORD:

ANNELL NEL ANTWOORD: Mastitis is ’n algemene toestand by ma’s wat borsvoed.

Dit ontstaan wanneer ’n melkbuisie in die bors verstop en die borsweefsel ontsteek. Dit kan met of sonder infeksie gepaard gaan.

Die bors is geswel, rooi, knopperig en kan baie pynlik wees. Jy kan ook koorsig wees met griepsimptome.

’n Verstopping kan ontstaan as jy lanklaas gevoed of uitgemelk het en jou borste oorvol is, of as jou baba om die een of ander rede nie goed drink nie en jou bors nie leeg word nie.

As daar skade aan die tepel is – byvoorbeeld wanneer die tepel weens borsvoeding bars – kan bakterieë die plekkie binnedring en ’n infeksie veroorsaak.

Dit is belangrik om aan te hou borsvoed omdat jy jou bors moet leegmaak. Mastitis is nie vir jou baba gevaarlik nie.

Die infeksie is in die borsweefsel, nie in jou melk nie. Al sou van die bakterieë in jou melk beland, sal jou baba se maagsure dit neutraliseer.

Jy kan mastitis op die volgende maniere tuis behandel:

  • Borsvoed jou baba eerste op die aangetaste bors wanneer sy suigrefleks die sterkste is.
  • Nadat baba gevoed het kan jy die bors nog verder uitmelk tot dit leeg is.
  • Plaas voor ’n voeding ’n warm waslap op die bors om sirkulasie aan te moedig.
  • Plaas ’n koue waslap (of koue koolblare) op die bors om die ontsteking te help bedaar.
  • Masseer die bors in ’n sirkelbeweging vanaf die buitekant in die rigting van die tepel.
  • Drink baie water en bly gehidreer.
  • Kry genoeg rus terwyl jou liggaam hard werk om teen die infeksie te baklei.

Jy sal ook baat vind by fisioterapie. Die fisioterapeut gebruik ultraklank wat sirkulasie in die bors bevorder, die ontsteking help bedaar en help om die verstopte buisie oop te maak.

Sy sal jou ook die regte masseringstegniek kan leer. As die simptome nie binne twee dae aansienlik verbeter nie en jou koors baie hoog is, moet jy dokter toe gaan en antibiotika drink.

Onbehandelde mastitis kan in ’n baie onaangename abses ontaard.